Shuj semana jipallami testigo de Jehovacunaca Traducción del Nuevo Mundo Bibliataca 6 shimicunapi llujchirca. 4 de julio de 2020​taca bislama y oroma shimicunapimi Traducción del Nuevo Mundo Bibliataca llujchirca. Cutin 5 de Juliotaca letón y maratí shimicunanapimi Traducción del Nuevo Mundo Bibliataca completota llujchirca. Shinallata bengalí y karen sgaw shimicunapipashmi Traducción del Nuevo Mundo de las Escrituras Griegas Cristianastaca llujchirca. Grabashca discursocunata uyachishpami cai Bibliacuna llujshishcata, internetpi ña descargai ushashcatapash villarca. Cai programata uyangapa conectarishca huauquipanigucunaca cai Bibliacunata Jehová Dios carashcamandaca ninandami cushijunajurca.

Fiyi llactamanda Comité de Sucursalpi Sirvij Huauqui Mark Slegermi bislama shimipi Traducción del Nuevo Mundo Biblia llujshishcataca villarca. Cai programata uyangapaca Vanuatu llactamanda huauquipanicunapashmi conectarirca. Cai programataca bislama shimipi y señaspipashmi yalichirca.

Cai Bibliata llujchingapaca ishcai equipo de traduccionbi ayudaj huauquipanicunami quimsa huata yalita traducishpa ayudarca. Shuj traductoraca nircami: “Cai revisashca Traducción del Nuevo Mundo Bibliataca turiñañacunaca ninandami gushtanga. Cai Bibliaca cunanbi gentecuna parlashca shimicunahuan traducishca caimandami liingapapash facil can. Cai Bibliaca Jehová Diosmanda ashtahuan aliguta yachajuchunmi ayudanga” nirca.

Cai revisashca Bibliaca bislama shimita parlaj 700 yali testigocunataca estudio personalta rurashpa ashtahuan aliguta yachajuchun, villachi ushachunbashmi ninanda ayudanga.

Etiopia llactamanda Comité de Sucursalpi Sirvij Huauqui Delroy Williamsonmi oromo shimipi Traducción del Nuevo Mundo Biblia llujshishcataca villarca. Cai programataca 12.548 testigo de Jehovacunami uyarca. Caicunamandaca 2.000 testigo de Jehovacunami oromo shimita parlan carca.

Cai programata yalichingapa computadorapi huaquin problemacuna ricurishcamandami Cuerpo Gobernantepi Sirvij Huauquicunaca cai grabashca programata televicionbi yalichingapa permisota llujchirca. Huaquingunaca celularcunapi conectarishpapashmi cai programataca ricui usharca.

Cai Bibliata traducingapaca 5 traductorcunami 5 huatacunata ayudarca. Cai mushuj Bibliaca oromo shimipi villachij huauquipanicunataca ninandami ayudanga. Oromo shimitaca ashtaca ashtaca gentecunami parlan.

12 huatacunata traducishca jipami Traducción del Nuevo Mundo Bibliataca letón shimipi llujchirca. Letonia llactamanda letón y ruso shimita parlaj tucuilla congregaciongunatami cai programata ricuchunga invitarca.

Finlandia llactamanda Comité de Sucursalpi Sirvij Huauqui Jouni Palmumi cai mushuj Biblia llujshishcataca villarca. Paica cashnami nirca: “Letón shimita parlaj huauquipanicuna, letón shimipi revisashca Bibliaca ñami llujshirca nishpami cushijushpa villapanchi. Cai Bibliaca intindirinalla shimipi, liingapapash ashtahuan facilmi can. Cai Bibliaca Taita Diospa shimita ashtahuan fácil intindichun, liishcapipash ashtahuan aliguta pensarichunmi ayudapanga” nirca.

Revisashca Bibliaca ashtahuan aliguta estudiachunmi huaquin ayudacunata charin. Caimanda parlashpami shuj traductorca nirca: “Cai revisashca Bibliaca shuj celularshnami. Shuj celulartaca fácil manejai usharinllami, celularpica tucui minishtirishcami tian. Shina cuindami cai revisashca Bibliataca fácil estudiai usharin. Cai Bibliapica aliguta yachajungapa tucui minishtirishcami tian. Imata yachajushcatapash ashtahuan aligutami pensari usharin” nirca.

India llactamanda Comité de Sucursalpi Sirvij Huauqui Puneet Aggarwalmi maratí shimipi Traducción del Nuevo Mundo Biblia llujshishcataca villarca. India llactamanda maratí shimita parlaj tucuilla congregaciongunami cai programata uyangapaca conectarirca.

6 traductorcunami quimsa huatacunata cai Bibliata traducishpa ayudarca. Shuj traductoraca cashnami nirca: “Cai mushuj Bibliaca taitamamacuna huahuacunata aliguta yachachichunmi ninanda ayudanga” nirca. Shinallata “Bibliamanda yachajungapa munajcunaman yachachichunbashmi ninanda ayudanga” nirca.

Cutin shuj traductoraca nircami: “Cai mushuj Bibliapi Taita Diospa shuti maipi tiajuna pushtupi tiajujta ricushpaca cushillami sintiripani. Cai Bibliata liinajushpaca Biblia enteropimi Taita Diospa shutitaca ricui ushanga. Shinami tucuicuna Jehová Diostalla alicachishpa causanga” nirca.

India central llactapica 83 millón yali gentecunami maratí shimitaca parlan.

India llactamanda Comité de Sucursalpi Sirvij Huauqui Ashok Patelmi bengalí shimipi Escrituras Griegas Cristianas llujshishcataca villarca. India llactamanda y Bangladesh llactamanda 1.200 yali huauquipanicunami cai programata uyangapaca conectarirca.

Bengalí shimitaca 265 millón yali gentecunami parlan. Cai traduccionda casi tucui gentecuna intindichunmi India llactamanda, Bangladesh llactamanda huaquin pushtucunamanda traductorcunata tandachishpa cai Bibliataca traducirca. Cai Bibliataca quimsa huatapimi traducishpa tucuchirca.

Huauqui Ashok Patel discursota cujushpaca cashnami nirca: “India llactapica bengalí shimipimi Bibliaca primera vez llujshishca. Huata 1801​pimi bengali shimipi Escrituras Griegas Cristianasta traducishpa gentecunaca llujchishca. Cai traducishca Bibliapica huaquin pushtucunapimi Jehová Diospa shutitaca churashca carca. Pero cunanbi traducishca mushuj Bibliacunapica Diospa shutita churanapa randica Señor nishpami churashca. Chaimandami ñucanchica Traducción del Nuevo Mundo de las Escrituras Griegas Cristianasta minishtinajuparcanchi. Cai Bibliapica cabaltami yachachijun. Intindirinallami can” nirca.

Shuj traductorca cashnami nirca: “Cai Bibliata ricushpaca Jehová Dios tucui laya gentecunata juyashcatami cuenta japipashcani. Jehová Diosca paita rijsichun, paipa churi Jesustapash gentecuna rijsichunmi munan” nirca.

Myanmar llactamanda Comité de Sucursalpi Sirvij Huauqui Hiroshi Aokimi karen sgaw shimipi Escrituras Griegas Cristianas llujshishcataca villarca. Cai programata uyangapaca 6 congregacionmanda huauquipanicuna y 4 grupomanda huauquipanicunami conectarirca. Totalca 510puracunami conectarirca.

Cai traduccionda llujchingapaca shuj huata yalitami pararca. Shuj traductorca nircami: “Karen sgaw shimita parlaj huauquipanicunapash, cai shimita parlaj shuj gentecunapash cai Bibliapi Taita Diospa shuti tiajushcamandami cai Bibliata liinataca ninanda gushtanga. Cai Bibliataca gentecuna cunanbi parlaj shimicunahuanmi traducishca. Liingapapash fácil, intindirinallami, cabalgutapachami intindichijun. Ñucanchi shimipi cai Bibliaguta Jehová Dios carashcamandaca ninandami agradicipanchi. Paiman ashtahuan quimirichunmi ayudapanga” nirca.

Cutin shuj traductoraca nircami: “Traducción del Nuevo Mundo Bibliata gentecuna cunanbi parlaj shimicunahuan traducishca caimandami Bibliata liinajushpa, Bibliapi historiacunata liinajushpapash facil intindi ushanga. Shinami Bibliapi parlashca jaricuna, huarmicuna imashina sintirishcata intindi ushanga. Ashtahuangarin paicunashna rurangapapashmi munanga” nirca.

Ñucanchi huauquipanicuna cai Bibliacunata chasquishcamandaca ninandami cushijupanchi. Cai mushuj traduccionguna Jehová Diosman ashtahuan quimichun ayudanata, shuj gentecunamanbash Jehová Diosmanda yachachichun ayudanataca seguromi capanchi (Juan 17:17).