1, 2. Ashca runaguna imata yachana munanaun.

MUNDU INTIRUIBI ashca llaquiguna tiyan. Marbi yacu atarisha shuc llacta intiruta tucuchira. Shuc runa iglesiaibi illapacpi maicanguna huañunaura, shuccuna huañuucuna saquirinaura. Shuc mama, cancer ungüihuan huañucpi pichca huahuaguna huaccha saquirinaura.

² Casna llaquiguna tucucpi, runaguna tapurinaun: “Imahuata munduibi ashca turmintuguna tiyan”. Canga ima urasca caita tapurishcanguichu.

3, 4. a) Habacucca Jehovata imata tapura. b) Jehovaga imata nira.

³ Bibliaga Diosta sirviccuna casnallata tapurishcata nin. Por ejemplo, profeta Habacuc Jehovata tapura: Imaraicuta mana ali rashcagunata ricushahuas mana imatas rangui. Imahuata ñuca ñaupacpi manzhanaitaguna tiyan. Imahuata yapa piñanacui tiyan” (Habacuc 1:​3).

⁴ Bibliaga Jehova Habacucta chi llaquigunata alichishami nishcata riman (Habacuc 2:​2, 3). Jehovaga runagunata yapacta llaquin. Bibliaibiga nin: ‘Dios cangunata yapa ali cuirana munanmi’ (1 Pedro 5:​7). Chasnallata, llaquiguna tiyacpi Diosca ñucanchimandas mas yalita nanarin (Isaias 55:​8, 9). Sashaga imahuata munduibi turmintuguna tiyan. Caita yachashun.

5. a) Religionda ashca pushaccunaga turmintarinamanda imata ninaun. b) Bibliaga imata nin.

⁵ Ashca sacerdoteguna, pastorguna, religionda  pushaccuna Dios munacpi turmintarinchi ninaun. Imasaibiga Diosmi ñucanchi ima tucunata yachasha, turmintachin ninaun. Imaraicu turmintarishcata mana ima uraspas intindishunzhu ninaunzhari. Shuccunaga Dioshuan cieloibi angahua huañunchi ninaun. Huahua huañucpi chasnallata ninaun. Chiga mana sirtu chan. Jehovaga runagunata mana ima uraspas turmintachinzhu. Bibliaga nin: “Mana alita ranamanda Diosca caruibi man, paiga Tucui Ushayuc alita rac man” (Job 34:10).

6. Runagunaga turmintugunamanda, imahuata Diosta culpanaun.

⁶ Ashca runagunaga Diosmi cai munduta mandaun nisha, turmintugunamanda paita culpanaun. Chasna acpihuas, capitulo 3​pi Supai cai munduta mandaushcata yacharanchi.

7, 8. Imaraicuta turmintuguna tiyan.

⁷ Bibliaga “tucui mundu intirumi supaiba maquibi aun” nin (1 Juan 5:19). Cai munduta mandaucca mana ali, irus Satanas man. Paiga “intiru munduta” llullasha umaun (Apocalipsis 12:​9). Ashca runagunami chasnallata ranaun. Chiraicumi, munduibi ashca turmintuguna, llullaguna tiyanaun.

⁸ Imaraicu tucui turmintuguna tiyashcata mas yachashun. Diosta mana casusha Adan y Eva uchai urmacpi, paiba huahuagunas uchayuc saquirinaura. Runaguna uchayuc ashami, shuccunata turmintachinaun. Imasaibi shuccunamanda mas balic tucuna munanaun. Chiraicu, guerrama risha shuc runagunata binsingahua macasha huanchinaun (Eclesiastes 4:​1; 8:​9). Chasnallata, shuc punzha ima tucunata mana yachashcamanda “cungaimanda turmintarina” ushanchi (Eclesiastes 9:11). Imasaibiga mana yachasha, maibis aushcaibi, cungaimanda susirisha atun llaqui tucunchi.

9. Dios turmintuguna tiyachun saquishcata, imaraicuta pai alita yachan ninchi.

 ⁹ Jehovaga turmintugunata mana cachanzhu. Guerragunahuan, shuhuagunahuan, tucui mana aligunahuanbas Jehova mana turmintachinzhu. Chasnallata, sinzhi allpa cuyuimanda, rundu huairamanda, yacu tugyashcamanda, shuccunamandas mana culpayuc chan. Canga tapuringuichari: “Jehova ashca ushayuc ashaga, imaraicuta turmintuguna tiyachun saquin”. Yaya Dios ñucanchita yapa llaquishcata yachanchimi, chiraicu imahua turmintuguna tiyachun saquishcata pai alita yachan (1 Juan 4:​8).

10. Supaiga Jehovata imamandata culpara.

¹⁰ Jardin de Edenbi, Supaiga Adan y Evata uchai urmachira. Sa rasha, Jehovata mana ali mandac chan nisha culpara. Supaiga runaguna cushi causanata Dios mana munan nira. Chasnallata, Jehovamandas mas ali mani nisha, Diosta mana minishtinaunzhu nisha runagunata quirichina munara (Genesis 3:​2-5; nota 27​ta ricui).

11. Ima tapuita cutichina ushanchi.

¹¹ Adan y Eva Jehovata mana casusha paiba enemigo tucunaura. Ima ali acta, mana ali acta paigunallata anllana ushashcata pinsanaura. Adan y Eva mana alita rashcata intindichisha, Jehovalla ñucanchiraicu ima ali acta yachashcata ricuchingahua, pai imata rara.

12, 13. a) Jehovaga imahuata Adan y Evata mana chi ratullata huanchira. b) Imaraicuta Jehovaga Supai cai munduta mandasha, runapurallata mandachun saquira.

