Yanmei shuti huarmiguca Asia llactamanda shuj testigo de Jehovami can. a Paica shuj ciega huarmiguta calleta yalichishpami ayudarca. Chai ciega huarmiguca Kailan shutimi cashcarca. Calleta yalichishpa ayudashcamandami: “Pagui, Taita Dios bendiciapachun” nirca. Chaimi Yanmei paniguca Kailan huarmigutaca Bibliamanda parlangapaj shuj punllagu tuparita ushapanchichu nishpa tapurca. Cada punllami Taita Diostaca ali religionda tarichihuai nishpa mañan carcani nishpami Kailan huarmiguca parlarca. Pero ¿imamandata shina mañashcanga?

 Kailan huarmiguca 2008​tami shuj amigaca shuj iglesiaman apahuarca, chai iglesiapica discapacidadta charijcunataca ayudanmi nishpami apahuarca nin. Tandanajui tucurishca jipami cai yuyaicunaca maimandata can nishpami sacerdotetaca tapurca. Shina nijpimi sacerdoteca Taita Diospa Shimi Bibliamandami can nirca. Chaimandami Bibliata liingapaj munaimanda chino shimipi tiashca braille Bibliataca tarirca. Bibliapa 32 partecunataca sies quillacunapimi liishpa tucuchirca. Bibliata liishpami paipa religionbi trinidadmanda yachachishca yuyaicunaca panda cashcata intindirca. Shinallata Taita Diospa shutica Jehová cashcatapashmi yachajurca.

 Shinallata pai Bibliapi yachajushcashna iglesiaman rij huaquin gentecuna Bibliapa nishcacunata na pactachijtapashmi cuenta japirca. Por ejemplo, micunata carajushpaca ciegocunamanga sobrashca micunatallami caran carca. Kailan huarmiguca chashna ruranajujta cuenta japishpami ninanda llaquirirca. Chaimandami paipa huasi ladolla iglesiacunata mascai callaririca. Shinallata ali religionda tarichihuai nishpapashmi Taita Diosta mañarca.

 Paimanda Yanmei panigu imata rurashcata yuyarishpami Bibliamandaca yachajui callarirca. Kailan huarmiguca huaquin punllacuna jipallami testigo de Jehovacunapa tandanajuimanga primera vez rirca. Paica cashnami nin: “Primera vez tandanajuiman rishcataca nunca na cungashachu. Turiñañagucunaca cushijushpa, juyaihuanmi tucuicuna saludahuarca. Ciega cashpapash tucuicuna juyaihuan tratajtami sintircani”.

 Kailanga Bibliamanda ashtahuan yachajui callarishpami tucui tandanajuicunaman ri callarirca. Canticocunata cantanataca ninandami gushtan carca. Shinapash pai liinata yachai braillepica chai canticocunaca na tiarcachu. Congregacionmanda huauquipanicunapa ayudahuanmi Kailanga brailleman canticocunataca rurarca. 151 canticocunata rurangapaca casi ishcai punllatami pararca. Abril de 2018 huatapimi Kailanga villachi callarirca. Chai punllamandapachami cada quillami 30 horascunata villachin carca.

 Buatizaringapaj tapuicunata repasachunmi Yanmei paniguca Organizados para hacer la voluntad de Jehová nishca libromanda huaquin tapuicunata grabashpa ayudarca. Julio de 2018​pimi Kailanga bautizarirca. Paica cashnami nin: “Cai jatun tandanajuipi turiñañagucuna ninan juyaita ricuchijta sintishpami cushijuimanda huacai callarircani. Shinallata ali religionda tarishcani nishpapashmi ninanda cushijurcani” (Juan 13:34, 35). Kailanga paita juyashcashnallatami shujcunatapash juyashcata ricuchingapaj munani nirca. Chaimi cunanbica tiempo completopi sirvijun.