TAPUI 7
Ñucahuan puñui nicpi imata rasha
CAN IMATA RANGUIMA
Caita yari: Sandra, Pabloga enamorado shina, ishcai quillata puriushcauna. Sandraraicu unai timputa aushca shina man. Punzha chishacta mensajegunata cachasha, telefonohuanbas cuintanacusha, ishcandi shuc imata rimangaraushcata yachanaun. Chasna acpihuas, cunanga Pabloga mana cuintanacunallatachu munan.
Cunangama Pablo Sandrahuan maquimanda apinacushalla ansallata muctinacushcauna. Sandra mana chi runahuan puñunata munanzhu. Chasna ashahuas, paiba enamoradota mana saquina munanzhu. Mana pihuas pai ali gustu huarmi ashcata sintichishcachu. Sandra pinsan: “Ñuca enamoradohuan puñucpiga ali imachari anga”.
Ña cadsarana huatata charisha, Sandra ashaga imata ranguima.
ALITA PINSARI
Carihuan huarmihuan puñunaga Yaya Dios cadsarashcagunata cumbirashca man. Chara mana cadsarashallata carihuan huarmihuan puñushaga chi cumbirashcata mana balichishcata ricuchinchi. Caiga shuc gustu camidsata cumbiracpi susiuta pichangahua apishca shina man.
Ruya pundata sicasha, chi pundamanda pishcu shina, pahuasha nisha saltashaga urmasha susiringui. Chasnallatami, Yaya Dios mandashcata mana cadsushaga uchaibi urmangui. Mana cadsarashallata puñunaga ucha man (1 Tesalonicenses 4:3).
Dios mandashcata mana cadsushaga imata tucushun. Bibliaga ninmi: “Runa ashiyasha amullata paihua quiquin aichataga huaglichin” (1 Corintios 6:18). Caiga imata nisha chasna nin.
Maltagunamanda estudiogunata rashcaibi, mana cadsarashallata cari huarmihuan puñushca huasha mana ali sintirishcata cuintashcauna:
-
MANA ALITA SINTIRINA. Maican maltaguna mana cadsarashallata carihuan huarmihuan puñushcamanda mana ali sintirishcata cuintashcauna.
-
MANA QUIRINA. Carihuan huarmihuan puñushca huasha, maican maltaguna tapurinaun ñuca enamorado pigunallahuanshi puñura nisha.
-
MANA ÑUCA PINSASHCA SHINA CHASHCA. Maican malta huarmiguna respetac runagunahuan anata munan. Abusibu runagunata mana gustanaunzhu. Chasnallata, ashca malta carigunata mana gustanaunzhu carihuan huairalla puñusha nic huarmigunata.
-
Caimanda imata yachanchi: Mana cadsarashallata carihuan huarmihuan puñushaga amullatata llaquishcata mana ricuchinguichu (Romanos 1:24). Camba aichaga balishca man. Ama huaglichichu.
Sinzhi shunguta rasha ahuantai, mana cadsarashallata carihuan huarmihuan ama puñuichu (1 Tesalonicenses 4:3). Cadsarashami camba carihuan, camba huarmihuan puñungui. Chasnami, cadsarashca huasha cungailla, mana turmintarisha, alita sintirisha cushilla causangui (Proverbios 7:22, 23; 1 Corintios 7:3).
IMATA NINGUIMA
-
Canda llaquic runaga manachu can ali anata munanga.
-
Sirtu llaquic runaga Dios mana gustashcata rachun nisha munangachu (Hebreos 13:4).
