1. Cai librota estudiashca huasha imatata tapurina ushangui.

CAI LIBROIBIGA Dios huiñai causaita cusha nishcata, huañusha ima tucushcata, huañushcaguna causarinatas yachashcanchi (Eclesiastes 9:​5; Juan 5:​28, 29; Apocalipsis 21:​3, 4). Jehovahua testigogunahuan ña tandariunguichari. Paiguna sirtu religion ashcata yachanguichari (Juan 13:35). Jehovahuan ali amigo tucusha, paita sirvishami nishcanguichari. Chiraicu tapuringuichari: “Diosta sirvingahua ima masta rana ani” nisha.

2. Etiopiamanda runaga imahuata bautisarinata munara.

 ² Jesuspa timpuibi Etiopiamanda runa casna tapurira. Jesus huañushcamanda causarishca huasha, paita catic Felipe Etiopiamanda runata Jesus Mesias ashcata yachachira. Cai runaga Felipe yachachishcata uyasha cushiyasha nira: “Cai shuc yacu aun, manachu bautisarinata ushani” (Hechos 8:​26-36).

3. a) Jesusca paita caticcunata imatata nira. b) Imasata runata bautisana an.

³ Bibliaga nin Jehovata sirvina munasha bautisarina man nisha. Jesusca paita caticcunata casna nira: “Ñucata quirisha catic tucunauchun nisha yachachisha bautisanguichi” (Mateo 28:19). ­Jesusllata bautisarisha ricuchira. Paitaga yacuta mana umai talinaurachu, astahuan yacu ucui tun yaicuchisha bautisarira (Mateo 3:16). Cunan punzhaibiga, Jesusta caticta bautisaushaga yacuibi tun yaicuchisha bautisana an.

4. Bautisarishaga imatata ricuchinchi.

⁴ Bautisarishaga sirtu pacha Diospa amigo tucusha, paita sirvina munashcata shuccunama ricuchinchi (Salmo 40:​7, 8). Chiraicu tapuringuichari: “Bautisaringahuaga imatata rana ani”.

5. a) Chara mana bautisarishallata imatata rana angui. b) Imahuata Diosmanda yachangahua tandarinama rina balishca an.

⁵ Chara mana bautisarishallata, pundaga Jehovata, Jesusta ricsina mangui. Bibliata estudiashaga ña ricsi callarishcanguimi (Juan 17:​3 leipai). Astahuanbas, Bibliaga nin Dios ima munashcata ‘mas  alita yachana’ man nisha (Filipenses 1:​9). Jehovahua testigoguna tandarinama rishaga Jehovahua ali amigo tucungui. Chiraicu tandarinama mana pishina angui (Hebreos 10:​24, 25).

6. Bautisaringahua Bibliamanda tucuitachu yachana angui.

⁶ Chasna acpihuas, bautisaringahua Jehovaga Bibliata huin yachana mangui nisha mana ninzhu. Etiope runaga Jehovamanda mana huin yachashallata bautisarira (Hechos 8:​30, 31). Jehovataga mana ima uraspas huin ricsishunzhu (Eclesiastes 3:11). Chasna acpihuas, bautisaringahuaga Biblia yachachishcata intindisha Dios imata gustashcata, imata mana gustashcata yachasha pactachina mangui (Hebreos 5:12).

7. Bibliata estudianaga imasata yanapai tucushcangui.

⁷ Bibliaga nin, “Diosta mana quirishaga paita cushiyachinata mana ushanzhu” (Hebreos 11:​6). Bautisaringahuaga Diosta sirtuta quirina manchi. Corinto llactamanda ñaupa runaguna Jesusta caticcuna yachachishcata “quirisha bautisarinaura” (Hechos 18:​8). Chasna shinallata, Bibliata estudianaga Dios cungaraushcata quiringahua, Jesus ñucanchi uchamanda, huañuimanda quishpichishcata quiringahua yanapashca (Josue 23:14; Hechos 4:12; 2 Timoteo 3:​16, 17).

8. Diospi mas quirishaga imatata rangui.

⁸ Bibliamanda yachasha catisha, camba causaibi imasa yanapashcata ricusha Diospi mas quiringui. Astahuanbas, can yachashcata shuccunamas  cuintana munanguimi (Jeremias 20:​9; 2 Corintios 4:13). Chasna acpihuas, pitata cuintangui.

9, 10. a) Can Bibliamanda yachashcata pigunatata cuintana ushangui. b) Bibliamanda cuintana munashaga imatata rana angui.

