1-3. a) Runa huañucpiga runaguna imata tapurinaun. b) Maican religiongunaga huañushca huasha imata tucunchi ninaunda.

BIBLIAGA nin shamuc punzhagunaibi “huañunahuas illangami” nisha (Apocalipsis 21:​4). Capitulo 5ibi Jesus huañushcamanda huiñai causangaraushcata yacharanchi. Chasna ashahuas chara huañuunchimi (Eclesiastes 9:​5). Chiraicumi tapurinchi: “Huañushaga imata tucunchi” nisha.

² Huañusha ima tucushcata yachanaga ñucanchi aillu, amigoguna huañucpi yanapai tucushun. Huañushcagunaga: “Maibi taunguna, ricui tucunchichu, turmintariunzhu, yanapana ushai tucunchichu, ima urasga ricushunzhu” nishachari yarinchi.

³ Religiongunaga cai tapuita chicanda cutichinaun. Maican religiongunaga, ali runaguna cielota rinaun, mana aligunaga ninama rinaun nisha yachachinaun. Shuccunaga, huañusha espiritu tucusha shuc huañushca aillugunahuan tandarin nisha yachachinaun. Astahuan shuccunaga huañushca huasha Dios taripan, chasnallata shucpa aichaibi yaicusha cuti causarinchi ninaun. Chimandahuas huañushca huasha animal shina tucusha causarinchi ninaun.

4. Religiongunaga huañushcagunamanda imata yachachinaun.

⁴ Religionguna huañushcagunamanda chicanda rimashahuas cadsi tucui religiongunami huañushca huasha causasha catishcata yachachinaun. Chi yachachishcaga sirtu chan.

5, 6. Huañushaga imata tucunchi.

⁵ Jehovaga ñucanchi huañushca huasha ima tucushcata yachanmi. Bibliaibi Jehovaga nin huañucpiga ñucanchi causai chibi tucurin nisha. Huañushaga mana ricunchichu, mana uyanchichu, mana pinsanchichu. Ñucanchi yuyaiguna, ñucanchi causashcaibi imatas rashca yuyaigunahuas tucurinmi. Huañushca huasha mana shuc partibi causasha catinchichu. *

⁶ Rey Salomon nira: “Huañushcagunaga mana ima yuyaillatahuas charinaunzhu”. Chasna acpi llaquinata, piñanata mana ushanaunzhu. Chasnallata Salomonga nirami “tarabana, ima ranata yarina, yachana, intindinahuas seol nishca pistuibiga mana tiyanzhu” (Eclesiastes 9:​5, 6, 10 leipai). Seol nishcaga mana runaguna pinsashca shina chan. Runaguna huañusha samana pistu man. Salmo 146:​4 nin maican huañucpiga “paiba yuyaigunahuas” huañunmi.

7. Jesusca huañunaga imasa tan nirata.

⁷ Jesusca paiba amigo Lazaro huañucpi paita caticcunata nira: ‘Ñucanchi llaquishca amigo Lazaroga puñuushcami, randi ñuca licchachingahuami riuniʼ. Imahuata chasna nira. Paillatami: “Lazaroga huañushca man” nisha intindichira (Juan 11:​11-14). Jesusca huañuitaga mana sinticta puñunata shinami intindichira. Paiga mana nirachu Lazaroga cieloibi maun nisha. Chimandahuas, Jesusca mana nirachu huañushca aillugunahuan tupanacungahua rira nisha. Chasnallata Jesusca  mana nirachu Lazaroga ninaibi rupaun, shucpa aichaibi yaicusha cuti causarishcata, o animal tucushcata. Randi, Lazaroga huañucta puñushca shina mara. Bibliaibi shuc textogunahuas huañunataga puñuna shina man nin. Chasnallata, Bibliaibi nin Estebanda puñuc shina huañushcata (Hechos 7:​60, NM). Apostol Pablohuas nirami, maican Jesusta caticcuna huañusha puñushca shina acta (1 Corintios 15:​6, NM).

