1, 2. Imatata tapurina angui, imahuata chita tapurina angui.

BIBLIAMANDA yachashaga ashca runaguna Diosta adoranchimi nishahuas, Dios mana gustashcata rasha causashcata yachashcanchi (2 Corintios 6:​17). Chiraicu, Jehovaga “Atun Babilonia” mana sirtuta yachachic mana ali religionmanda llucshichi nin (Apocalipsis 17:5; 18:​2, 4). Canga imata rana munangui. Caran shucmi imata ranata anllana an. Chimandas, caita tapurina angui: “Dios munashca shinachu adoranata munani o ñuca munashca shina”.

² Can panda religionda saquishca ashaga, alitami rashcangui. Chasna ashahuas, mana ali religion ranagunata camba shungu ucuibi manachari huin saquishcanguichu. Caimanda masta yachashun. Astahuanbas, Jehova mana gustashcata imahua mana rana ashcata yachashun.

3. a) Maican runagunaraicuga imahuata santoguna illac adoranaga sinzhi an. b) Santogunata adoranamanda Biblia imata nin.

³ Diosta adorangahua, maican runagunaga ashca huatagunatami santogunata, altargunata charishcauna. Diosta santoguna illac adoraushaga, manachari alitachu sintiringui. Chasna ashahuas, Jehovaga paita imasa adoranata yachachi tucunchi. Jehovaga paita adorangahua santogunata utilizachun mana munanzhu nisha Biblia  pasacta intindichin (Hechos 17:​29, 30 leipai; Salmo 115:​4-8; Isaias 42:​8; 1 Juan 5:​21).

4. a) Imaraicuta huañushca aillugunata mana adorana anchi. b) Jehovaga Israelitagunata huañushcagunahuan cuintanacunata imahuata mana munachira.

⁴ Maicangunaga huañushca runaguna ama turmintarinauchun nisha misata rangahua paganaun. Huañushcagunamanda imatas ranaun. Huañushcagunatachari adoranaun. Chasna ashahuas, huañushcagunaga mana imatas rana ushashcata, mana yanapana ushashcatas yacharanchimi. Chasnallata shuc partima mana causasha catinaunzhu. Chimandahuas, huañushcagunahuan cuintanacunaga manzhanaita man. Demoniogunami huañushca aillu shina uyaricta rimasha quirichina munanaun. Chiraicumi, Jehovaga Israelitagunata huañushcagunahuan ama cuintanacunguichichu nira. Chasnallata, demonioguna rashcata ama ranguichichu nira (Deuteronomio 18:​10-​12; nota 26 y 31​ta ricui).

5. Diosta adorangahua santogunata utilizanata, huañushcagunata adoranatas saquingahua imata yanapai tucungui.

⁵ Diosta adorangahua santogunata utilizanata, huañushcagunata adoranatas saquingahua imata yanapai tucungui. Bibliata leisha Jehova imata pinsashcata yuyanami yanapai tucungui. Jehovaga santogunata, huañushcagunata adoranatas “iridsata” shina ricun (Deuteronomio 27:15). Jehova munashca shina yuyangahua, pai munashca shina adorangahua caran punzha Jehovata mañai (Isaias 55:​9). Mana alita rasha adoranata saquingahua Jehovami yanapai tucungui.

6. Jesus pagarishcata yuyaringahua imahuata 25 de diciembreta anllanaura.

⁶ Navidadga mundu intiruibi istaushca man, ashca  runagunaga Jesus pagarishca punzha man ninaun. Chasna ashahuas, Navidadga llulla panda religionguna surcushca man. Shuc diccionarioga Roma llactamanda yanga diosta adoraccuna 25 de diciembrebi indi llucshishcata istac anaura nin. Religionda pushaccunaga, yanga diosta adoraccuna cristiano tucuchun munanaura. Chiraicumi, Jesus 25 de diciembrebi mana pagarishca acpihuas chi quillaibi istanata saquinaura (Lucas 2:​8-​12). Jesusta caticcunaga Navidad istata mana rac chanaura. Los orígenes sagrados de las cosas profundas, nishca libroga ninmi, Jesus huañushcamanda 200 huata huasha, “Jesus pagarishca punzhata mana pihuas yachac chanaura”. Chimandahuas, Navidad istaga Jesus huañushcamanda 300 huata huasha llucshira.