⁹ Can Bibliai yachaushcata aillugunata, amigogunata, escuelaibi, tarabanaibi cuintanata munanguichari. Chiga ali man. Chasna ashahuas, cuintaushaga llaquihuan, respetohuan rimangui. Huasha congregacion muntunhuan Bibliamanda cuintanata ushangui. Testigogunahuan Bibliamanda cuintangahua llucshina munashaga canda estudiachicta rimangui. Paimi can Biblia munashca shina causauta ricunga. Chi huasha, canhuan, canda Bibliamanda estudiachic runahuan, ishcai ancianohuan tandaringuichi.

¹⁰ Tandarishaga, Biblia yachachishcata can quirisha pactachiushcata musiangahua canhuan cuintanacungauna. Chimanda, can sirtu Jehovahua testigo tucuna munashcata ricungauna. Cuirac ancianogunaga congregacion muntunbi tucuigunata cuiranaun, candahuas cuiranata munanaun. Chiraicu, paigunahuan cuintanacunata ama manzhaichu (Hechos 20:28; 1 Pedro 5:​2, 3). Cuintanacushca huasha, cuirac ancianoguna congregacionhuan Bibliamanda cuintangahua llucshina ushashcata o mana ushashcata rimangauna.

11. Chara mana Bibliamanda cuintangahua llucsishallata, imahuata cambiana angui.

¹¹ Cuirac ancianogunaga Bibliamanda cuintangahua chara mana llucshishallata, camba causaita cambiana mangui ningaunachari. Caita rangahua  esforzarina mangui. Bibliamanda cuintaushaga Dios partimanda rimanchi. Chiraicu, Diosta balichisha pai munashca shina causana angui (1 Corintios 6:​9, 10; Galatas 5:​19-21).

12. Imaraicuta tucuiguna aripintirina anchi.

¹² Chara mana bautisarishallata Bibliai apostol Pedro nishcata rana angui. Paiga nirami: ‘Ucha rashcata llaquirisha, Diospagma bulltiaichi canguna uchata anchuchi tucungahua’ (Hechos 3:19). Chiraicu ñaupa mana ali rashcata shungumanda aripintirina angui. Por ejemplo, mana cadsarashallata huarmihuan, carihuan puñushca ashaga aripintirina mangui. Mana uchata rasha causashca ashahuas aripintirina mangui. Tucuiguna uchayuc ashcamanda Dios perdonanata minishtinchi (Romanos 3:23; 5:12).

13. Bulltiaichi nishaga imatata niun.

¹³ Ñucanchi mana ali rashcamanda llaquirinalla chan. Mana. Apostol Pedroga: “Bulltiaichi” nira. Ñaupa mana ali rashcata saquisha, alita rasha causai callarina angui. Caita yuyai: Mana ricsiushca ñambita riusha, panda ñambita riushcata musiashaga imatata ranguima. Bulltiasha ali ñambita tupanagama mascasha, ali ñambita ri callaringuima. Chasna shinallatami, Bibliata estudiashaga camba causaita cambiana ashcata musiangui. Huashama bulltiashca shina, mana ali ranata saquisha alita rai callaringui.

14. Diosta sirvishami ningahua imatata rana angui.

¹⁴ Astahuanbas chara mana bautisarishallata, Diosta camba causaita cusha sirvishami nisha mañana angui. Diosta sirvishami nishaga paillata adorasha, Diosraiculla causanatami ningui (Lucas 4:8).

15, 16. Imahuata Jehovata sirvinata munangui.

¹⁵ Jehovallata sirvisha causashami ninaga, casarausha huañunagama canhuanmi causasha nina shina man. Casarangarauc cari huarmibi yuyashun. Cariga paihuan casarangarauc huarmita mas ricsisha, chi huarmita llaquisha paihuan casaranata munanga. Casarashca huasha llaquigunata charina ashahuas, huarmita llaquishcamanda paihuan casaran.

¹⁶ Jehovata mas ricsishaga, paita mas llaquingui. Llaquishaga paita sirvingahua imatas saquinguimi. Casna rasha, Diosta huiñai sirvinata munangui. Jesusca paiba discipulogunata nirami: ‘Pihuas ñucata catina munashaga amu munaigunata saquichun’ (Marcos 8:34). Amu munashcata saquisha, Jehova munashcata rasha causana angui. Ña mana can munashcata rana changui. Jehova munashcata mas balichisha causana angui (1 Pedro 4:​2 leipai).

