Te ꞌAtua e takeꞌa rō ꞌā i te meꞌe taꞌatoꞌa ꞌe tōꞌona mana pūai ꞌina e tahi kona mo taꞌe tuꞌu (Proverbios 15:3; ꞌEvereo 4:13). Nō atu rā meꞌe ꞌina he Pipiria he hāpī pē nei ē, te ꞌAtua ꞌi te taꞌatoꞌa kona ꞌe ꞌi te taꞌatoꞌa meꞌe. Te meꞌe hāpī mai e te Pipiria, e ai rō ꞌā te kona noho o te ꞌAtua.

•   Pē hē te huru o te ꞌAtua: A ia he kuhane e tahi (Iovani 4:24). ꞌO ira ꞌina e tahi taŋata mo riva mo takeꞌa i te ꞌAtua (Iovani 1:18). Te uruŋa pāpaꞌi era ꞌi ruŋa i te Pipiria e haka takeꞌa rō ꞌā, e ai mau rō ꞌā te kona noho o te ꞌAtua. Te Pipiria ꞌina he kī ꞌi te taꞌatoꞌa kona te ꞌAtua e noho ena (Isaías 6:1, 2; Meꞌe Haka Takeꞌa 4:2, 3, 8).

•   Te kona noho o te ꞌAtua: Te Pipiria e kī rō ꞌā ꞌi te aro noho era o te merahi ꞌi ira te kona noho o te ꞌAtua. ꞌE te kona nei e topa kē rō ꞌana mai te meꞌe taꞌatoꞌa aŋi-aŋi nei e tātou. ꞌI rā aro e ai rō ꞌā tōꞌona kona mo noho (1 Reyes 8:30). ꞌI ruŋa i te Pipiria e ꞌaꞌamu rō mai ꞌā o ruŋa i te mahana e tahi oho era te merahi ki te kona noho o Iehoha a mo piri ki a ia ꞌe te ꞌaꞌamu nei he haka aŋi-aŋi mai e ai mau rō ꞌā te kona noho o te ꞌAtua (Job 1:6).

Mo ai ꞌina a Iehoha ꞌi te taꞌatoꞌa kona, ¿e riva rō mo hāpaꞌo mai?

 Nō atu tōꞌona kona noho ko te aro era o te merahi, te ꞌAtua e tapa riva-riva rō ꞌā i a tātou, te nuꞌu noho ꞌi ruŋa i te henua. Te ꞌAtua e uꞌi rō ꞌā i te nuꞌu haꞌatura ki a ia ꞌe he hāꞌūꞌū ki a rāua (1 Reyes 8:39; 2 Crónicas 16:9). Pē hē te ꞌAtua e hāpaꞌo ꞌe e tapa ena i a tātou:

•   ꞌI te hora pure o tātou: A Iehoha e haka roŋo rō ꞌā i a tātou e pure ena ki a ia (2 Crónicas 18:31).

•   ꞌI te hora e mamae rahi ena i te tātou māhatu: “ꞌI muri i te taŋata ko rahi ꞌā te mamae o tōꞌona māhatu, a Iehoha e noho ena; ꞌe he haka haŋu i te taŋata e manaꞌu era ꞌina ōꞌona rāveꞌa toe” (Salmo 34:18).

•   ꞌI te hora e haŋa ena koe mo aŋa i te meꞌe e tahi: Hai tāꞌana vānaŋa ena he Pipiria a Iehoha e haka mārama-rama ena i a tātou ꞌe pē ira ꞌā, he haka takeꞌa mai i te ara tano mo hāꞌere o tātou (Salmo 32:8).

Te manaꞌu hape o ruŋa i te kona noho o te ꞌAtua

 Kē nuꞌu e manaꞌu rō ꞌā: ꞌI te meꞌe era ꞌi ruŋa i a Salmo 139:8 e kī rō ꞌana: “Mo iri ōꞌoku ki ruŋa ꞌi te raŋi ꞌi ira koe ꞌe mo piko ōꞌoku ꞌi raro nui o te rua ꞌi ira takoꞌa koe”, te taŋata e manaꞌu ena te ꞌAtua ꞌi te taꞌatoꞌa nō kona.

 Te parautiꞌa mau: Te haꞌaauraꞌa mau o te kupu vānaŋa nei o Salmo, he kī nō e tahi mo haꞌaauraꞌa mai e riva nō te ꞌAtua mo hāꞌūꞌū mai nō atu te tātou kona noho.