YACHANA PARTI 59
Runaguna canda turmintachicpi ahuantana ushangui
Tucui Jesusta caticcunaga arcaigunata charishun, o imasaibi maican runaguna turmintachitucushun. Runaguna turmintachicpi, manzharina chanchi.
1. Imahuata maicanguna turmintachitucunchi
Bibliaga nin, “tucui Jesucristohuan ali purinata munac runagunaga turmintarisha causaungaunami” (2 Timoteo 3:12). Jesusca, mana Satanaspa mundu partimanda chara. Chiraicu, paita turmintachinaura. Ñucanchitahuas, mana Satanaspa mundu parti ashcamanda, maican gobiernoguna, maican religionguna turmintachitucunchi (Juan 15:18, 19).
2. Runaguna turmintachicpihuas mana manzhasha ahuantangahua imatata rana anchi
Cunanmi, Jehovaibi sinzhita quirina anchi. Chiraicu, caran urasmi Diosta mañasha, Bibliata leina anchi. Chasnallata, tandarinama mana pishishachu rina anchi. Caita ranaga, turmintuta mana manzhasha ahuantangahua yanapaitucushun. Ñucanchi ailluguna turmintachicpihuas, ahuantashami catishun. Apostol Pablotaga caran uras turmintachinaura. Chimanda, pai nira: “Dios ñucata yanapashcamandami, maican runas ñucata imata rasha nicpihuas, mana manzhashachu” (Hebreos 13:6).
Caran uras predicanaga, turmintuguna shamucpi mana manzhasha, sinzhi shunguta charingahua yanapaitucunchi. Predicanaga, Jehovaibi mas sinzhita quiringahua, runagunata mana manzhangahua yanapaitucunchi (Proverbios 29:25). Can cunanmanda mana manzhasha predicashaga, maican gobiernoguna ñucanchi predicanata arcacpihuas, predicasha catingui (1 Tesalonicenses 2:2).
3. Turmintuta ahuantanaga imasata yanapaitucunchi
Runaguna ñucanchita turmintachinata mana munanchichu. Pero, turmintuta ahuantashaga, Diospi mas sinzhita quirishun. Turmintuta mana ahuantanata ushacpiga, Jehovami ursata cusha yanapaitucunchi. Caita ricushaga, Jehovama mas caillayanchi (Santiago 1:2-4ta leipai). Runaguna ñucanchita llaquichicpiga, Jehovahuas llaquirinmi. Chasnallata, ñucanchi mana sambayasha ahuantacpiga, paihuas cushimi sintirin. Bibliaga nin: “Alita rashcamanda turmintachishcata ahuantacpi, Diosca ashcatami cushiyan” (1 Pedro 2:20, TNM). Jehovaga, paita mana saquisha ahuantac runagunata, Paraiso Allpaibi huiñai causaitami cunga. Mushuc munduibiga, Diospa enemigoguna mana tiangaunachu (Mateo 24:13).
CAIMANDA MASTA YACHAI
Maican runaguna ñucanchita turmintachicpi, Jehovata sirvisha catingahua imata rana ashcata yachashun. Chasnallata, ñucanchi ahuantacpi, Jehova imata cungaraushcata ricushun.
4. Canga ailluguna turmintachishcata ahuantanata ushanguimi
Jesusca, maican ailluguna Jehovata sirvingahua arcaitucushunmi nira. Mateo 10:34-36ta leichi, huasha cai tapuimanda cuintanacuichi:
-
Maican runa Jehovata sirvingahua callaricpi, paiba ailluguna munanaumachu.
Ashca huauquipanigunata paiguna ailluguna turmintachishcauna. Shuc huauqui pani, casna pasashcata yachangahua, VIDEOTA ricuichi. Huasha, cai tapuimanda cuintanacuichi:
-
Maican aillu o amigo Jehovata sirvinata saqui nicpiga, canga imatata ranguima.
Salmo 27:10 y Marcos 10:29, 30ta leichi. Caran textota leishca huasha, cai tapuimanda cuintanacuichi:
-
Cai texto yachachishcaga, imasata ailluguna o amigoguna turmintachishcata ahuantangahua yanapanga.
5. Runaguna turmintachicpihuas Jehovata sirvisha cati
Runaguna arcacpihuas, mana manzhashachu Jehovata sirvisha catina anchi. VIDEOTA ricuichi, huasha cai tapuimanda cuintanacuichi:
-
Cai videoibi ricushcaga, canda imashinata mana manzhangahua yanapaitucungui.
Hechos 5:27-29 y Hebreos 10:24, 25ta leichi. Caran textota leishca huasha, cai tapuimanda cuintanacuichi:
-
Gobiernoguna ama tandarichichu, ama predicaichichu nicpihuas, imahuata Jehovata sirvisha catina anchi.
6. Jehovami turmintuta ahuantangahua yanapaitucungui
Turmintuguna tiacpihuas, shuc llactamanda rucu, malta Testigogunaga, Jehovata sirvinata mana saquishcaunachu. Paiguna imashina ahuantashcata ricungahua, VIDEOTA ricuichi. Huasha, cai tapuimanda cuintanacuichi:
-
Cai Testigogunata turmintuta ahuantangahua imata yanapara.
Romanos 8:35 y 37-39, chasnallata 1 Corintios 10:13ta leichi. Caran textota leishca huasha, cai tapuimanda cuintanacuichi:
-
Turmintugunata ahuantangahua, cai textoga imasata yanapaitucungui.
Mateo 5:10-12ta leichi, huasha cai tapuimanda cuintanacuichi:
-
Turmintachinaupihuas, canga imahuata cushi anata ushangui.
Ashca huaranga Jehovata sirvic runagunami, paigunata turmintachicpihuas ahuantashcauna. Canbas, paiguna shinallata ahuantanata ushangui.
MAICANGUNAGA CASNAMI NINAUN: “Ñucata turmintachicpi, mana ahuantaimachu”.
-
Maican casna yuyacpiga, Bibliamanda ima textota yanapanata ushan.
IMATA YACHASHCANGUI
Ñucanchita turmintachicpihuas, Jehovata sirvisha caticpiga, pai ashcatami cushiyanga. Jehovahua yanapaihuan, imatas ahuantanata ushashun.
Yachashcata cuintai
-
Ñucanchita turmintachingaraushcata, imahuata mana manzhana anchi.
-
Runaguna turmintachingaraushcata ahuantangahua, cunan imatata rana angui.
-
Canda turmintachicpihuas, Jehovata sirvisha catina ushashcata quiringuichu.
CANLLATA MASTA YACHAI
Shuc malta huauqui cuartelma mana rishcamanda preso aushcai, imasa Jehova paita yanapashcata ricui.
Shuc cazarashcaguna turmintuguna tiacpihuas, ashca huatagunata Jehovata sirvisha catingahua, ima yanapashcata ricui.
Runaguna turmintachishcata mana manzhana ashcata yachai.
“Turmintu mana shamugllaita alichirishunchi” (La Atalaya, julio de 2019)
Ailluguna turmintachicpi, imatata rana anchi. Jehovata mana saquisha, ailluhuan cungailla angahua, imatata rana anchi.
“Ailluguna turmintachicpihuas Jehovata sirvisha catishun” (La Atalaya, octubre de 2017)
