Te taŋa ꞌāpī e tahi te ꞌīŋoa ko Will e kī rō ꞌā: “Pēaha he manaꞌu koe he haꞌumani mo taiꞌo i te Pipiria, ꞌe te parautiꞌa ꞌi te meꞌe era kai ꞌite koe pē hē ana taiꞌo i te Pipiria e manaꞌu ena pē ira”.

 ¿He aha taꞌa meꞌe mo aŋa mo koa koe ka taiꞌo ena i te Pipiria? Mo te ŋā meꞌe nei e hāꞌūꞌū atu.

•  Ka haka tuꞌu pa he meꞌe ena ꞌi roto i te ꞌaꞌamu koe

•  Ka rara o ruŋa i rā ꞌaꞌamu

•  Te meꞌe kī o te taŋata ꞌāpī

 ¿Pē hē ana aŋa te meꞌe nei?

1.   Ka uꞌi te ꞌaꞌamu haŋa ꞌāꞌau mo hāpī. Ka uꞌi ko ꞌaꞌamu hē te ꞌaꞌamu haŋa ꞌāꞌau mo taiꞌo o te nūnaꞌa a Iehoha o muꞌa ꞌo ka taiꞌo e tahi ꞌaꞌamu o te meꞌe aŋa a Ietū hora era ꞌi ruŋa i te henua, ꞌe takoꞌa e riva nō koe mo haka roŋo i te ꞌaꞌamu o te Pipiria ꞌi jw.org.

2.   Ka taiꞌo te ꞌaꞌamu. E riva nō koe mo taiꞌo hoko tahi nō, ꞌo ꞌi muri i tuꞌu huaꞌai ꞌo i tuꞌu repahoa hai reꞌo pūai. E riva takoꞌa nō mo taiꞌo e tahi e tahi o kōrua te vānaŋa kī era te taŋata eꞌa era ꞌi ruŋa i rā ꞌaꞌamu.

3.   Ka aŋa te meꞌe nei:

   •   Ka tātū ꞌi ruŋa i te parau te ꞌaꞌamu taiꞌo era e koe. E riva nō mo pāpaꞌi e tahi kupu vānaŋa mo haka manaꞌu atu o ruŋa o te aha rā tātū e vānaŋa era.

   •   Ka pāpaꞌi taꞌa meꞌe i aŋi-aŋi o ruŋa i te ꞌaꞌamu. Mo haꞌaauraꞌa atu, mo taiꞌo ōꞌou o ruŋa i te kope i haka tere riva-riva rō i a ia, ka pāpaꞌi he aha tāꞌana meꞌe i aŋa ꞌe he aha te hauhaꞌa i ravaꞌa o te haka tere pē ira.

   •   Ka pāpaꞌi i te ꞌaꞌamu pa he meꞌe era e haka ꞌite ꞌā koe i te parau ꞌāpī. Ka manaꞌu ꞌi muri i a rāua koe ꞌai ka ꞌui-ꞌui taꞌa meꞌe haŋa ꞌāꞌau mo ꞌite o ruŋa i rā ꞌaꞌamu ꞌe ꞌai ka pāpaꞌi rō.

   •   Mo ai e tahi kope o ruŋa i te ꞌaꞌamu e tahi ko aŋa ꞌā i te meꞌe taꞌe tano, ka haka topa tuꞌu manaꞌu ꞌāhani i aŋa i te meꞌe tano, ¿pē hē ka hopeꞌa era? Mo haꞌaauraꞌa atu, hora kī era a Pētero kai ꞌite a ia ko ai a Ietū (Marko 14:66-72). ¿He aha te meꞌe tano mau mo aŋa a Pētero ꞌi rā hora?

   •   Ka taiꞌo i te ꞌaꞌamu e tahi o ruŋa i te Pipiria ꞌe ki oti ka pāpaꞌi e tahi ꞌaꞌamu haka ꞌou hai meꞌe aŋi-aŋi era e koe mai ruŋa i rā ꞌaꞌamu. Pē ira ꞌā ka pāpaꞌi he aha taꞌa meꞌe i hāpī mai ruŋa i rā ꞌaꞌamu (Rōmano 15:4).

 Mo rara ōꞌou o ruŋa i te ꞌaꞌamu e tahi, meꞌe rahi nō atu te meꞌe riva-riva ꞌāꞌau mo ravaꞌa mai ruŋa. Hai vānaŋa nō e tahi he ravaꞌa koe i te meꞌe ꞌāpī mo hāpī mai ruŋa.

 Mo haꞌaauraꞌa atu, ka taiꞌo Māteo 28:8 ꞌe Marko 16:7.

•    ¿ꞌO te aha a Marko i pāpaꞌi ai he piri a Ietū ki tāꞌana pukuraŋa ꞌe pē ira ꞌā “ki a Pētero”?

•  Mo hāꞌūꞌū atu: ꞌIna a Marko o rā kona, tāꞌana meꞌe i pāpaꞌi ko te meꞌe ꞌaꞌamu era e Pētero ki a ia.

•  He taoꞌa o te Pipiria: ¿ꞌO te aha te māhatu o Pētero i haumārū ai hora ꞌite era ko haŋa ꞌā a Ietū mo piri ki a ia? (Marko 14:66-72). ¿Pē hē a Ietū i haka takeꞌa ai pē nei ē, a Pētero he repahoa mau ꞌāꞌana? ¿He aha taꞌa meꞌe mo aŋa mo riro he repahoa riva pē Ietū ꞌā?

 Mo haka tuꞌu pa he meꞌe ena ꞌi roto i te ꞌaꞌamu a koe ꞌe mo rara tētahi atu meꞌe o te ꞌaꞌamu, he koa koe ꞌi te hora ka taiꞌo era i te Pipiria ꞌe he pohe koe mo taiꞌo mo oho nō.