30 de enero de 2021​pimi, computadoracunapilla, celularcunapilla ricungapaj Traducción del Nuevo Mundo Biblia tahitiano shimipi llujshishcata villarca. Chai punllapa programata ñaupashpa grabashcamandami, Internetta utilizashpa Polinesia Francesa llactapa tucuilla congregaciongunaman chay programata uyachirca. Tahití llactapa Comité de Sucursalpi sirvij Luc Granger huauquimi, chai Biblia llujshishcata villarca.

Polinesia Francesa llactamanda gentecunaca, casi tucuicunami tahitiano shimita huahuamandapacha parlashpa viñashca. Chai llactapi causaj 1.100 yali publicadorcunami, chai Bibliamandaca ninanda beneficiaringa.

Biblia enterota traducingapaca ishcai equipo de traduccionmi 8 huatacunata trabajarca. Chaipi ayudashca shuj huauquica nircami: “Cai llactapi gentecunaca huata 1800 jipa rurashca Bibliatami utilizan. Chaipica na rijsishca shimicunami ricurin. Cutin, Traducción del Nuevo Mundo Bibliaca tucuicunapa, ashtahuan jovengunapapash fácil intindinallami can. Cai Bibliaca tucuitami cabalta yachachin. Intindirinalla, gentecuna parlashca shimicunata charin”.

Cai Alpapa tucui llactacunapi gentecunaman Diospa Shimita uyachishcamandaca Jehová Diostami ninanda agradicipanchi. Taita Diosmanda yachajungapaj munaj gentecunapa shunguman cai mushuj Biblia chayajta ricungapami ninanda munapanchi (Isaías 42:12).