17. Maican runagunaga imahuata mana bautisarinaun.

¹⁷ Maican runagunaga bautisarishca huasha uchaibi urmanata manzhasha mana bautisarina munanaun. Jehovatachari mana llaquichinata  munanaun. O mana bautisaricpiga Diosca mana taripahuangachu ninaunzhari.

18. Bautisarinata mana manzhangahua imata yanapanga.

¹⁸ Jehovata llaquishaga ima manzhaitahuas binsinguimi. Chasnallata, can nishcata pactachingahua Jehovami yanapanga (Eclesiastes 5:​4; 2 Pedro 1:​5, 6). Jehova munashcata pactachina mana sinzhi acta intindingui. Apostol Juan casna nira: “Yaya Diosta llaquinaga pai mandashcagunata pactachina man. Pai mandashcagunaga pactachinata ushanalla man” (1 Juan 5:​3).

19. Imahuata bautisarinata mana manzhana angui.

¹⁹ Bautisaringahuaga huinda alita ranata mana minishtinchichu. Diosca ñucanchi ushashca tupullata raichi nin (Salmo 103:14). Chimandas, alita rangahua Jehovami yanapai tucungui (Isaias 41:10). Biblia nishca shina: “Paillatami ñucanchi ñambita cuscayachinga”. Chiraicu, Jehovaibi tucui shunguhuan quiripai (Proverbios 3:​5, 6).

20. Jehovata sirvishami nisha mañashca huashaga imatata rana angui.

²⁰ Camba causaita Jehovama ña cuna munanguichu. Sashaga Diosta sirvishami nisha mañashca huasha bautisarina ushangui.

21, 22. Canga imasata “runaguna ñaupacpi” quirishcata ricuchingui.

²¹ Jehovata sirvingahua mañashaga ancianogunamanda coordinadorta bautisarinata munani ningui. Cai cuirac ancianomi shuc ancianogunahuan  Bibliamanda can imata intindishcata yachangahua tandachinga. Paiguna can bautisarina ushashcata ricucpiga, Jehovahua testigoguna asambleaibi bautisarina ushanguimi ni tucungui. Asambleaibi, bautisarisha imata ranata intindingahua Bibliamanda yachachishca discursota uyangui. Cai yachachicca tucui bautisariccunata ishcai tapuita ranga. Cai tapuigunata cutichishaga  can quirishcata “runaguna ñaupacpi” ricuchingui (Romanos 10:​10, NM).

²² Chi huasha, bautisaringui. Yacuibi intiru aichata tun yaicuchi tucungui. Bautisarishaga tucui ricuucunata Diosta sirvic tucusha Jehovahua testigo ashcata ricuchingui.

23. Yaya Diospa shutibi, Churi shutibi, Diospa samai shutibi bautisarishaga imata ricuchinchi.

²³ Jesusca paiba discipulogunata nirami: “Yaya Diospa shutihuan, Diospa churi shutihuan, Diospa samai shutihuan bautisanguichi” (Mateo 28:19 leipai). Casna nishaga, Jehova Dioslla mandana ushaita charishcata, Jesus paihua yaya nishcata pactachishcata, Dios munaita pactachingahua paiba samaita utilizashcata quirinchi (Salmo 83:18; Mateo 28:18; Galatas 5:​22, 23; 2 Pedro 1:21).

24, 25. a) Bautisarishaga imatata ricuchinchi. b) Tucuric capituloibi imatata yachashun.

²⁴ Canga mana yangallachu bautisaringui. Yacuibi yaicushaga ñaupa mana ali causaita “saquishcata” ricuchingui. Yacumanda llucshishaga Jehova munashcata rangahua mushuc causai callarin. Chasna rasha, chi urasmanda Diosta sirvic tucushcata ricuchingui. Canga mana shuc runata, shuc organizacionda maicandas sirvisha nishcanguichu. Camba causaita Jehovallata sirvingahua cushcangui.

²⁵ Can Jehovata sirvishami nishcaga Jehovahua ali amigo tucungahua yanapanga (Salmo 25:14). Chasna ashas, bautisarishaga ña quishpirishami nisha mana pinsana changui. Apostol Pabloga quishpiringahua Dios “munashcata rasha causaichi” nisha quillcara (Filipenses 2:12). Bautisarisha paita sirvingahua callaringui. Sashaga, imasata Jehovahua amigo tucusha catinata ushangui. Cai tapuitaga cai libromanda tucuric capitulo cutichinga.