Rusia llactapi testigo de Jehovacunaca ninandami maltratai tucunajushca. Testigocunataca ali gentecuna caimanda, impuestocuna pagaimanda, imapash protestacunapi na participaimandami rijsin. Shina cajpipashmi Rusiamanda autoridadcunaca, Testigocunataca ninanda maltratashca. Unión Soviética llactamanda Gobiernoca, soviético gentecunashna pensachunmi, Testigocunataca obligangapaj munarca. Bibliata y Bibliamanda publicaciongunatapash ama charichunmi prohibiciongunata churarca. Testigocunataca seguidomi vigilanajurca. Chaimi Testigocunaca reuniongunata pacalla charin carca. Japi tucushpaca, macai tucushpami prezo churai tucuna carca. Gobiernoca ashtaca ashtaca Testigocunatami Siberia llactaman deportarca.

Pero año 1991pica, Rusiamanda Gobiernoca, testigo de Jehovacunaca ñami shuj religión legal can, autoridadcunaca ñana molestangachu nishpami shuj documentota curca. Chaimi Testigocunaca tranquilamente reuniongunataca charirca. Pero tranquilo cana tiempoca ashagutallami pararca.

Ashalla autoridadta charij shuj tribunalmi, testigo de Jehovacunapa shuj congregaciondaca, “extremistacunami” can nishca decisionhuan shuj documentota llujchirca. Chai jipaca, año 2009pimi, Tribunal Supremo de Rusiaca, chai decisionga ciertomi can nishpa apoyarca. Testigo de Jehovacunaca tauca huatacunatami difindiringapaj tribunalcuna ñanlla purirca. Pero abril de 2017tami, Tribunal Supremo de Rusiaca, Testigocunapa tucuilla entidad legalcunatami vichana can nishpa ordenda curca. Chaicunapica, “extremista” cosascunatami ruran nishpami chai ordenda curca. Rusia gobiernoca chai ratomi Testigocunapa tucuilla propiedadcunata quichurca. Reuniongunata rurangapaj pushtucunatapashmi vicharca. Testigocunapa publicaciongunapashmi “extremista” publicaciongunami can nirca.

Testigocunapa entidad legalcunata atacashca jahuapash, Rusia gobiernoca, Testigocunatapachami atacai callarirca. Legalmenteca shuj organizacionda atacana y shuj personapa adoracionda atacanaca diferentemi can. Shuj personapa adoracionda atacana cunan punllacunapica prohibidomi can. Policiacunaca Testigocunapa huasicunaman yaicushpami, paicunapa cosascunata mascan, interrogaciongunata ruran, maltratanatapash yachan. Jari cajpi, huarmi cajpi o mashna huatacunata charijpipash, prezo japingapaj, carcelpi churangapaj o huasipillata carcelpishna vichangapami ley tian.

Abril de 2017mandaca, ashtaca ashtaca Testigocunatami “extremistacunami” can nishpa carcelpi churashca, prisión preventiva nishcacunapi prezo churashca. 18 de julio de 2024camanga, ñami totalca 137 Testigocuna prezo cashca.

Rusia llactapi autoridadcuna testigo de Jehovacunata injustamente tratanajushcatami denunciashca

Shuj llactacunamanda gobiernocunapashmi, Testigocunataca ñana shina persiguinachu can nishpa denunciashca. Pero Rusiamanda autoridadcunaca na cazunllu. Ashtahuangarin, Testigocunaca “extremistacunami” can nishpami catishca. Shuj llactacunamanda observador nishcacunapash y tribunalcunapashmi Rusia Gobiernoca yapatami Testigocunataca maltratanajun nin.

Chairalla sentenciacuna

• 25 de enero de 2024tami Sona Olópova huarmigutaca shinlli trabajocunata rurachun, Samara llactapi carcelman cacharca. Paica cazadami can y 37 huatacunatami charin. Sentencia pactaringacamanmi paica chaipi causana can. Mayo de 2023taca policía agentecuna paipa huasiman a la fuerza yaicushpami, tucuilla revisai callarirca. Chai jipaca shuj juicio penalta catishpami extremista ruraicunapimi participajungui nishpa culparca. Paica shuj Testigocunahuan tandanajushpa Taita Diosta adorashca culpatallami charirca. Sona Olopovaca ninmi: “Fiscaliaca na cuenta japi ushanllu, testigo de Jehovacuna cashpata extremista ruraicunapi participajunaca imposiblemi can” ninmi.