7. Jesusta sirtu caticcunaga imahuata Navidadta mana istanaun.

⁷ Ashca runagunaga yanga religionguna navidad istata surcushcata yachanaunmi. Astahuanbas, Navidad istaibi aillugunahuan micuna, regalota cuna mana ali actas yachanaunmi. Chimandahuas, Inglaterra llactaibi, maican Norteamerica llactagunaibihuas Navidad istata yanga religionguna surcushcamanda istanata saquichinaura. Navidadta tucui istac runagunatami castigac anaura. Chasna ashahuas, runagunaga unaima Navidadta cuti istai callarinaura. Jesusta sirtu caticcunaga imahuata Navidadta mana istanaun. Tucui paiguna rashcaibi Diosta casuna munashami Navidadta mana istanaun.

8, 9. Jesusta punda caticcunaga imahuata cumpleañota mana rac anaura.

⁸ Astahuanbas mundu intiruibi cumpleañota ranaun. Jesusta caticcunaga cumpleañota rana chanchi. Bibliaga  Jehovata mana adorac runaguna cumpleañota rac ashcata riman (Genesis 40:20; Marcos 6:​21). Cumpleañoibiga yanga dioscunata adorac anaura. Chiraicumi, Las cosas nuestras de cada día nishca libroibi, Jesusta punda caticcuna “yanga religionmanda ñaupa costumbreguna nic anaura”.

⁹ Romanoguna, griego runagunaga huahua pagarishcaibi shuc samai o espiritu aun nic anaura. Chasnallata, cai espiritu cai runata huiñai cuiran nisha quiric anaura. La tradición de los cumpleaños nishca libroibiga “Cumpleañota rauc runata dioscuna cuirangami nisha, Jesusta mana caticcuna istac anaura” nin.

10. Jesusta cunan caticcunaga imahuata cumpleañota mana ranchi.

¹⁰ Panda religionguna istashcata Jehova Diosca alitachu ricun (Isaias 65:​11, 12). Jehovaga mana alitachu ricun. Chiraicumi, cunan Jesusta caticcunaga cumpleañota yanga religionguna surcushca istagunata mana istanchi.

11. a) Maican runagunaga yanga religion surcushca istata imahuata rac anaura. b) Cambaraicu imata mas balishca ana an.

¹¹ Maican runagunaga Navidad ista, shuc istagunata yanga religionguna surcushcata yachashahuas, istanata mana saquinaunzhu. Aillugunahuan pasangahua ista man ninaun. Canga chasnachu yuyangui. Ailluhuan cushilla pasanaga ali man. Chasnallata, Jehovami ailluta rara. Chiraicumi, ñucanchi aillugunahuan alita apanacuchun munan. Chasna ashahuas, Jehovahua amigo anami ñucanchiraicu mas balishca ana an. Astahuanbas, yanga religion surcushca istagunata rasha ailluta cushiyachina randiga, Jehovata  cushiyachina munanchi. Chiraicu, apostol Pablo nira: “Señor Jesucristo munashcata ranata yuyarina anguichi” (Efesios 5:10).

12. Ima tunu istagunatata Jehova mana gustan.

¹² Ashca runagunaga ista maimanda callarishca acpihuas mana imananzhu ninaun. Sacpis, Jehovaga mana chasna yuyanzhu. Paiga, yanga religionmanda shamuc istagunata mana gustanzhu. Astahuanbas, runagunata yapa balichinata, banderata cungurinata mana gustanzhu. Chimandas, Egiptomanda runagunaga yanga dioscunata adorasha istac anaura. Egiptomanda llucshishca huasha Israelitagunaga chi llactaibi yanga diosta adorana istata rasha “Jehovaraicu ista” man nisha shutichinaura. Jehovaga paiguna chita rashcamanda castigarami (Exodo 32:​2-​10). Ñucanchiga apostol Pablo nishcata rana anchi. Paiga nirami: “Ima iridsatas ama llangaichichu” nisha (2 Corintios 6:17 leipai).

13. Mana ali istagunaibi participanata saquishaga imata tapuringuima.

¹³ Mana ali istagunaibi participanata saquishaga, caitachari tapuringui: “Ñuca trabajomanda compañeroguna, imaraicuta Navidad istaibi mana participangui nicpiga imata rasha. Shuc runa Navidadpi regalota cucpi imata rasha. Ñuca huarmi o ñuca cari, Dios mana gustashca istata rashun nicpiga imata rasha. Mana ali istagunata o cumpleañogunata mana istashcamanda, ñuca huahuaguna mana llaquirichun imasata yanapasha”.

