7 de marzo de 2021 punllataca twi (Akuapem) shimipi Traducción del Nuevo Mundo revisashca Biblia llujshishcatami testigo de Jehovacunaca villarca. Cuerpo Gobernantepi sirvij Kenneth Cook shuti huauquimi, shuj grabashca programapi cai Biblia llujshishcata villarca. Cai programa tucurishca jipami, aparatocunapi utilizangapaj cai Bibliaca ña tiarca.

Cai programataca, televisión satelital nishcata utilizashpami yalichirca. Ashtahuan carulla pushtucunapipash publicadorcuna cai programata uyachunga, telefonopipashmi yalichirca. Chaita rurashcamandami, twi shimita parlaj casi tucuilla 98 mil publicadorcunaca cai programata uyai usharca.

Ghana llactapica, ashtaca gentecunami twi shimitaca parlan. Shuj shuj pushtucunapi twi shimita shican shican parlajpipash, chai shimipi escribishcacunataca twi shimita casi tucui parlaj gentecunami intindita ushan. Cai Bibliata traducingapaca, shuj equipomi quimsa huatacuna chaupita trabajarca. Cai equipopica, chuscu huauquicuna, ishcai panigucunami tiarca.

Shuj traductor huauquica nircami: “Cai proyectoca importantepachami can. Caita pactachingapaca, Jehová Diosmi ñucanchimanga ushaita caramurca. Ashtaca ashtaca gentecuna paipa Shimita charichun Jehová Dios munashcataca, cunanga ashtahuanmi crini” nishpa.

Cai Biblia llujshishcamandami, twi shimita parlaj ñucanchi huauquipanicunahuan ninanda cushijupanchi. Cai shinlli punllacunapi Diospa Shimi ñucanchita shinllichishpa catinata, ñucanchiman ali yuyaita carashpa catinatami ali yachapanchi (Salmos 19:7).