24 de agosto de 2021​tami, Testigo de Jehovacunaca Ecuador llactapi shuj importante juiciota ganarca. Imbabura llactapa San Juan de Ilumán llactapi runa gentecunapa crishcacunata na respetashcatami Corte Constitucionalca declararca. Ecuador llactapa comunidadpi causa gentecunapa derechocunata respetachunmi Corte Constitucionalpa decisiongunaca ayudarca. Cai decisiongunaca shuj llactacunapi problemacuna tiajpipashmi ayudaita ushan.

2014 huatapimi, comunidadmanda autoridadcunaca Testigo de Jehovacuna Salón del Reinota ruranajujpi jarcarca. Shinallata chai comunidadmanda autoridadcunaca Testigo de Jehovacuna paicunapa tandanajuicunata charichun villachinatapashmi prohibirca. Ñucanchi huauquipanicuna cai problemacunamandaca tribunalman rishpami juiciota catirca. Shinapash chai llactamanda ishcai juezcunaca comunidadpa autoridadcunapa lado tucushpami Testigo de Jehovacunataca juiciopica na ayudarca.

Chai llactapa tribunalcunapi chai juiciomanda imapash solucionguna na tiajta ricushpami Ecuador llactapi ashtahuan autoridadta chari Corte Constitucional tribunalman chai juiciota yalichirca. Comunidadpa autoridadcunapa juezcunaca Testigo de Jehovacunapa crishcacunata na respetashcatami Corte Constitucionalmanda juezcunaca villarca. Shinallata chai llactamanda autoridadcunaman, juiciopi ayudashca juezcunamanbashmi gentecunapa crishcacunata respetanata yachajuchun shuj cursoman rina canguichi nirca. Comunidadmanda autoridadcunataca paicunapa comunidadmanda runa gentecunata cuidachun paicunapa crishcacunatapash respetachunmi mañarca. Ashtahuangarin comunidadmanda Testigo de Jehovacunapa ruraicunata respetachunmi mañarca.

Testigo de Jehovacunapa Departamento de Asuntos Legalespi sirvij Philip Brumleyca cashnami nin: “Runa gentecunapa tiashca derechocunaca paicunapa costumbrecunata respetachunmi ayudan shinapash chai derechocunata charimandalla shuj gentecunata llaquichingapaca na canllu”.

Corte Constitucionalmanda autoridadcunapa decisiongunamandaca San Juan de Ilumán llactamanda Testigo de Jehovacunaca ninandami agradicin.

Ñucanchi huauquipanicunapa crishcacunata Jehová Diospa ayudahuan juiciocunata ganaita ushashcamandaca ninandami cushijunchi (Proverbios 21:1).