14, 15. Feliz Navidad, feliz año nuevo nicpi, mana ali istaibis regalota cucpi imata rana angui.

¹⁴ Imata rimanata, imata ranata ñaupata alita pinsana  anchi. Chimandahuas, shuc runa istaibi feliz Navidad o feliz año nuevo nicpiga “pagrachu” nina ushangui. Astahuanbas, shuc runa imaraicuta istaibi mana participangui nicpiga, imahua mana participashcata intindichina ushangui. Chasna ashahuas, mana piñachisha, llaquihuan, respetohuan rimangui. Bibliaga ninmi: “Tucui uras alita rimac runa aichi, [...] cachita churashca shina ali uyanalla shimita rimaichi [..] ima tunu runahuas tapucpiga can tucui yuyaihuan cuintai” (Colosenses 4:​6). Runagunata pasiasha regalota cunata gustashahuas, cai istagunaibi mana cuc chani nina ushangui.

¹⁵ Mana ali istaibi shuc runa regalota cucpiga imata rana angui. Bibliaga mana ninzhu imagunallata mana rana ashcata. Chasna ashahuas, ucha illac ali yuyaita charina anchi (1 Timoteo 1:​18, 19). Regalauc runaga chi istaibi can mana participac ashcata manachari yachanzhu. Manashaga ningachari: “Cai istaibi mana participac acta yachashahuas cai regalota cuna munani” nisha. Regalota apina o mana apinata canllami alita ricuna angui. Chasna ashahuas, can rashcamanda cungailla sintiringahua alita yuyasha rana angui. Ñucanchi rashcagunahuan Jehova Diosta cushiyachinata munanchi.

16. Mana ali istata camba aillu rasha nicpiga imata rana angui.

¹⁶Mana ali istata camba aillu rasha nicpiga imata rana angui. Paigunahuan ama rimanacunguichu. ­Runagunaga imata ranata paigunallata anllanaun. Llaquihuan tratasha canda respetachun munashca shina, camba aillu rashcata respetapai (Mateo 7:​12 leipai). Chasna ashahuas, camba aillu chi mana ali istaibi auchun nicpiga imata rangui. Alita rangahua istama mana rishallata Jehovata yanapahuai ningui. Imahua  istaushcata musiangahua alita ricungui. Jehovata tucui uras casunata munanchi.

17. Shuccuna mana ali istata raucpi, camba huahuaguna mana llaquirichun imata rana angui.

¹⁷ Shuccuna mana ali istata raucpi, camba huahuaguna mana llaquirichun imata rana angui. Paiguna gustashcata imasaibi rasha cushilla pasachina ushangui. Astahuanbas, cungaimanda shuc regalota cuna ushangui. Chimandahuas, huahuagunahuan pasana, llaquihuan tratanami astahuan mas balishca an.

18. Imahuata Diosta sirvic runagunahuan tandarina anchi.

¹⁸ Jehova Diosta cushiyachina munashaga mana ali religionmanda, paiba costumbregunamandas caruyana manchi. Chimandahuas, ali religion rashcata rana anchi. Caita pactachingahuaga, Diosta sirvic runagunahuan caran semanaibi tandarina anchi (Hebreos 10:​24, 25 leipai). Diosta adorangahua tandarinaga balishca man (Salmo 22:22; 122:​1). Tandarinaibiga Diosta sirvisha catingahua ursata apinchi (Romanos 1:​12).

19. Imaraicuta Bibliamanda can yachashcata shuccunama cuintana angui.

¹⁹ Ali religion rashcata rangahuaga Bibliamanda can yachashcata shuccunata cuintana mangui. Ashca runagunaga cai mundui llaquigunata ricusha llaquirisha causanaun. Chasna llaquirishca runagunata ricsinguichari. Chasna acpiga, shamungarauc punzhaibi ali gustu causanamanda cuintai. Diosta sirvic runagunahuan tandarisha, shuccunahuan Bibliamanda can yachashcata cuintashaga mana ali religionmanda, paiba costumbregunamandas anchurinata munangui. Jehova Diosta adorangahua esforzaricpiga, paiga bendiciangami. Astahuanbas cushimi causangui (Malaquias 3:​10).