Canadamanda Calgary llactapimi nacirircani. Ñuca huambra cajllapitami ñuca taitamamacunaca divorciarirca. Chaimandami ñuca abuelitocunapa huasipi causangapaj rircanchi. Ñuca abuelitocunaca ninandami ñucanchitaca juyan carca. Chaimi chaipica cushilla causanajurcanchi.

 Pero siete huatacunata charijpimi ñuca mamaca cutin ñuca taitahuan cazararca. Chaimi Estados Unidos llactaman causangapaj rircanchi. Ñuca taitahuan causajushpami, ñuca taitaca jaicata culirashpa macan cashcata cuenta japircani. Shuj punllaca, escuelamanda huambracuna ñucata macajpi paicunata na chashnallata tigrachishcatami ñuca taitaca yachajchayarca. Chaimi escuelamanda huambracuna macashcatapash yalita ñuca taitaca macahuarca. Ñuca taita chashna macahuashcamandapachami ñucapash macanajunata yachajurcani.

 Ñuca taita fiñaj cajpimi ñuca mamahuanga siempre macanajun carca. 11 huatacunata charishpami drogata, tragota ufiai callarircani. Chaimi tiempohuanga, pihuanbash macanajushpalla purin carcani. Colegiota tucuchishpaca ashtahuan nalimi tucurcani.

 18 huatata charishpami Estados Unidos llactapa cuartelman rircani. Chaiman rishpami gentecunata huañuchinatapash yachajurcani. Cinco huatacuna jipaca Federal de Investigacionbi trabajangapaj nishpami, Psicología nishca carrerata estudiai callarircani. Chai carrerataca Estados Unidos llactapimi yachajui callarircani, jipaca Canadá llactapi yachajushpa catircani.

 Universidadta estudiajushpaca gentecuna paicunapilla pensarijta ricushpami nali paricirihuarca. Chaimi imata rurashpapash gentecunaca cai mundopa problemacunata na tucuchi ushashcata cuenta japircani.

 Yangamanda causajunchi yashpami drogatapash yapata chupan carcani, tragotapash yapata ufian carcani. Shinallata culquipilla, huarmicunahuan puñunapillami yuyan carcani. Chaimi fiestacunaman rishpa shuj shuj huarmicunahuan puñun carcani. Cuartelman rishcamandami pitapash na manllashpa pihuanbash macanajunlla carcani. Alita rurajuni yashpami pipash pitapash llaquichijujta ricushpaca paitaca macashpami saquin carcani. Ñucaca jaicata culirashpa pitapash llaquichijlla runami tucurcani.

 Shuj punllami ñuca amigohuan ñuca huasipi drogata yapata chuparcanchi. Chai punllallatami marihuana nishca drogata jatungapaj nishpa paqueteta ruranajurcanchi. Chashna ruranajujpimi ñuca amigoca ¿Taita Diospica cringuichu? nishpa tapuhuarca. Chaimi ñucaca cashna nircani: “Taita Diospa culpamandami llaquicunahuan causanajunchi, paimandaca imatapash yachangapaca na munanichu”. Cayandi punlla trabajoman rijpimi shuj cumbaca ¿Taita Dioschu llaquicunamanda culpata charin? nishpa tapuhuarca. Paica Testigo de Jehovami cashcarca. Cayandi punllallata ñuca amigo tapushca tapuitallata tapujpimi manllarishca quidarcani. Chaimi paihuanga, seis quillacunata Bibliapa yuyaicunamanda parlarcanchi. Ñuca causaipi charishca tapuicunatapash Bibliahuanmi yachachihuarca.

 Ñucahuan causajuj huarmica Bibliamanda parlachunga na munanllu carca. Shuj domingotaca Testigo de Jehovacunatami Bibliamanda yachachichun huasiman invitarcani nircani. Cayandi punlla trabajomanda huasiman tigrajpica ñucahuan causajuj huarmica huasimandami rishcarca. Chaimi canllaman llujshishpa Taita Diosta ayudahuai nishpa huacai callarircani. Chai mañaipimi, Taita Diospa shuti Jehovataca primera vez utilizarcani (Salmo 83:18).

