Jesusca Allpama chara mana shamushallata jahuapachaibi ashca ushaita charic angel mara (Juan 8:​23). Jesusca Jehova punda rashca churi mara. Paimi paiba Yayata yanapara, jahuapachaibi Allpaibihuas tiaccunatas rasha. Jesusta rangahua pihuas Jehovata mana yanapashcamandami, Bibliaga nin Jesusca “Diospa shuglla churi” man nisha (Juan 1:​14). Diospa shimigunata pasachic ashcamandami Bibliaga Jesusta nin, “Causac Shimi” nisha. Proverbios 8:22, 23, 30; Colosenses 1:​15, 16, leingui.

Diosmi paiba Churita Allpama cachara. Chita rangahuaga María shuti, mana carihuan causac huarmihua huicsa ucuibi Jesuspa causaita churara. Chiraicumi Jesusca mana runa yayata charira (Lucas 1:​30-​35). Jesusca imaraicuta Allpama shamura. 1) Diosmanda sirtuta yachachingahuami shamura. 2) Sinzhi acpihuas, paillata Diosta tucuibi cazusha ñucanchita yachachingahuami shamura. 3) Paiba jucha illac causaita cusha ñucanchi “dihuita” pagasha huañungahuami shamura. Mateo 20:28, leingui.

Imasaibiga, shuc runa mana huañungahuaga shuc dihuita pagana mara (Exodo 21:29, 30). Diosca mana munarachu, runaguna rucuyasha huañunauchun nisha. Chiraicu Diosca Adanda nira, ñucata mana cazushaga huañunguimi nisha. Adan mana juchayashca ashaga mana huañunma chara (Genesis 2:​16, 17; 5:5). Biblia  nishca shinaga, huañuiga Adanmandami “callarira”. Adanmi paiba huahuagunama juchata chimbachisha huañunata saquira. Chiraicumi huin runagunaga shuc quishpichicta minishtinchi. Romanos 5:​12; 6:​23, leingui.

Chasna acpihuas, pita ñucanchi huañuimanda pagasha quishpichi tucushun. Huañushaga ñucanchi juchamandami paganchi. Juchayuc ashcamandaga ñucanchiga mana pihuas juchamanda paganata ushanchichu. Salmo 49:​7-9, leingui.

Jesusca ima uraspas juchata mana rarachu. Paiga jucha illac mara. Chasna asha mana paiba juchamanda huañurachu. Runagunahua juchamandami huañura. Diosca paiba Churita ñucanchimanda huañuchun nisha cachashaga, ñucanchita ashca llaquishcatami ricuchira. Jesuspas ñucanchita llaquishcata ricuchira. Paiga mana quillasha paiba Yaya mandashcata cazusha ñucanchi juchamanda, huañuimanda quishpichira. Juan 6:​40; Romanos 5:​18, 19, leingui.

Cai videota ricui: Imaraicuta Jesusca huañura

Allpaibi aushaga, Jesusca ungushcagunata jambira, huañushcagunatas causachira, turmintarishcagunata yanapara. Chasna rashami ricuchira shamuc punzhaibi Diosta sirvic runagunama ali causanata cungaraucta (Mateo 15:​30, 31; Juan 5:28). Jesus huañucpiga, jahuapachaibi causachun nisha Diosca cuti causachira (Efesios 1:20). Chi huashaga Diospa ali maqui partima tiarira, paiba Yaya tucui Allpaibi mandana urdinda cunagama (Hebreos 10:12, 13). Cunan punzhaibiga Jesusca jahuapachaibimi mandaun. Paita caticcunaga mundu intiruibi chi gustu cuintaita camachiunguna. Mateo 24:14; Apocalipsis 11:​15, leingui.

Dios cushca ushaihuanmi cai reyga nalla mana ali runagunata, llaquigunatahuas chingachinga. Jesuspi quirisha paita cazushaga, runagunaga cushiyasha, paraiso tucushca Allpaibimi causangauna. Mateo 5:​5, leingui.