YACHANA PARTI 38
Jehova cushca causaita balichishunchi
Causanaga gustu man. Causaita charishcamanda cushi sintirinchi. Turmintugunata charishahuas, cushilla causasha catinata ushanchi. Jehova cushca causaimanda, imasa rashata paita pagrachushunchi. Imahuata causaitaga balichina anchi.
1. Imahuata causaita balichina anchi
Causaiga Yaya Jehova cushca man. Chiraicu, causaitaga balichina anchi. Tucui runagunata, tucui animalgunata rashcamanda, Jehovaga “causaita cuc” man (Salmo 36:9). “Paimi tucui ñucanchi causaitas, samaitas, tucui ñucanchi minishtishcagunatahuas cun” (Hechos 17:25, 28). Chasna ashcamanda, ñucanchi causasha catingahua, Jehovami tucui minishtishcagunata cuitucunchi. Pero mana chilla chan. Ñucanchi gustu causaita charingahua, Jehovaga tucui sami ricuriccunatami cuitucushcanchi (Hechos 14:17ta leipai).
2. Jehova cushca causaita balichingahua, imata rashata pagrachushunchi
Camba mama huicsayashcaibi, Jehova canda llaquisha ricura. Diosta sirvic Davidca, Jehovata mañasha casna nira: “Ñuca rahuai bula huahua ashcaibi, canmi ricuhuarangui” (Salmo 139:16). Camba causaiga Jehovaraicu yapa balishca man (Mateo 10:29-31ta leipai). Maican runa, shuccunata huañuchicpi o amullata huañuricpiga, Jehovaga ashcatami llaquirin (Exodo 20:13). a Chasnallata, ñucanchi causaita o shuc runagunahua causaita yangamanda peligroibi churacpiga, Diosca ashcatami llaquirin. Ñucanchi causaita cuirasha, shuccunahua causaita cuirashaga, Dios cushca causaita balichishcatami ricuchinchi.
CAIMANDA MASTA YACHAI
Jehova cushca causaita imasa balichina ashcata ricushunchi.
3. Mana ungungahua camba causaita cuirai
Jehovata sirviccunaga pai munashca shina causanata munanaun. Paiguna aicha santo cumbirashcacuinta Diosma cushcauna. Chiraicu, paiguna causaita cuiranaun. Romanos 12:1, 2ta leichi, huasha cai tapuigunamanda cuintanacuichi:
-
Imahuata camba causaita cuirana angui.
-
Mana ungusha causangahua, imatata rana angui.
4. Canllata mana susiringahua, shuccunata mana susirichingahua imatas rai
Bibliaga mana susiringahua imata rana ashcata yachachitucunchi. Imasa ñucanchi causaita cuirana ashcata yachangahua, cai VIDEOTA ricuichi.
Proverbios 22:3ta leichi, huasha imasa mana susirinamanda cuintanacuichi...
-
... huasibi.
-
... tarabanaibi.
-
... pugllausha.
-
... aututa manejausha o autuibi riushahuas.
5. Huicsamanda chara mana llucshic huahua causaita balichi
Jehovaga mamahua huicsa ucui auc huahuata llaquishami ricun. David caita yachashcamandami, Diosta alabasha rimara. Salmo 139:13-17ta leichi, huasha cai tapuimanda cuintanacuichi:
-
Jehovaraicu, runahua causaiga ima urasta callarin: mama huicsayashcaibi o huahuayashcaibi.
Huicsayuc huarmigunata cuirangahua, huicsa ucuibi tiac huahuatahuas cuirangahua, Jehova israelitagunata shuc mandaita cura. Exodo 21:22, 23ta leichi, huasha cai tapuigunamanda cuintanacuichi:
-
Shuc runa, mana pagarishca huahuata, mana munasha huanchicpiga, paita Jehovaga imasata ricuc ara.
-
Cuti shuc runa, mana pagarishca huahuata amu yachashallata huanchicpiga, Jehovaga imasata sintiringa. b
-
Shullunamanda Dios yuyashcata can imashinata ricungui.
Shuc huarmi, causaita balichina ashcata yachashahuas, turmintuta charishcamanda, shullunata yuyanma imachari. Isaias 41:10ta leichi, huasha cai tapuimanda cuintanacuichi:
-
Shuc huarmita shullui nisha rimanaucpiga, pitata yanapaita mascana an. Imahua.
MAICANGUNAGA CASNAMI NINAUN: “Caran huarmimi amu munashaga shullunata ushan. Paiba aichahuan, imatas ranata ushan”.
-
Huicsayuc huarmihua causaita, huicsa ucuibi tiac huahuahua causaita, Jehovaraicu balishca ashcata quiringuichu. Imahuata casna yuyangui.
IMATA YACHASHCANGUI
Causaiga Jehova cumbirashca man. Bibliaga ñucanchi causaita, shuccunahua causaitahuas balichingahua, cuirangahua, llaquingahua yachachitucunchi.
Yachashcata cuintai
-
Jehova runagunahua causaita balichishcataga, imasata yachanchi.
-
Maican runa, shuccunata huañuchicpi o amullata huañuricpiga, Jehovaga imasata sintirin.
-
Jehova canda causaita cushcamanda, imashinata sintiringui.
CANLLATA MASTA YACHAI
Causaita cushcamanda, imasata Jehovata pagrachuna ushanchi.
Ñaupa timpuibi shulluc huarmitaga, Jehova perdonanata ushanzhu.
“Bibliaga shullunamanda imatata nin” (jw.org internet pistuibi)
Ñucanchi causaimanda, pugllanamanda Diosca imatata yuyan.
“Manzhanayacta pugllanagunata pugllana chanchi” (¡Despertad!, 8 de octubre de 2000)
Shuc runa amullata huañurinata yuyacpigá. Biblia yachachishcata ricui.
a Jehovaga turmintarishca shunguta chariccunata ashcatami llaquin (Salmo 34:18). Maicangunaga yapacta llaquirishcamanda, amullata huañurinata munanaun. Jehovaga casna sintiric runagunata intindisha yanapanata munan. Dios canda yanapachun, cai quillcashcata leipai: “Ñuca mana causanata munasha, amullata huañurinata yuyaricpi, Bibliaga yanapanata ushanzhu”. Cai temaga, “Canllata masta yachai” nishca partibi aun.
b Diosta mana ricsishcamanda, shulluc huarmiguna o shulluchic runagunaga, mana turmintarisha causana chanaun. Jehovaga paigunata perdonanata munan. Caimanda masta yachangahua, cai quillcashcata leipai: “Bibliaga shullunamanda imatata nin”. Cai temaga, “Canllata masta yachai” nishca partibi aun.