 Ishcai punllacuna jipami Testigo de Jehová cusahuarmihuan Bibliamanda yachajui callarircani. Estudiota cushpa rishca jipami, Usted puede vivir para siempre en el paraíso en la Tierra nishca librotaca shuj tutapi liishpa tucuchircani. a Jehovamanda, Jesucristomanda yachajushcacunaca ñuca shungumanmi chayahuarca. Jehová Dios llaquij Dios cashcata, gentecuna sufrijta ricushpaca paipash llaquirin cashcatami intindircani (Isaías 63:9). Jehová Dios ñucata juyaj cashcata, paipa churita ñucamanda huañuchun cachamushcata yachanaca ninandami cushichihuarca (1 Juan 4:10). Shinallata Taita Dios ñucahuan pacienciata charishcatami cuenta japishcani. Paica ‘shujllapash ama chingaita chingagrichunmi ninanda llaquirishpa tucuicuna Diospajman tigrachun shuyajun’ (2 Pedro 3:9). Jehová Diosca paiman quimirichunmi munarca (Juan 6:44).

 Chai semanallatami Testigo de Jehovacunapa tandanajuimanga ricallarircani. Suni ajchata charijta ricushpa, aretesta churajushcata ricushpaca shuj gentecunaca manllarinmi carca. Shinapash Testigo de Jehovacunaca paicunapa familiata cuendami tratahuarca. Paicunahuan cashpaca ñuca abuelitocunapa huasipi cashcashnami cushilla sintirircani.

 Bibliamanda yachajunami ñuca causaipi cambiocunata rurachun ayudahuarca. Chaimi tragota ufianata, drogata chupanata, huarmicunahuan huainayanatapash saquircani. Ajchatapashmi ruturircani (1 Corintios 6:9, 10; 11:14). Ñucamanda Jehová Dios cushilla cachunmi munarcani. Chaimi ñuca rurashca cosascunaca Jehovapa ñaupajpi nali cashcata yachashpaca, cutinga chai cosascunataca ñana rurashachu yarcani. Chaimandami yuyaipi, ruraicunapipash cambiangapaj esforzarircani. Jehová munashcashna ñuca causaipi cambiocunata ruraimandami seis quillacuna jipaca 29 de julio de 1989 huatapi bautizarircani.

 Bibliami ñuca punda causaita cambiachun ayudahuashca. Pundaca pipash imatapash nijpica jaicata culirashpa macanllami carcani. Cunanga ‘tucuicunahuan casilla ali causangapami’ esforzarini (Romanos 12:18). Jehová Dios ayudajpillami ñuca causaipica cambiocunata rurai ushashcani. Jehová Diosca Bibliahuan, paipa espíritu santohuanmi ñucataca ayudahuashca (Gálatas 5:22, 23; Hebreos 4:12).

 Drogata chupanapa randi, shujcunata macanapa randi, huarmicunahuan huainayashpa causanapa randica, Jehovata ashtahuan sirvingapaj, paimanda shuj gentecunamanbash villachingapami esforzarijuni. Bautizarishca huaquin huatacuna jipami villachijcuna minishtirishca pushtuman sirvingapaj rircani. Ashtaca gentecunatami Bibliamandaca yachachita ushashcani. Bibliamanda yachajujcuna paicunapa causaipi cambiocunata rurajta ricushpami ninanda cushijuni. Shinallata ñuca causaipi cambiocunata rurajta ricushpami ñuca mamitapash Testigo de Jehová tucurca. Chaimandapashmi ninanda cushijuni.

 El Salvador llactapimi 1999 huatapica shuj escuelamanda graduarircani (Chai escuelataca cunanbica Escuela para Evangelizadores del Reino nishcami can). Chai escuelapimi ashtahuan aliguta villachichun, congregacionbipash ali yachachichun, ali pushachunbashmi ayudahuarca. Chai huatapillatami ñuca huarmi Eugeniahuanga cazararcani. Cunanga Guatemala llactapimi ñuca huarmigundi tiempo completopi sirvinchi.

 Cunanga Jehovata sirvijuimandaca cushillapachami sintirini. Bibliapa yachachishcacunata cazunami punda nali causaita saquichun ayudahuashca. Cunanga casilla, ali causaigutami charini.