8 de agosto de 2021 punllataca Malaui llactamanda Comité de Sucursalpi sirvij Mark Hutchinson huauquimi, Malaui llactamanda señas shimipi, La Biblia: el Evangelio según Mateo nishca libro llujshishcata villarca. Malaui llactamanda señas shimipica cai libromi callari llujshishca libro can.

Cai libro llujshijta villashcataca, shuj grabashca programapi sucursalpa territoriopi ricuchunmi yalichirca. Cai programataca chai llactamanda shuj tele canalpipash, shuj radio emisorapipashmi yalichirca.

Señas shimipi callari congregacionga 2005 huatapi, Lilongwe llactapimi tiai callarirca. Shinallata 2009 huatapimi Malaui llactamanda señas shimiman publicaciongunataca traduci callarirca. Chai punllacunamanda cunancamanga, 34 publicaciongunatami chai shimimanga traducishca. Cunanga traducingapaj picha equipocunami tian. Chai equipocunapica 21 huauquipanigucunami trabajan.

Cai proyectopi trabajashca na uyaj shuj traductorca nircami: “Ñucanchi publicaciongunapica, huaquin versiculocunatami señas shimipi chariparcanchi. Chai textocunamandaca ñami beneficiarishcanchi. Shinapash cunanga chai textocunamanda ñaja versiculocunapash, jipa versiculocunapash imata nishcatami ña yachai ushapanchi. Shinaca ñucanchi estudio personalpi chai versiculocunamandaca ashtahuanmi beneficiari ushapanchi. Villachinajushpapash chai versiculocunataca ashtahuan aligutami utilizai ushapanchi” nircami.

Cai librota alipacha, intindirinalla traducishcataca, Mateo 22:44​pimi ricuita ushapanchi. Shuj traductorcanircami: “Shuj Bibliacunapica cai versoca ninmi: ‘Señorca, ñuca Señormanga nircami’ . Chaita liishpaca, Jehovapash, Jesuspash chai personallata cashcatami huaquingunaca intindin. Cutin cai Bibliapica, Jehová Dios Jesusman parlajushcata intindinaca facilmi can” nircami.

Jehová Diosca, “jahua pachamandami juyailla aliguta imatapash” caraj Dios can (Santiago 1:17). Chaimandami Jehová Dios carashca cai Bibliagu, Malaui llactamanda huauquipanigucuna paiman ashtahuan quimiringapaj ayudachun mañapanchi.