• 6 de febrero de 2024tami shuj tribunal de apelacionesca, Dimitri Barmakin apelajpipash cutin paitaca 8 añospa sentenciarca. Sentenciata cushca ratopillatami paitaca, faltajuj huatacunata completangacaman nishpa carcelman aparca. Julio de 2018tami, policía agentecunaca Dimitri Barmakinmba y paipa huarmigu Yelenapa huasimanga a la fuerza armacunahuan yaicurca. Dimitri y Yelenaca, Yelenapa abuelata cuidangapami chai huasipi carca. Yelenapa abuela 90 huatacunatami charin. Dimitrita y Yelenataca paicunapa llacta Vladivostok nishcaman apashpami Dimitrita prezo japirca. Dimitritaca “organización extremistapa obratami organizajungui” nishpami juicio penalta cati callarirca. Cunanga Jabárovsk pushtupimi vichariajun. Paica noviembre de 2029tami carcelmandaca libre llujshinga. Yelenatapash paipa crishcacunamandami juiciota catinajun.

• 29 de febrero de 2024tami Alexánder Chagán huauquitaca Samara llactapi Tribunal de Distrito Central de Togliatti nishcaca 8 añosta carcelpi cachun sentenciarca. Alexanderca, 53 añostami charin y cazadomi can. Rusia llactapi huauquicunaca ashacunallami chai largo sentenciataca chasquishca. Alexandertaca juicio tucurishcandi carcelman aparca. Cunan horasca Samara llactapi Centro de Detención Número 4pimi vichariajun. Paitaca enero de 2032pi libre saquichunmi shuyanajupanchi.

• 5 de marzo de 2024tami, Siberia llactapi Irkutsk pushtupi tribunalca ñucanchi huauquicunamanda 9purataca extremistacunami can nishpa sentenciarca. Chai 9 huauquicunamanda shuj huauquica 72 añostami charin. Chai tucuilla 9 huauquicunatami 7 añospa carcelpi cachun sentenciarca. Octubre de 2021pi, Gobiernopa agentecuna huasiman yaicushpa, mascashpa, investigashca jipami ñucanchi huauquicunataca juicio penalta catirca. Sentenciata cungacamanga Yaroslav Kalin huauquica ñami ishcai huata yalita prisión preventiva nishcapi prezo carca. Paica carcelpi canaca nimamanda na alichu ninmi. Paica ninmi: “Carcelpica llaquinaitami causarin. Ashtahuan nali ucucunapimi canchi” ninmi.

• Abril de 2024tami, carcelpi funcionariocunaca, Rinat Kíramov huauquitaca tubercolosis unguitami charin yashpa doctorcuna atindijuj carcelman aparca. Paica 7 añospa sentenciashcami carca. Noviembre de 2021tami paitaca juicio penalta cati callarirca. 36 añosta charij Rinat huauquitaca extremista ruraicunapimi participajun nishpami culparca. Huata y chaupita carcelpi cashca jipami, paitaca 7 añospa sentenciarca. Doctorcuna atencionda cuj carcelpica shuj prezocuna japishpami paitaca ninanda macarca. Hasta pistola electricahuanbashmi maltratarca. Ashtahuangarin chuscu punllataca ni puñuchunbash ni micuchunbash na saquircachu.Examengunata rurashca jipaca, paica ciertopacha tuberculosis unguita charishcata nirca. 17 de mayo de 2024tami Rinat huauquitaca, cutin pai cashca carcelman aparca. Diciembre de 2027pi libre saquichunmi shuyanajupanchi.

• Testigo de Jehovacunapa entidad legalcunata vichashca jipaca, 20 de junio de 2024tami, Jabárovsk llactapi quimsa huauquicunataca, tauca huatacunapa sentenciarca. Stanislav Kim huauquitaca 8 años y 2 quillacunapami sentenciarca. Vitali Yuk huauquitaca 8 años y 4 quillacunapami sentenciarca. Nikolái Polevódov shuti huauquitaca 8 años y 6 quillacunapami sentenciarca. Paicunataca extremista ruraicunatami organizanajunguichi nishpami sentenciarca. Shinapash paicunaca, paicunapa familiacunahuan y shuj Testigocunahuan tranquilamente tandanajushpa Bibliata liishpa, estudiaitallami estudianajushcarca.

