1 de septiembre de 2022​tami mundo enteropi testigo de Jehovacunaca, cutin huasin huasin predicai callarirca. Shina predicaimandami testigocunaca rijsishca can. Y shinallata chai quillaca Bibliata yachachingapaj shuj campañata ruranajuimandami contentocunapacha carca. Huaquin huauquipanicunaca shina predicashpa ña yacharishcami carca. Pero cutin shujcunaca por primera vezmi huasin huasin predicashpa paicunapa vecinocunaman en persona Bibliamanda parlagrinajurca. Shuj shuj llactacunapi huauquipanicunapa experienciacunatami ricugripanchi. Chai experienciacunaca año de servicio 2023 alipacha callarishcatami ricuchijun.

Petershagen llactapimi Nicole y Tina shuti panicunaca 2 de septiembre de 2022​ta shuj edificiopi predicanajurca. Pero chai pushtupica nipita na tarircachu. Ña chaimanda rinajujpimi shuj huarmiguca paicunata cayarca. Chaimi chai huarmiguca punguta huactajpica na pascai avanzarcanichu, pero Bibliamandaca parlangapami munani nirca. Shina nijpimi chai panicunaca chai huarmigupa huasiman tigrarca. Chaipimi Traducción del Nuevo Mundo Biblia meza jahuapi tiajujta ricurca. Chaipimi chai huarmiguca nirca hace tres años Italiapi causajpimi chai Bibliagutaca testigocuna carahuarca nishpa. Pero pandemiamandami Alemania llactaman rina chayarcanchi chaimandapachami testigocunamanda nimata na yachashcanichu nishpa parlarca. Chai huarmiguhuan parlashpa catita ushangapami, panicunaca número de telefonota japirca y paicunapa numerotapash curca. Shinallata reuniongunamanbashmi chai huarmigutaca invitarca. Ishcai punllacuna jipaca chai huarmiguca paipa ishcandi huahuacunandimi reunionman rishcarca. Chaipimi cutin Bibliata estudiai ushachun chai huarmiguhuan arreglocunata rurarca.

Manuel y Karol Gastelum huauquipanicunaca mam shimita parlaj pushtupimi precursor especialcuna can. Chai pushtupi predicanajujpimi shuj ali ali señoraguca paipa huasiman paicunataca invitarca. Chai señoraguca Taita Diospa shutitaca na rijsishcarcachu. Chaimi paicunaca Cushilla causapashunchi libropi lección 4​manda parlarca, chai leccionbica “¿Taita Diosca pita can?” nijuj tematami parlajun. Chai huarmiguca paipa propio Bibliapi Isaías 42:8​ta liishpa Diospa shuti Jehová cajta ricushpaca ashta manllarishcami quidarca.

Chai huarmiguca huacaitapash huacashpami, Bibliata charinallaca na suficientechu cashca, Taita Dios munashcashna causangapaca Bibliata yachajunami minishtirishca cashca nircami. Chai leccionda estudiai tucuchishca jipaca chai huarmiguca ninandami agradicirca y shinallata imata yachajushcata ñuca cusagumanmi parlasha nircami. Manuel y Karolca chai huarmiguman Bibliata yachachishpa catingapaj tigramushunmi nishpa quidarca.

Yokohama llactapi Nukamori shuti huauquipanicunaca predicanajushpami shuj huasipa intercomunicadorta timbrarca. Chaimi shuj huarmi contestarca. Chaica paicunaca testigo de Jehovacunami canchi nircami. Shina nijpimi chai huarmiguca ashaguta shuyapaichi nirca. Shina nishca jipagullami punguta pascashpa “testigo de Jehovacuna ñucata visitahuachunmi shuyajurcani” nirca.

Chai huarmiguca Nagasaki llactapi causajushpami Bibliata estudiai callarircani pero pandemiamandami Yokohama llactaman causangapaj shamurcani nishpami parlarca. Shinapashmi paica Zoombi Bibliata estudiashpa catijushcarca. Justo chai semanami paita Bibliata yachachijuj paniguca nishcarca: “Septiembre quillapimi shuj campaña especial tiagrin y testigocunaca canba huasiman chayamungami” nishpa. Chaimi chai huarmiguca jaicata testigocuna paita visitaj shamushcamandaca sorprendida carca. Paica reuniongunaman ringapaj y Bibliata estudiashpa catingapami munani pero cunanga en personami estudiangapaj munani nircami.

Testigo de Jehová shuj cusahuarmimi shuj huarmiguman estudio biblicota ofrecirca. Chaimi chai huarmiguca hace añosmi testigocunahuan Bibliata estudiajurcani y reuniongunamanbashmi rin carcani nirca. Pero unaitami testigocunahuanga na parlashcarca y Bibliapi mandashcashna na causajuimandapashmi pinganayachishpa testigocunataca na mascashcarca. Chai huarmiguca chaicunata parlashpami huacai callarirca. Chaimi chai cusahuarmica Salmo 10:17​ta liishpa Jehová Diosca candaca na cungashcachu nishpa intindichirca. Shinallata Jehová Dios munashcashna causangapaj munashcamandami chai huarmigutaca felicitaitapash felicitarca. Shinami chai huarmiguca cutin Bibliata estudiai callarirca. Y 16 añosta charij paipa churipashmi Bibliata estudiangapaj munarca.

Cayandi punlla huauquipanicuna tigramujpica, chai huarmiguca paipa churigundimi estudiangapaj ña shuyanajushcarca. Cushilla causapashunchi folletopa lección 1​ta estudiashca jipaca fin de semana reunionmanmi paicunataca invitarca. Y paicunaca chai reunionmanga rircami. Cunanga chai huarmiguca paipa churigundimi Bibliata estudiashpa y reuniongunaman rishpa catingapaj munan.

Ramón shuti huauquica huasin huasin predicangapaj llujshishca primer punllaca, Diospa Gobiernomanda ali villaicunata pihuanllapash compartingapaj ayudahuai nishpami Jehová Diostaca mañashcarca. Primer huasiman chayajpica shuj señorami pi cashcata ricungapaj pungutaca ashagutalla pascarca. Huauqui Ramonga cushilla saludashpami paipa shutitapash villarca. Shina parlajujpillatami chai señoraca cashna nirca: “Ashta ansiami testigocuna visitangapaj shamuhuachun shuyajupashcani. Taita Diostaca testigocuna visitaj shamuhuachunmi ninanda mañajushcarcani” nishpami parlarca.

Chai señoraca hace huaquin huatacunami testigocunahuan parlashcarcani y reunionmanbash shuj viajegutami rircani nishpami villarca. Pero shuj ladoman causangapaj rishpami testigocunamanda ñana imatapash yacharca. Chaimi huauqui Ramonga pandemiamandami huasin huasinga ñana predicanajushcanchichu nishpa villarca. Chai jipami Salmo 37:29​ta liishpa Bibliata imasha yachachinajushcata ricuchirca. Chaimi ñapash chai señoraguca Bibliata estudiangapaj munapanimi nirca. Shina nijpimi huauquica shuj panigu chai señorata visitachun arreglocunata rurarca.

Shina pasashca jipami huauqui Ramonga cashna nirca: “Bibliamanda uyangapaj munaj gentecunapaman chayachun Jehová Diospash, angelcunapash ayudanajujtaca seguromi cani” nishpa.

Kentucky llactapimi Katelyn Thompson paniguca shuj huasiguman quimirishpa cartacunata churana buzonbi Bibliamanda huaquin textocuna escribishca tiajujta ricurca. Shinallata jardinbipash “Jesusca candaca juyanmi” nijuj uchilla letrerogu tiajujtapashmi ricurca. Punguta huactajpica shuj huarmigumi llujshirca. Chaimi Katelynga paipa shutiguta villashpa, pandemiamandami testigocunaca vecinocunata huasin huasin predicaitaca na ushashcarcanchi nishpa parlarca. Pero cartacunata escribishpa y telefonopi cayashpami gentecunataca animanajushcanchi nishpapashmi parlarca. Chai jipami chai paniguca alillachu cashcangui y familiapash alillachu cashca nishpami tapurca. Chaimi chai señoraguca ñuca taitaca pandemiapimi huañurca nishpa parlarca. Pero chai tiempopimi huaquin cartacunata chasquircani y minishtishca tiempopipacha Taita Dios ayudahuajushcata cuenta japircani nirca. Chaimi paniguca canba taita huañushcata yachashpaca ninandami llaquirini nirca. Shinami Cushilla causapashunchi folletopa lección 2​ta chai huarmiguhuanga yachajurca. Chai leccionbi tiashca textocunata liishpami huañushcacuna cutin causarinamanda ashtahuan parlarca. Chaimi chai huarmiguca huacai huacai justo cunanmi ñuca taita huañushcamandaca ña shuj huata pactarijun nirca. Chai jipaca chai huarmiguca paniguman paipa teléfono numerotapash curca y visitangapaj shamuhuanguilla nircami. Chai jipallami chai huarmiguca paniguman shuj mensajeta cachashcarca. Chai mensajepica cashnami nijurca: “Cunanbachami animachun minishtijurcani, pagui shamushcamanda”.

Huasin huasin predicaciondapash y estudio biblicocunata ofrecingapaj campañatapash Jehová Dios bendiciajujtaca tucui shunguhuanmi cripanchi. Cai obrata Jehová Dios bendiciashpa catinatapash seguromi capanchi (Juan 4:35).