24 Febrero de 2022 tutamandapica ushashcata bulla uyarijpimi rijcharircani. Tamiajujpimi rayocuna huacajun yashpa pensarcani. Shinapash bomba urmashpami chashna bullayajushcarca.

Ñuca huasica Mariúpol llactapimi carca. Ñuca huasimanda llujshishpa rinami cani yashpa pensarircani. Chaimandami cayandi punllaca ñuca abuelita Irina maipi causajuj pushtuman rircani. Ñuca primoca ña chaipimi cashcarca ñuca mamitaca jipallami chayamurca. Shuj tiempotami chaipi pacajushpa quedarcanchi. Shinapash huaquin punllacunatami sotanopi puñuna tucurca.

Shuj viajeca sotanopi pacajushca caurasmi ñucanchi huertapi shuj bomba urmamurca. Bomba tujyajpica ninandami manllarircani chaimi Jehová Diostaca tucui shunguhuan mañarcani. Ñucanchi abuelitapa huasipi causana na seguro cashcata ricushpami ñucanchi causajushca llactaman tigrarcanchi. Ñucanchi llactamanda llujshishpa rita ushangapaj ayudahuai nishpami Jehová Diostaca rogashpa mañarcani.

4 de marzo tutamandatami Mariúpol llactamanga chayarcanchi. Shinapash chai ciudad vichashca caimandami shuj trenllapash na tiarca. Chaimandami 10 punllacunata chai llactapa teatropi ashtaca gentecunahuan pacajushpa quidarcanchi. Ashtaca gentecuna tiaimandami sotanopi puñunapaj randica primer pisopi puñurcanchi. Chai pushtu mapa mapa cashcamandami saludpaca nali carca. Shinallata micunata, cunujlla yacuta tarinaca dificilmi carca. Chaimandami huaquin horascunata filapi shuyana carcanchi.

Shuj punllaca teatro ladollapimi shuj bomba tujyarca. Chaimandami bomba tujyashpaca ventanapa vidriocunataca tucuillata faquirca. Chaimi chiri yapata ucuman yaicujurca.

Chashna llaquicunapi caurasmi Jobpa causaimanda pensarina ayudahuarca. Bombacuna tujyajta uyashpaca gentecunaca yapatami manllarin carca. Ñucaca chashna pasajujrasca Bibliapica Jobpa causaimandami liijun carcani. Chaimi tranquila sintirin carcani. Teatropi Jobpa ladopi tiajushpa paiman cai shimicunata nijushcatashnami pensarircani: “Cunansi quiquin imashina sintirishcataca alimi intindini”. Jobca paipa familiata paipa charishca cosascunatami tucuilla chingachishcarca. Ñucaca cosascunatallami chingachishca carcani ñuca familiapash ñucahuanmi carca. Ñucanchi saludpash alimi carca chaicunapi pensarinami ama yapata preocuparichun ayudahuarca.

14 de marzotami huaquin gentecuna shuj llactaman ri ushashcata yachaj chayarcanchi chaimi ñucanchipash shuj llactaman rinata decidircanchi. Teatropi cashca huaquin gentecunahuanga chai ciudadmanda llujchichun shuj ayudatami tarircanchi.

Shuj ciudadman apajcunaca 20 carrocunami carca. Ñucanchi rijushca furgunetapica 14 pura caimandami junda junda rircanchi. Ñucanchi rinajujrasca caiman chaimanmi bombacunaca urmanajurca. Rinajushpaca Jehovata mañanataca na saquircanichu. Mariúpol llactamanda llujshishpaca bombata na sarushpalla yalita ushashcamandami carrota manejaj choferca huacarca. Teatromanda llujshishca ishcai punlla jipallami teatrota bombardiashcatami yachaj chayarcanchi chaipica más o menos 300 gentecunami huañurca.

Zaporiyia llactamanga 13 horas cunan jipallami chayarcanchi. Cayandi tutamandaca Leópolis llactaman chayangapami shuj trenda japircanchi. Trenba vagonbica chuscu purallami rina can shinapash ñucanchicunaca 16 purami rinajurcanchi. Chaimandami yapata calor calor carca. 16 de marzotami Leópolis llactamanga chayarcanchi. Chaiman chayajpica turiñañagucunaca cushijushpami chashquirca, chuscu punllataca Salón del Reinopimi quidarcanchi. Turiñañagucuna juyaihuan tratajpimi cushijuimanda huacarcani. Paicunaca Jehovapa bendicionmi cashca.

19 de marzotami Ucrania llactamanda rinata dicidircanchi. Polonia llactamanga ñuca abuelita, ñuca mamita, ñuca primomi rircanchi. Chaipipashmi turiñañagucunaca juyaihuan chashquirca. Tucui ñucanchi minishtirishcagucunata carashpami ayudarca.

Aunque 19 añoscunatalla charishpapash llaquicunata nara charishpallata ñucanchi feta shinlliyachina cashcatami yachajushcani. Shinlli feta charinami llaquicunata aguantachun ayudan. Guerra nara tiauras Bibliamanda na ali yachajushca cashpaca chai llaquicunata aguantanaca dificilmi canman carca.

Jehová ñucanchipa Taita caimandami juyaihuan cuidan. Chai llaquicunapi cauras Jehová ñuca ali lado maquimanda japishpa imata ruranata ricuchishcatashnami sintircani. Jehová ñucata cuidashcamandaca imashna agradicitapash na ushanichu (Isaías 41:10).