Testigo de Jehovacunaca gobiernocunata, banderata, escudotami respetanchi. Shinallata shujcuna banderata saludachun, jurachun, himno nacionalta candachunga na jarcanchichu.

 Shinapash, chai ruraicuna Bibliapa yachachishcacunahuan contra cajpimi testigo de Jehovacunaca chai ruraicunapica na participanchi. Imashinami ñucanchicunaca shujcuna banderacunata saludachun, himno nacionalta candachun na jarcanchi, shinallata ñucanchicunapash respetachunmi munanchi.

Cai temapica cai cati tapuicunatami contestapashun:

•  Cai temamandaca ¿imatata Bibliaca nin?

•  Gobiernocunapa leycuna banderata saludachun, himno nacionalta candachunga obligajpica ¿imatata rurai ushapanchi?

•  Testigo de Jehovacunaca ¿imamandata politicapi, politicocunapa shuj ruraicunapipash na chapurin?

 Ñucanchicuna imamanda chai ruraicunapi na participashcata ali intindingapaca Bibliapa ishcai yuyaicuna ricushun:

•   Jehová Diostalla adorana capanchi. Bibliapica: “Jehová Diostami adorana cangui. Paitallami sirvina cangui” nijunmi (Lucas 4:8). Banderata saludashpa, himno nacionalta candashpaca, juramentota rurashpaca, chai llactata sirvina tucuicunamanda ashtahuan importante cashcatami ricuchinajun. Chaimandami testigo de Jehovacunaca chashna celebraciongunapica na participan.

   Testigo de Jehovacunaca banderata saludashpaca, chai banderata adorajuj cuendami sintichin. Imatapash adoranataca Bibliapica na alicachinllu (1 Corintios 10:14). Huaquin historiadocunaca banderaca panda religiongunapa shuj simbolomi can ninmi. Carlton Hayes historiadorca: “Banderaca panda religiongunapa adoracionbi ashtahuan utilizaj simbolomi can nishpa escribirca”. a Jesuspa punda catijcunamanda parlashpaca, Daniel Mannix escritorca nircami: “Jesusta catijcunaca Roma llactata mandajcunataca nimamanda na adoranllu carca. Chaica cunan punllapi banderata adorachun obligajpipash na adorashcashnami can”. b

  Testigo de Jehovacuna banderata na saludashpa, himno nacionalta na candashpapash banderaca respetanchimi.

•   Taita Diospa ñaupapica tucuicunami igual canchi (Hechos 10:34, 35). Bibliapica Taita Diosca ‘shujlla gentemandami tucui clase o tucui laya gentecunata rurarca’ ninmi (Hechos 17:26). Chaimandami testigo de Jehovacunaca na shuj llactamanda gentecunatallaca na alicachinchi. Maijan llactamanda cajpipash tucuicunatami respetohuan tratanchi (1 Pedro 2:17).

 Testigo de Jehovacunaca na gobiernopa contrachu canchi. Ñucanchicunaca llactacunapi orden tiachunmi gobiernocunataca Taita Dios churashcata crinchi (Romanos 13:1-7). Shinallata Jesusta catijcunapash gobiernocunapa leycunata cazuna cashcatapashmi crinchi (Lucas 20:25).

 Shinapash, shuj llactapa leycuna Taita Dios na munashca cosascunata rurachun obligajpica ¿imatata ñucanchicunaca ruranchi? Huaquinbica Gobiernomanmi shuj leypi c cambiocuna rurachun shuj solicitudta cachai ushanchi. Cutin shuj leypi ima cambiotapash na rurai usharijpica, chai decisionda respetanchimi. Shinapash, ‘gentecunata cazunapa randica Taita Diostami pundapica cazunchi’ (Hechos 5:29).

 Testigo de Jehovacunaca politicapi, politicocunapa shuj ruraicunapipash na chapurinchichu. Ñucanchicunaca na banderata saludanchichu, himno nacionaltapash na candanchichu. Juramentotapash na ruranchichu. Bibliapi mandashcata cazushpami chai ruraicunapica na chapurinchi.