ꞌĒ-ē, te ