Testigo de Jehovacunaca noviembre de 2020 quillataca siempremi yaringa. COVID nishca ungüi tiashcamandami, mundo enteropi gentecuna huasi ucupi yalina tucurcanchi. Ashtaca gentecuna tiaj pushtucunapipash, huasin huasin rishpapash na villachi usharcanchichu. Shinapash Diospa Gobiernomanda villachingapami, testigo de Jehovacunaca mundo enteropi shuj campañata rurarcanchi. Ashtaca millón publicadorcunami, Villajun Número 2 de 2020 revistata negociocunaman, gobiernopa trabajaj oficinacunaman, profesorcunaman, amigocunaman, familiacunaman, tucui gentecunaman chayachingapaj ninanda esforzarirca. Chaita ruranaca, Diosmanda villashcata uyangapaj munanajuj gentecunataca ninandami cushichirca. Ashtahuanbachaca, chai campañapi ayudajcunami ninanda cushijurca.

Shuj shuj llactacunamanda huauquipanicunapa experienciacunatami ricugripanchi:

18 huatacunata charij, chairalla bautizarishca Australia llactamanda Lucinda Furkin paniguca escribircami: “Campaña tiashca tiempopi huañujuimanda irquilla cashpapash, aguantashpa catichun Jehová Dios fuerzata cujushcata, animajushcatami cuenta japircani”.

Nueva Zelanda llactamanda shuj taitaca, paipa familiata imashina chai campaña ayudashcatami escribirca: “7, 9, 11 y 13 huatacunata charij ushicunatami charinchi. Chai campañata ñucanchi Taita Jehová Dios rurachun mandashcatami yuyarcanchi. Shina yuyanami, campaña tiempopi cada punlla villachichun ñuca familiataca ayudarca”.

Kagiso y Lydia Marumo cusahuarmica circuitopimi sirvin. Paicunaca, paicunapa na testigo familiacunamanmi Internetta utilizashpa Villajun revistata cacharca. Revistata chasquijcunaca, taucacunami agradicishpa paicunata escribirca. Kagiso huauquipa shuj familiaca doctorami can. Paica nircami: “Minishtijuj tiempopipachami chai revistata chasquircani, ñuca atindijuj gentecunaca Diospipash, Bibliapipash na yapa crinllu. Ñuca huahuacunapash brujería cosascunapimi satirishca carca” nishpa. Kagiso y Lydia cusahuarmica paipa familiata telefonopi cayashpami chai tutallata Bibliamanda paihuan yachajui callarirca. Cunanbica, semanapi ishcai viajemi Bibliamanda yachajun.

Ontario llactamanda Soroya Thompson precursora paniguca escribircami: “Chai campañaca ima ashtahuan importante cashcata yaipi charichun, ashtacata rurashpa catinara cashcata yaipi charichunmi ayudahuarca. Ashtahuanbash, Jehová Dios juyaj Dios cashcata, gentecunapuramanda pipash na huañuchun munashcatapashmi ricuchirca. Chaita yaipi charinami, campaña tiempopi ashtahuan villachina munaita charichun ayudahurca”.

Columbia Británica llactamanda shuj paniguca nircami: “Cai llaqui, shinlli punllacunapi caimanda ama panda yuyaicunata charingapami, precursora auxiliar tucurcani. Alillata sintirichunmi ayudahuarca. Ñuca familiatapashmi ayudarca”.

Canadá llactamanda Betelca ninmi: “Campañata ruranaca, familia ucupi ashtahuan tandanajushpa shujllashna cachunmi ayudashca. Villachita ushashcamandaca huahuacunapashmi ali sintirirca. Paicunallata cartacunata escribishpa, o paicunapa familia escribishca cartacunapi shuticunata, direcciongunata churashpami ayudarca” ninmi.

Timo y Eeva Tuomisto cusahuarmica circuitopimi sirvin. Paicunaca nircami: “Ñucanchi llacta ladopica, noviembre quillatami punllacunaca ashtahuan amsa amsa yalin. Chaimandami huauquipanicuna, ashtahuanbachaca precursorcunaca cai amsa amsa punllacunapi michagu punchayachinshna cajpi chai campañamandaca ninanda cushijurca” nishpa.

Shuj cusahuarmica paicunapa shuj rijsimanmi shuj revistata cacharca. Revistata chasquishpa agradicimandami shuj cartata paicunaman escribirca. Chaipica nijurcami: “Cunanmi Bibliapi Santiago librota liijurcani. Chaipica, feta charishpapash imatapash na rurashpaca huañushcashnami yanga tucun nijujtami ricurcani. Testigo de Jehovacunaca gentecuna Bibliamanda yachajuchun ayudashpami, feta shinlliyachij cosascunata rurashpa catin” nircami.

Grecia llactamanda Betelca nircami: “COVID nishca ungüi ricurimanda, ni maiman na llujshishpa huasi ucupi vicharina tucuimandaca, ashtaca huauquipanicunami shaijushca, estresado sintirirca. Ali sintiringapaj minishtijuj horaspipachami campañapi villachina ricurirca. Taucacunami nirca, cai shinlli punllacunapi cashpapash imapash alita rurangapami cai campañaca ayudarca” nishpa.

Suzie Kontargiri paniguca, paipa salud nali cajpipash, paipa cusa na testigo cajpipashmi precursora auxiliar tucurca. Chai paniguca ninmi: “Campañapi villachishcamandami, panda yuyaicunatapash ñana charircani. Cushi cushimi jatarin carcani. Huasi ucupi ruraicunata rurashca jipa, micunata yanushca jipami villachi callarin carcani. Ñuca cusagu na testigo cashpapashmi huaquinbica tapuhuan carca, ¿cunanga nachu villachigringui? nishpa. Ñañagucunahuan cushijushpa villachijujta ricuimandami shina nihuan carca”.

Tamaki Hirota paniguca, chai llactapi gobiernopa trabajaj gentecunamanmi cartacunata escribirca. Paica ninmi: “Jehová Diosrami cartacunata utilizashpa villachi callarirca. Jehová Diosca gentecunamanga 66 cartacunatami escribirca. Jehová Diosta ashtahuan rijsingapami gentecunaca cutin cutin, ashtaca huatacunata chai cartacunataca liishcanchi. Cartacunata escribishpa villachina alipacha cashcataca Jehová Diosca alimi yachan. Cai campañataca na cungashunllu” ninmi.

Na yashcapimi Meharaja Vijaya panigupash, Imayanathan Amutha panigupash cada uno shuj cartata chai huasimanllata escribishcarca. Huasi dueñoca punda cartata chasquishpaca na liishpallatami shitarca. Cati cartata ricushpaca, imapash importante cajpimi ishcai viaje cachamushcanga yarcami. Revistata liishca jipaca, cati cartata cachashca paniguta telefonopi cayashpami, Bibliamanda yachajui callarirca.

Revistata chasquishca jipami, gobiernopa trabajaj shuj huarmiguca Sri Lanka llactapa Betelman escribirca. Crij cashpapash, testigo de Jehovacunahuanga nunca na parlashcanichu nircami. Villajun revistatapash, Internetpi jw.org paginatapash ninanda alicachishcatami parlarca. Ashtahuanbash, “testigo de Jehová tucungapaca ¿imatata rurana cani? nishpami tapurca. Betelmanda huauquicunaca shuj testigo chai huarmiguhuan parlachunmi uchalla arreglocunata rurarca.

13 huatacunata charij shuj publicadorca, politicamanda cutin cutin parlaj escuelamanmi purin. Noviembre quillapi tiashca campaña imashina paita ayudashcata parlashpami nin: “Imamanda politicapi na chapurishcata ñuca profesorcunaman villangapami ashtahuan animarircani. Chaica ñucapa fetami ashtahuan shinlliyachirca”.

Margit Haring shuti panigupashmi casi shinallata sintirirca. Paica escribircami: “Manllaita ladoman saquichunmi chai campañaca ayudahuarca. Callaripica gobiernopa trabajaj gentecunaman, negociocunata charij gentecunaman cartata escribinataca manllarcanimi. Ñuca imata crishcata ali shimigucunahuan shujcunaman parlanata yachajunaca, jipa punllacunapipashmi ayudanga”.

Shuj ancianoca nircami: “Ashtaca huauquipanicuna paicunapa saludhuan nali cashpapash precursorcuna tucujta ricunaca ninandami pensachihuarca. Paicunaca ninmanllami carca, ñuca salud nali caimandaca na precursor tucuita ushanichu nishpa. Shina ninapa randica, chai campañapi villachingapami aprovecharca. Paicuna cushijushca cashcata ricushpa. Jehová Diostapash, huauquipanicunatapash ninanda juyajta ricushpaca tucuicunami cushijuimanda huacan carcanchi”.

Mundo enteropi shina ali experienciacuna tiashcamandaca, ashtahuan parlashpa catipanchimanrami. Diospa Gobiernomanda villaicunata ashtaca millón gentecunaman villachinaca alipachami carca (Juan 15:11).