5 PARTI
Noe punchagunaibiga ¿pigunata Diosta uyanaura?
Noe punchagunaibi runagunaga jiridsata rac manaura Genesis 6:5
Adan Evahuan huahuagunata charicpiga ashca runaguna cai Allpai tiai callarinaura. Chasna tucucpiga shuc angelguna Supai shina Diospa cuntar tucunaura.
Paigunaga runa shina aichayuc tucusha Allpama shamunaura huarmigunahuan cazarangahua. Jiridsa huahuagunatami charinaura. Chi huahuaguna huiñasha shuc runagunamandas yali ursayuc manaura.
Allpaga mana ali runagunahuanmi jundarira. Bibliaga ricuchinmi runaguna mana ali ranata yuyarishalla causashcata.
Noega Diosta cazusha jatun huamburic cajunda rara Genesis 6:13, 14, 18, 19, 22
Noega ali runa mara. Jehova Diosga Noeta nira, mana ali runagunata tucuchingamirauni Allpata catac tamiahuan nisha.
Noeta mandara shuc jatun huamburic cajunda rai nisha. Chibiga paihua ailluta, tucui sami animalgunatas yaicuchina mara.
Noe Allpata catac tamia shamungaraun nisha yachachicpis, runagunaga mana uyanaurachu. Shucguna asinaura, shucguna rabiarinaura.
Huamburic cajunda rashca huashaga Noega animalgunata yaicuchira.
