20 de octubremanda 5 de noviembre de 2023​camanga Chile llactapa huaquin pushtucunapimi Juegos Panamericanos nishca pugllaicuna tiarca. Cai pugllaicunapica 6.900 yali deportistacunami 46 llactacunamanda shuj shuj pugllaicunapi participarca. Chai pugllaicuna tiashca punllacunapica más o menos 1.500 testigo de Jehovacunaca chaipi villachingapami shuj campaña especialta rurarca. Chaipaca inglés, portugués, español idiomacunapi publicaciongunahuanmi apashpa rinalla carritocunahuan villachirca. Ñucanchi huauquipanicunaca chai pugllaicunaman shamushca gentecunahuan, deportistacunahuanmi alipacha parlocunata charirca.

Shuj punllaca shuj rijsishca deportistami carritoman quimirirca. Paica huahua cashpaca ñuca mamitahuanmi testigo de Jehovacunapa tandanajuicunaman rin carcani nircami. Deportista cashpa alipacha culquita ganashpapash na cushilla, ali sintirinichu nircami. Huauquicunaca animangapami Bibliapa huaquin textocunata liirca. Chai deportistaca paicunataca ninandami agradicirca.

Cutin shuj punllaca, shuj policiami chai carritoman quimirirca. Paipashmi joven cashpaca tandanajuicunaman rin cashcarca. Chai policiaca quiquingunata ricushpaca congregacionhuan cashpa cushilla yalin cashcatami yarircani nircami. Chaimi shuj huauquica cai policiapa huasimanda ladolla Salón del Reino maipi cashcata, ima horas tandanajun cashcata villarca. Ashtahuanbash shuj Bibliata, Para Siempre Cushilla Causapashunchi folletotapashmi policiaman curca. Chaimi policiaca ninanda cushijurca. Shinallata testigo de Jehovacunahuan cutin tuparishcamandaca ashtacatami cushijuni nircami.

19 huatacunata charij shuj cuitsaca carritoman quimirishpami, ñucanchi panigucunamanga chairallami Bibliata intindingapaj Taita Diospa ayudata mañashpa shuj oracionda rurarcani nishpa parlarca. Chaimi paniguca Bibliamanda yachajungapaj munanguichu nirca. Chai cuitsaca cushijushpami ari nirca. Shinami chai chishillata Bibliamanda yachajui callarirca. Y cunangamanmi yachajushpa catijun.

Cai campaña especialpi villachingapaj apoyashcamandaca Chile llactamanda huauquipanicunataca ashtacatami agradicinchi. Imashinami ricunchi Jehová Diosca paita mascaj gentecunamandaca ninandami preocuparin (Isaías 55:6).