¹² Jehovaga cai Allpata paraisota rasha, Adan y Evahua miraihuan undachinata munara. Supai arcasha  nicpihuas pai rimashcata pactachingami (Genesis 1:28; Isaias 55:​10, 11). Chiraicu, Jehovaga Adan y Evata chi ratullata huanchina randiga, huahuagunata charichun saquira. Chasna rasha, Adan y Evahua huahuagunaga maicanda catina ashcata ricuna ushanaura.

¹³ Supaiga Jehovata ashca huaranga angelguna ricuushcai culpara (Job 38:​7; Apocalipsis 5:11). Chiraicu, Jehovaga Supai nishcata ricuchichun nisha timputa cura. Chasnallata, runagunatas Supai munduibi paigunapurallata mandana ushashcata ricuchinauchun nisha saquiralla. Chasna rasha, runaguna Diospa yanapai illac mandana ushashcata ricuchinauchun nisha saquira.

14. Cunanga imata intindishcanchi.

¹⁴ Ashca huaranga huata yalita, runagunaga painallata mandashcauna. Chasna ashahuas, tucui gubirnuguna mana alita rashcauna. Cunanga Supai llulla ashcata, runagunahuas Diospa yanapaita minishtishcata intindishcanchi. Profeta Jeremias nishcaga sirtu mashca: “Jehovalla, ñucaga alimi yachani Allpaibi causac runagunahua ñambiga mana paigunahuac chan. Puriu runaga tactinallatas mana ushanzhu” (Jeremias 10:23).

15, 16. a) Jehovaga imaraicuta ashca timputa turmintuguna tiyachun saquishca. b) Jehovaga imaraicuta Supai huaglichishcata mana alichishca.

¹⁵ Jehovaga imaraicuta ashca timputa turmintuguna tiyachun saquishca. Imaraicuta mana aligunata ricusha mana imatas ran. Timpu pasacpi Satanas mana  ali mandac ashcata ricushcanchi. Runagunaga tucui tunu gubirnugunata charishcauna. Chasna ashahuas, alita mandanata mana ushashcaunachu. Cientificoguna cunan mas yachacpihuas, pugriguna, mana ali raiguna, shuhuaguna, guerraguna mas yalita tiyasha catinaun. Jehova Dios mana yanapacpiga, runagunaga mana alita causangaunachu.

¹⁶ Shuc partibi nicpiga, Supai huaglichishcata Jehovaga mana alichishcachu. Alichishaga Supaiba gubirnuta apoyashcata ricuchinma. Diosca mana ima uraspas Supaita apoyangachu. Dios yanapacpi, runagunaga paigunallata alita mandana ushashcata quiringauna. Chasna acpihuas, Diosca runagunata mana umana ushanzhu. Paiga mana llulla chan (Hebreos 6:18).

17, 18. Jehovaga runaguna, Supai huaglichishcata tucuita alichina ushanzhu.

¹⁷ Jehovaga runaguna, Supai huaglichishcata tucuita alichina ushanmi. Supai culpashca yanga acta Jehova ima uras ricuchinata paillami yachan. Chibi, Jehovaga pai munashca shina Allpata paraisota ranga. “Tucui huañushca runaguna” causaringauna (Juan 5:​28, 29). Runagunaga mana ungusha huañungaunachu. Jehovaga “supaita binsisha pai rashcagunata chingachingahuami” Jesusta cachanga (1 Juan 3:​8). Chiraicu, Jehova ñucanchita mana sambayasha chapashcamanda pagrachunchi. Chasna rasha, Jehovata alita ricsisha, pai ñucanchita mandachun munashcata ricuchishun (2 Pedro 3:​9, 10 leipai). Llaquigunata charicpihuas, ahuantangahua Jehova yanapai tucushun (1 Timoteo 2:4; 1 Corintios 10:13 leipai).

¹⁸ Jehovaga paiba gubirnuta anllachun mana  mandai tucunchichu. Paiga ñucanchillata anllachun saquishca. Caimanda astahuan mas yachashun.

19. a) Jehovaga ñucanchi imata rachun saquishca. b) Imaraicuta pagrachuna anchi.

¹⁹ Jehovaga ñucanchillata anllachun saquishca. Chasnallata, ñucanchi paita sirvinata o mana sirvinata saquinllami. Imasa causanata ñucanchillata anllanchi. Mana animalguna shina chanchi. Animalgunaga ima ali acta, mana ali acta mana anllana ushanaunzhu (Proverbios 30:​24-28). Chimandas, runagunaga mana maquina shina chanchi. Alita pinsasha imatas ranchi. Ima tunu runa anata, maican amigogunata charinata, ñucanchi causaihuan imata ranata anllana ushanchi. Jehovaga ñucanchi cushi causachun munan.

20, 21. Jehovaga runagunamanda imatata munan.

²⁰ Jehovaga paita llaquichun munan (Mateo 22:​37, 38). Shuc yayaga paiba huahua shungumanda llaquinimi nicpi cushiyanmi. Jehovahuas chasna shina paita shungumanda llaquicpi cushiyan. Paiga runaguna shungumanda llaquichun munan. Jehovaga paita sirvinata o mana sirvinata, ñucanchillata anllachun saquishca. Supai, Adan y Eva Jehovata mana casunaurachu. Canga, Jehovata casunguichu.

²¹ Cunan Jehovata sirvingahua anllashaga alitami rangui. Ashca huaranga runagunami Supaita mana casusha Jehova Diosta sirviunguna (Proverbios 27:11). Ña ricushca shina, Diosca tucui turmintugunata tucuchisha, cai Allpata paraisota rangaraun. Can chibi angahua, imata rana angui. Cai tapuimanda catic capituloibi yachashun.