Elisa paniguca shuj huarmigumanmi Bibliamanda yachachijurca, chashna yachachijujpimi chai huarmigupa huasimanga shuj sacerdote paipa huarmindi chayamurca. Elisa paniguca chai cusahuarmipa churigu huañushcatami yachaj chayashca carca.

 Quiquinba huahuagu huañushcamandaca ninandami llaquirini nishpa Elisa panigu nijpica sacerdotepash paipa huarmipash ninandami huacai callarirca. Chaimi sacerdote jarica culirashca cashna nirca: ¿Imamandata ñuca shuj churiguta Taita Diosca aparca? Imamandata Taita Dios shina llaquicunata cachamushcataca na intindinichu. 28 huatacunatami Taita Diosta sirvijushcani, shinallata ali cosascunatallami rurajushcani. Chashnachu Taita Diosca pagana cahuarca.

 Elisa paniguca chai cusahuarmimanga paipa churi huañushcamandaca Taita Dios na culpata charishcatami intindichirca. Shinallata Jesús huañushcamanda huañushcacuna cutin causarina cashcata, imamanda Taita Dios llaquicuna tianllu saquishcatapashmi intindichirca. Chashna intindichijpimi sacerdotepash paipa huarmipash Elisataca nirca, imamanda llaquicunata tiashcata intindingapami Taita Diostaca mañanajushcanchi.

 Cati semanapashmi sacerdote paipa huarmindi Elisa panigu yachachijushca huarmigupa huasimanga cutin tigrarca. Elisa paniguca chai huarmigumanga ¿Imatata Bibliaca yachachin? librohuanmi “¿Huañushcacunaca causaringacha?” nishca yuyaimanda yachachijurca. Chashna yachachijujta uyashpami chai cusahuarmica yachajungapaj munarca.

 Asha punllacuna jipami, testigo de Jehovacunaca shuj jatun tandanajuita Tiflis nishca llactapica charirca. Chai tandanajuimanmi chai cusahuarmigunapash rirca. Tandanajuipi huauquipanicuna ninanda juyarijta, shujllashna tandanajushca cajtami ricurca. Ashtaca tiempotami paicunapa iglesiapica shujllashna cangapa ninanda esforzarinajurca shinapash chaitaca nunca na pactachi usharcachu.