8. Dios mana huañungahua runagunata rashcata imasata yachanchi.

⁸ Diosca runagunata huañungahuachu rara. Mana. Imahuata chasna ninchi. Jehovaga Adan y Eva mana  ungusha huiñai causaita charingahua rara. Chasnallata, mana huañusha causana munaita cura (Eclesiastes 3:11). Yayagunaga mana gustanaunzhu huahuaguna ungusha huañunata. Chasnallatami, ñucanchi Yaya Jehovata, mana gustan ñucanchi ungusha huañunata. Sashaga, mana huañusha causangahua rashca acpiga, imahuata huañunchi.

9. Adan y Evata Dios mandashcaga imahuata ali ara.

⁹ Jardin de Edenbi Jehova Adanda nira: “Cai gustu causana pistuibi tiyac tucui ruyamanda amirinagama micuna ushangui. Chasna acpihuas ali acta mana ali acta yachana ruyamanda, ama micunguichu, micushaga chi punzhami huañungui” (Genesis 2:​9, 16, 17). Pai mandashcaga pactachibaglla mara. Chasnallata, Jehova paigunata rashcamandami Jehovalla alita, mana alita anllana ara. Adan y Eva Jehovata casushaga paita respetashcata, tucui pai cushcamanda pagrachushcata ricuchina anaura.

10, 11. a) Supaiga imasata Adan y Evata uchaibi urmachira. b) Adan y Evaga imahuata yachashallata mana casunaura ninchi.

¹⁰ Adan y Evaga Diosta mana casunaurachu. Supai Evata nirami: “Sirtuchu Diosca cangunata nishca, cai jardinbi auc tucui ruyagunamanda ama micunguichichu” nisha. Evaga cutichira: “Jardinbi auc ruyagunamanda muyuta micunata ushanchimi, cuti jardin chaupibi shayauc ruyamanda muyuta micunamandaga Diosca nishcami, chitaga mana micuna changuichi. ‘Mana, mana llanganallas changuichi mana huañungahua’ ” (Genesis 3:​1-3).

¹¹ Chasna nicpi Supai Evata nira: “Sirtupacha mana huañunguichichu. Diosca yachanmi chita micushca punzhallaita canguna ñahui pascaringa, chibiga Dios cuinta tucunguichi, alita mana alita yachasha”  (Genesis 3:​4-6). Supaiga Eva alita mana alita paillata anllana ushashcata quirichina munara. Diosta mana casusha Eva ima tucunata Supai llullara. Supai mana huañunguichu nicpi Eva chi muyuta micura. Chihuasha paiba caritas cucpi paihuas micura. Adan y Eva Jehova cai ruyamanda muyuta mana micuna nishcata yachanaurami. Yachashallatami mana casusha cai muyuta micusha uchaibi urmanaura. Adan y Evaga Jehova mandashcata mana casusha, paita mana respetashcata ricuchinaura.

12. Jehovaga Adan y Evamanda imahuata yapa llaquirira.

¹² Adan y Eva mana casushcamanda Jehova yapacta llaquirira. Jehova paiguna Yaya acpihuas mana respetanaurachu. Yuyari, canba huahuata tarabusta rasha huiñachinguima. Chasna huiñachishca ashahuas chi huahua canhuan piñarisha, pai munashcata ranma. Manachu shungüibi nanaringuima.

13. Jehovaga imahuata Adanda pulbumi tucungui nira.

¹³ Adan y Eva uchai urmasha huiñai causanata pirdinaura. Jehova Adanda nira: “Allpa pulbumanda mangui, allpamallata bulltiangui” (Genesis 3:19 leipai). Adan huañusha pulbu tucusha chingarinata Jehova intindichira (Genesis 2:​7). Adan huañusha huiñai chingarira. Mana mas causasha catirachu.

