22 YACHANA PARTI
Imashinata Bibliamanda predicanata ushangui
Bibliamanda sirtuta yachashaga canga ningui imachari: “Huingunami caita yachana anaun nisha”. Sirtutami ningui. Caitaga huingunami yachana anaun. Chasna acpihuas, can yachaushcata shuc runagunata cuintangahua, manzharishcachari sintiringui. Can yachaushcata mana manzhasha rimangahua, Bibliamanda cushiyasha yachachingahua, imata rana ashcata ricushun.
1. Can Bibliamanda yachaushcata imasata can ricsishca runagunata cuintana ushangui
Jesusta caticcuna ninaura: ʻÑucanchi ricushcatahuas, uyashcatahuas rimaunchi. Chiraicumi, rimanata mana saquinata ushanchiʼ (Hechos 4:20). Paigunaga Jesus yachachishcata balichishami, tucui runagunata caita cuintanata munanaura. Canbas, chasnallatachu sintingui. Chiraicu, camba aillugunata, amigogunata, can yachaushcamanda paigunata respetohuan cuintai (Colosenses 4:6ta leipai).
Bibliamanda cuintasha callaringahua yuyaiguna
-
Shuc ailluhuan Bibliamanda cuintangahua callarishaga, casna nina ushangui: “Cai semanaibi Bibliamanda caita yacharani”.
-
Shuc amigo ungushca o llaquirishca acpiga, Bibliamanda shuc textota leisha yanapai.
-
Canhuan tarabac compañeroguna, cai sabado, domingoibi can imatata rarangui tapucpi, Bibliamanda imata estudiashcata o tandarinaibi imata yachashcata cuintai.
-
Camba amigogunata jw.org internet pistuta yachachi.
-
Canda yachachic runahuan Bibliata estudianama shuccunata invitai o jw.org nishca pistuibi imasa Bibliata estudiangahua mascanata yachachi.
2. Imahuata can congregacionhuan predicanaga ali an
Jesusta caticcunaga Bibliamanda ali cuintaigunata mana paiguna ricsishcagunallatachu rimanaura. Jesusca “paita caticcunata cayasha, ishcaipura ishcaipura pai rina llactagunama” predicangahua ñaupata cachara (Lucas 10:1). Casna Bibliamanda predicanaga, ashca runagunata Bibliamanda ali cuintaigunata uyachingahua yanapara. Chasnallata, Jesusta caticcunaga casna pariulla predicashami, cushilla sintirinaura (Lucas 10:17). Canbas, congregacionhuan predicanata munanguichu.
CAIMANDA MASTA YACHAI
Bibliamanda cushiyasha yachachingahua, imasa manzhaita binsishcata ricushun.
3. Jehovami canda yanapanga
Maican Bibliamanda predicanata munaccunaga, shuc runaguna imatashi yuyangauna nisha manzhanaun.
-
Shuccunahuan Bibliamanda cuintanata yuyasha, canga manzharinguichu. Imahua.
VIDEOTA ricuichi, huasha cai tapuimanda cuintanacuichi:
-
Cai videoibi ricuric malta testigoguna, imashinata manzhaita binsinaura.
Hebreos 13:6ta leichi, huasha cai tapuimanda cuintanacuichi:
-
Predicanata mana manzhangahua, imahuata Diosta mañana angui.
Yacharanguichu
Maican testigo de Jehovagunaga, mana predicanata ushashunzhu nisha yuyac anaura. Sergey nishca runa, ima pasashcata yuyashun. Paiga mana imaibihuas balic shina sintirira. Chasnallata, pairaicu shuccunahuan cuintana sinzhi mara. Chasna sintirishahuas, shuc punzha Bibliamanda yachangahua callarira. Paiga cuintan: “Manzharishca ashahuas, ñuca yachashcata cuintangahua callarirani. Caita ranaga, ñuca balishca ashcata sintichihuara. Chasnallata, Bibliamanda yachashca ñuca corazonbi saquirihuara”.
4. Bibliamanda respetohuan yachachi
Shuccunata mana predicashallata, imata cuintangaraushcata yuyangui. Chasnallata, imashina cuintangaraushcata yuyana angui. 2 Timoteo 2:24 y 1 Pedro 3:15ta leichi, huasha cai tapuigunamanda cuintanacuichi:
-
Cai textoguna nishcata pactachishaga, imasata shuc runagunahuan Bibliamanda cuintana angui.
-
Maican aillu o amigoguna, can Bibliamanda yachachiushcata mana gustangauna imachari. Casna tucucpi, imatata ranguima. Imatata mana rana angui.
-
Caita quirina mangui nina randiga, imahuata mana piñarisha, respetohuan yachachina angui.
5. Bibliamanda ali cuintaigunata rimana cushiyachitucunchi
Jehovaga Jesusta Bibliamanda ali cuintaigunata predicangahua cachara. Jesusca, Jehova nishcata imashinata pactachira. Juan 4:34ta leichi, huasha cai tapuigunamanda cuintanacuichi:
-
Micushaga mana ungusha, cushi causanchi. Jesusca nira: ʻDios munashcata rasha pactachinaga micuna shina manʼ. Imahuata casna nira.
-
Imatata ningui. Bibliamanda yachachinaga imashinashi cushiyachitucunguima.
Caita rai
-
Can chaupi semana tandarina aushcai, imasa Bibliamanda cuintangahua callarishcata ricui.
-
Chaupi semana tandarinai participangahua, imata rana ashcata canda yachachic runata tapui. Tandarinaibi Bibliamanda cuintasha ricuchina partiguna, can Bibliamanda yachashcata mana manzhasha rimangahua yanapanga.
-
“Maicangunaga casnami ninaun” y “Maicangunaga casnami tapunaun” cai libromanda partigunata ricui. Chibi, runaguna tapushcata imashina cutichinata repasangui.
MAICANGUNAGA CASNAMI TAPUNAUN: “Imasa taungui. Cunangama imatata rashcangui, cuintahuai”.
-
Runaguna chita tapucpiga, can imashinata Bibliamanda yachashcata cuintanata ushangui.
IMATA YACHASHCANGUI
Bibliamanda ali cuintaigunata rimana cushiyachin. Chasnallata, caita rimangahua callarina, mana sinzhi chan.
Yachashcata cuintai
-
Bibliamanda predicangahua imata yanapanga.
-
Canga imashinata Bibliamanda gustuta, cungailla yachachina ushangui.
-
Canga imashinata mana manzhasha predicanata ushangui.
CANLLATA MASTA YACHAI
jw.org nishca ichilla tarjetahuan imashina predicanata ricui.
jw.org nishca ichilla tarjetahuan imasa predicana yuyaiguna (1:43)
Bibliamanda alita yachachingahua chuscu yanapaigunata ricui.
“Yacu aichata apic runa shina runagunata yachachinata munanguichu” (La Atalaya, septiembre de 2020)
Malta ashahuas, mana manzhasha predicangahua, Bibliaibi cuintashcata ricui.
Jehovata mana ricsic aillugunahuan Bibliamanda imashina cuintana ashcata ricui.