Montreal llactapimi nacirircani. Montreal llactaca Quebec llactapa ashtahuan jatun llactami can. Shuj panita, ishcai huauquitami charini. Ñucanchica Rosemont juyailla pushtugupimi viñarcanchi. Ñucanchi taitamamacunaca ñucanchitaca ninandami juyan carca.

 Huahuamandapachami Bibliata liinataca alicachin carcani. 12 huatacunata charishpaca Mushuj Testamentopi Jesuspa causaimanda liinataca ninandami gushtan carcani. Jesús juyaihuan, llaquishpa shujcunata tratan cashcata ricushpaca ñucapashmi paishna cangapaj munan carcani. Shinapash nali cumbacunahuan tandanajushpami chai munaitaca ñana charircani.

 Ñuca taitaca saxofondami tocan carca. Chaimi ñuca taitashna saxofonda tocan carcani. Jipamanga musicatapashmi ninanda gushtai callarircani. Chaimandami guitarrata tocanataca yachajurcani. Tiempohuanga rock musicata tocangapami shuj grupota ñuca amigocunahuan callarircanchi. Shinami fiestacunapi tocai callarircanchi. Ali tocajta ricushpami, musicamanda yachaj famoso gentecunaca shuj shuj ladopi musicata tocachun mañahuarca. Chaimi discocunata grabaj companiahuan shuj contratota rurarcani. Ñuca tocashca musicataca ninandami gentecunaca gushtarca. Shinallata Quebec llactapica ñuca musicataca ninandami radiocunapi uyai callarirca.

 Ñucaca jovenmi carcani. Famoso caimandami ñuca gushtashca cosasta rurashpa ashtaca culquita ganajurcani. Chaimi tucui tucuita charini yarcani. Punllacunaca gimnasioman, entrevistacunaman, televisionbi yalingapapashmi rin carcani. Shinallata autografocunatapashmi mañahuan carca. Cutin tutacunaca fiestacunapi tocangapami rin carcani. Ashtaca gentecunata ricushpa ama manllangapaj, ama pinganayachingapami callaripica tragota ufian carcani. Jipamanga drogacunatami chupai callarircani. Huainayana juchacunata, nali mapa cosascunata rurashpa llaqui apanatapash na manllanllu carcani.

 Ashtacacunaca ñuca cushi cushi causan yashpami ñuca causaitaca alicachishpa ricun carca. Shinapash ñucalla cashpaca llaqui llaquimi sintirin carcani. Shina jahuami famoso tucuchun ñucata ayudaj ishcai jaricunaca sida ungüihuan huañurca. Musicata ninanda gushtashpapash ñuca cumbacunapa nali ruraicunataca na alicachinllu carcani.

 Ñucaca imapash na faltami causajurcani. Shinapash gentecunaca llaquinaitami causanajurca. Ashtaca llaquicuna tiajta ricushpapash imamandata Taita Diosca na imatapash ruran yashpami pensarin carcani. Chaimi taita Diosta mañashpaca imamandata shina llaquicuna tian nishpa mañan carcani. Shuj viajeca shuj llactacunaman nara tocangapaj rishpa samajushpami Bibliata cutin lii callarircani. Na ashta intindircanichu pero tucurimui punllacuna ña chayamujushcatami intindircani.

 Bibliata liijushpaca Jesús 40 punllacunata chaquishca pambapi ayunashcatami yachajurcani (Mateo 4:1, 2). Ñucapash Jesushna ayunajpica Taita Diosca ñucaman imashnapash ricurimunga yashpami, ayunangapaj shuj fechata agllarcani. Shinapash ayunai callaringapaj ishcai semanacuna faltajpimi ishcai testigocuna punguta huactachimurca. Chaimi ucuman ucha yaicuchircani. Shuj testigotaca ñavi ñavi ricushpami cashna tapurcani: ¿Tucurimui punllacunapi causajushcataca imashinata seguro caita ushapanchi? nishpa. Bibliata llujchishpami 2 Timoteo 3:1manda 5​caman liishpa ricuchihuarca. Ashtaca tapuicunatami rurarcani. Shinapash paica tucuitami Bibliahuan contestahuarca. Chaimi paipa nishcacunaca cierto cashcata crircani. Huaquin punllacunata visitashpa yachachijpimi, ayunanaca na minishtirishca cashcata cuenta japircani.

 Testigo de Jehovacunahuanmi Bibliata yachajuita callarircani. Tiempohuanga ajchata aliguta cortarishpami tucui tandanajuiman ri callarircani. Tandanajuicunaman rijpi, tucuicuna juyaihuan ali chasquijpimi ali religionda tarishcata cuenta japircani.

 Ñuca causaipi Bibliapa yachachishcacunata pactachingapaca ashtaca cambiocunatami rurana tucurcani. Por ejemplo, drogata chupanata, huainayana juchacunata, nali mapa cosascunata rurashpa causanatapashmi saquina tucurcani. Shinallata ñucapilla pensarinapa randica shujcunapi preocuparingapami esforzarircani. Soltero cashpapash ishcai huahuacunata charimandami paicunataca taita Diosmanda yachachishpa viñachinata yachajurcani. Tucui minishtirishcacunata charichunbashmi esforzarircani. Shinallata musicata tocanata saquishpa, barato pagajujpipash shuj fabricapimi trabajai callarircani.

 Cabalta parlashpaca, ñuca causaipi cambiocunata ruranaca na facil carcachu. Drogata chupana viciota charimandami chaita saquijushpaca irquiyaita irquiyajurcani (Romanos 7:19, 21-24). Shinapash tucuita yalica huainayanata, mapa cosascunata rurashpa causanata saquinami shinlli carca. Trabajomandaca ninanda shaijushcami huasimanga chayan carcani. Ashagutalla ganajuimandami llaquilla sintirin carcani. Musicata tocashpa ishcai horaspi ganashca culquitami, cunanga quimsa quillapi trabajashpa ganajurcani.

 Jehová Diosta mañana, Bibliata cada punlla liinami ñuca causaipi cambiocunata rurana shinlli cajpipash, cambiarichun ayudahuarca. Huaquin versocuna imashina ñuca causaipi ayudashcatami yuyarini. 2 Corintios 7:1​pica Jesusta ali catijcunataca cashnami nin: ‘ñucanchi cuerpotapash, ñucanchi espiritutapash mapayachinamandaca anchuchinami canchi’ nishpa. Shinallata ñucapa nali causaita saqui ushachunga Filipenses 4:13​mi ayudahuarca. Chaipica ninmi: “Cristo shinllipacha ushaita carajpimi, tucuita rurai ushani”. Jehová Diosca ñuca mañashcacunata uyahuarcami. Shinallata Bibliapa consejocunata intindichun, ñuca causaipi pactachi ushachunbashmi ayudahuarca. Chaimi paiman mingarishpa huata 1997​pi bautizarircani (1 Pedro 4:1, 2).

 Ñuca punda causaita na saquishpaca huañushcami caiman carcani. Shinapash cunanga cushillami causani. Ñuca huarmigu Elvieca shuj bendicionmi capashca. Ishcandimi tiempo completopi sirvinajunchi. Shinallata shujcunaman Bibliamanda yachachishpami ninanda cushijupanchi. Jehová paiman quimirichun saquishcamandami tucui shunguhuan ninanda agradicini. Cushillapachami causani (Juan 6:44).