YAĆHACHICUY 34
¿Imanuypam Jehovata cuyaśhanchicta licachichwan?
Bibliata estudiayta allaycuśhayquipita mastaćh Jehovata cuyanqui. ¿Munanquimanchun Jehovawan amistanïqui masta tacyaśha cananta? Chaynü captin’a amta cuyaśhunquim, ñatac allictam cuidaśhunqui. Pero, ¿imanuypam licachinquiman Diosta cuyaśhayquita? Chaypimi canan yaćhaśhun.
1. ¿Imanuypam licachiśhun Jehovata cuyaśhanchicta?
Diosta cäsucuptinchicmi licachiśhun cuyayninchicta (liguicuy 1 Juan 5:3). Jehová manam munanchu mana ganasniyü cäsucunanchicta. Aśhwanpa, pay munan ‘llapan śhun’unchicwan cäsucunanchictam’ (Romanos 6:17). Chayurá, Diosta cuyaśhanchicpïmi lluy imacunaćhupis cäsucuśhun. Cay librupa 3 partinćhu ñatac 4 partinćhu yanapamäśhun licachinanchicpä Jehovata cuyaśhanchicta: cäsucul mandamäśhanchicta ñatac ćhïnicul pay ćhïnicuśhanta.
2. ¿Imapïmi sasa canman Jehovata cuyayninchicta licachinapä?
Bibliaca nishannü ‘allin nunacunaca imaymana llaquicunactam pasalcan’ (Salmo 34:19). Imperfecto captinchicmi sasa allin lulayca, ñatacmi illayninchic pishiptin, juyu nunacuna ñacachimäptinchic ñatac sasacuna pasamaptinchic. Chaycuna pasamaptinchicmi Jehovata cäsucuy sasa canman. Pero callpanchacuptiqui Jehovata cäsucuyta, licachinquim allicta cuyaśhayquita ñatac lealtänïquita. Payman leal captiqui, Jehová manam nunca caćhaycuśhunquichu (liguicuy Salmo 4:3).
MASTA YAĆHAYCUŚHUN
Yaćhaśhun imapïmi Jehová munan cäsucunanchicta, yaćhaśhuntacmi imam yanapamäśhun payta servinanchicpä lluy śhun’unninchicwan.
3. ¿Imapïmi Jehovata cäsucunanchic?
Bibliami willamanchic Satanás yan’alcunacta limaśhanta Jobpi, chaynümi ya’anchiccunapipis Satanás yan’alcunacta limayan. Liguiśhun Job 1:1 ñatac 1:6–2:10, ñatac limaśhun caypi:
-
Satanás nishannü, ¿imapïmi Job cäsucula Jehovata? (Liguiśhun Job 1:9-11).
-
¿Ima ninmi Satanás lluy nunacunapi? (Liguiśhun Job 2:4).
Liguiśhun Job 27:5b ñatac limaśhun caypi:
-
¿Imanuypam Job licachila Jehovata lluy śhun’unwan cuyaśhanta?
Job lluy śhun’unwanmi sirvila Jehovata cuyaypï masqui sasacunacta pasalpis.
Jehovata serviptinchic lluy śhun’unchicwan, licachinchic payta cuyaśhanchictam.
4. Jehovata cushichiśhun
Liguiśhun Proverbios 27:11 ñatac limaśhun caypi:
-
¿Imanuymi Jehová sienten śhun’uyquipi cäsucuptiqui?
5. Callpanchacuy Jehovata lluy śhun’uyquiwan servinayquipä
Jehovata cuyaśhanchicmi yanapamanchic juccunacta paypi willacunanchicpä masqui sasacunacta pasalpis. Licaśhun VIDEUCTA ñatac limaśhun caypi:
-
¿Sasachun ampä Jehovapi willacuy juccunaman?
-
Videucta licaśhanchicnü, ¿imanuypam Grayson manchacuyninta vencila?
Jehovata lluy śhun’unchicwan servinanchicpä cuyananchicmi pay cuyaśhanta ñatac ćhïninanchicmi pay ćhïniśhanta. Liguiśhun Salmo 97:10 ñatac limaśhun caypi:
-
Caycama yaćhaśhayquićhu, ¿imacunactam Jehová cuyan? Ñatac, ¿imacunactam ćhïnin?
-
¿Imanuypam yaćhanqui allincunata cuyayta ñatac mana allincunata ćhïnita?
6. Jehovata cäsucuyca allinmi
Jehovata cäsucuyca allininchicpämi. Liguiśhun Isaías 48:17, 18 ñatac limaśhun caypi:
-
Jehová yaćhanmanchun, ¿ima ya’anchicpä allin caśhanta?
-
¿Imanuypam canancama yanapaśhulanqui estudiaśhayqui Bibliapi ñatac Jehovata lisiśhayqui?
WAQUINCUNA NIPÄCUN: “Dios manam imactapis ucunchu imacta lulaptipis”.
-
¿Ima textuctam Bibliapi liguicäpunquiman yaćhachinayquipä lulaśhanchiccuna llaquichinchun o cushichinchun Jehovata?
IMACTAM YAĆHALUNCHIC
Jehovata cäsucuptiqui ñatac sasacunacta pasalpis, payta śhun’uyquipi serviptiqui licachinquim cuyaśhayquita.
Yalpaśhun
-
¿Imactam yaćhachiśhunqui Jobpa lulaśhancuna?
-
¿Imanuypam licachinqui am Jehovata cuyaśhayquita?
-
¿Imam yanapaśhunqui Jehovata servinayquipä lluy śhun’uyquiwan?
MASTA YAĆHANAYQUIPÄ
¿Imam yanapamäśhun Jehovata servinanchicpä lluy śhun’unchicwan ñatac cäsucunanchicpä punta-lï-yaśhacunata? Licay videucta.
¿Imacunactam Satanás nila Jobpi? Chayta yaćhanayquipä liguiy.
Urucunapis Jehovata cuyal cäsucunmanmi. Licay videucta.
¿Imanuypam wamla-walaśhcunapis Jehovata sirvipäcunman masqui sasa problemancuna captinpis? Licay videucta.