Llaquichishpami catinajun

Mundo enteropi testigo de Jehovacunami, huauquipanicunata Rusia llactapi autoridadcuna maltratanajushcamandaca ninanda pinarishcacuna can. Shinallata mundo enteromanda tauca millón testigo de Jehovacunami, Rusia llactapi autoridadcunamanga prezo churashca Testigocunapa favor cartacunata cachashca. Prezo tianajuj Testigocunapa abogadocunaca shuj shuj tribunalcunapa ayudata mascashca. Shinallata Tribunal Europeo de Derechos Humanosmanbashmi ashtaca solicitudcunata cachashca. Testigocunaca ONUpa Comité de Derechos Humanospi y ONUpa Grupo de Trabajo sobre la Detención Arbitraria nishcapipashmi denunciacunata churashca. Shinallata gentecunapa derechocunata cumplichun ricunajuj organización internacionalcunamanbashmi informecunata cachashca. Testigo de Jehovacunaca Rusia llactapi autoridadcuna Testigocunata ama yapata llaquichinajuchunmi, chai llactapi Testigocuna imashina maltratai tucunajushcataca shuj gentecunapash yachaj chayachun munan.

¿Mashna tiempota yalishca?

1. 18 de julio de 2024

   137 testigo de Jehovacunami carcelpi prezo can.

2. 24 de octubre de 2023

   ONUpa Comité de Derechos Humanosca Elista y Abinsk pushtucunapi entidad religiosacunapa favormi ishcai documentocunata curca. Ishcandi casocunapillatami chai Comiteca nirca, Rusiaca Pacto Internacional de Derechos Civiles y Politicospa artículo 18.1 y artículo 22.1pi imata nijujta na cazushpami Testigocunapa derechocunata na respetashca nirca. Artículo 18.1pica, “tucui gentecunallatami, imata pensangapaj, ima religionda charingapapash libremi can” nijun. Cutin artículo 22.1pica “tucuicunallatami pihuan tandanajungapaj munashpapash tandanajungapaj libremi can” nijun. Testigocunataca paicunapa publicaciongunaca gentecuna macanajuchun, shujcunata odiachunmi yachachin nishpami culpanajushca. Pero chai Comitepa documentocunaca chaicuna na cierto cashcatami ricuchijun.

3. 7 de junio de 2022

   Tribunal Europeo de Derechos Humanosca, Entidad religiosa local de Taganrog y otros contra Rusia casopica Rusiataca juiciota pirdichircami. Rusiaca testigo de Jehovacunata maltratarcami nishpami paicunapa contra sentenciarca.

4. 12 de enero de 2022

   Ministro de justicia de la Federación de Rusia nishcaca, testigo de Jehovacunapa JW Library aplicacionga extremistami can nishpami, Lista Federal de Materiales Extremistas nishcapi churarca. Chai llactapica, nunca na maijanbash aplicaciondaca extremistami can nishpa prohibishcachu. Pero JW Library aplicaciondami por primera vez y solo cai aplicaciondallami extremistami can nishpa prohibirca.

5. 27 de septiembre de 2021

   31 de marzo de 2021tami JW Library aplicaciondaca extremistami can, chai aplicacionda ocupanaca prohibidomi can nishpa Federación de Rusiapi y Crimenea llactapica prohibirca. Chai sentenciata apelajpimi 27 de septiembre de 2021taca Tribunal Municipal de San Petersburgoca, chai apelacionda rechazarca. Chaimi 31 de marzo de 2021pi cushca sentenciaca todavía sirvijunra.

6. 26 de abril de 2019

   ONUpa Grupo de Trabajo sobre la Detención Arbitrariami Dimitri Mijáilov huauquipa derechocunataca na respetashcachu y Rusia llactapash testigo de Jehovacunata persiguijushpaca nalitami rurajun nishpa denunciarca.

7. 20 de abril de 2017

   Tribunal Supremo de la Federación de Rusiami testigo de Jehovacunapa sucursalta y shuj 395 entidad religiosacunatapash quichuchun ordenda curca.