14. Imahuata huañunchi.

¹⁴ Adan y Eva Diosta  casushca ashaga cunangamami causanaunma. Randi mana casusha uchai urmasha huañuna tucunaura. Uchaga iridsa ungüi shina man. Ñucanchi punda yayagunamanda cai uchata charinchi. Chasna ashami tucuiguna uchayuc pagarishcamanda huañunchi (Romanos 5:12). Chasna ashahuas Jehovaga runaguna huañunata mana munarachu. Chiraicumi, Bibliaga nin huañuiga “piñac” enemigo man nisha (1 Corintios 15:26).

15. Huañushcagunaga imatata mana rana ushanaun.

¹⁵ Ashca religionguna ninaun, huañushcagunaga shuc partibi causasha catinaun, paigunata yanapana ushanchimi nisha. Huañushca runahua ailluguna imasaibi religionda pushaccunata misata rangahua paganaun. Chasna ashahuas Bibliaga, huañushcaguna mana turmintarisha llaquirishcata rimanzhu. Ñucanchiga paigunahuan cuintanacunata, yanapanatahuas mana ushanchichu. Huañushcagunahuas ñucanchihuan cuintanacunata, yanapanata, dañunatas mana ushanaunzhu. Chiraicu huañushcagunata mana manzhana chanchi. Huañushcaguna ima tucushcata yachasha mana manzhashunzhu.

16. Religiongunaga huañushcagunamanda imatata yachachinaun.

¹⁶ Supaiga yanga religiongunata utilizasha huañushcaguna shuc partibi causasha catinaun nisha llullachin. Por ejemplo, maican religiongunaga huañushaga shuc partibi causasha catinaun nisha yachachinaun. Camba religionga caitachu yachachin o Biblia nishcatachu yachachin. Supaiga casna llullasha runagunata Diosmanda caruyachinata munan.

17. Infiernomanda yachachishcaga imahuata Jehova mana ali Diosta shina sintichin.

 ¹⁷ Ashca religionguna huañushcagunamanda rimashca Jehovata mana ali Diosta shina saquichin. Por ejemplo, mana aligunaga infiernoibi huiñai rupaunguna ninaun. Chiga mana sirtu chan. Jehovaga runagunata chasna turmintachina yuyaita mana charinzhu (1 Juan 4:​8 leipai). Huahuata maquita rupachisha castigac yayamanda imata ninguima. Manzhasha mana paiba amigo tucuna munanguimachu. Supaiga Jehovamanda chasna pinsachun munan.

18. Huañushcagunata imahuata mana manzhana anchi.

¹⁸ Maican religiongunaga huañushaga espiritu o alma tucunchi ninaun. Chasnallata cai espiritugunaga ali amigo o enemigo tucuna ushacpi manzhasha respetana manchi ninaun. Ashca runaguna cai llullashcata quirisha huañushcagunata manzhanaun. Chiraicu ashca runaguna Jehovata adorana randiga huañushcagunata adoranaun. Ñaupa yachashca shinaga huañushcaguna mana imatahuas sintinaunzhu, mana imatas rana ushanaunzhu. Chiraicumi huañushcagunata mana manzhana anchi. Jehovami ñucanchita Tarabac, sirtu Dios an. Paillatami adorana anchi (Apocalipsis 4:11).

19. Huañushcaguna ima tucushcata yachanaga imasata ñucanchita yanapan.

¹⁹ Huañushcaguna ima tucushcata yachashami religionguna llullashcata mana quirishun. Chimandahuas, Jehova shamuc punzhagunaibi imata rangaraushcata alita intindingahua yanapan.

20. Catic capituloibiga imata yachashun.

²⁰ Ashca huataguna huashama Job nishca runa tapura: “Shuc runa huañushaga [...] causarina ushanzhu” (Job 14:14). Catic capituloibi caita Biblia imasa cutichishcata yachashun.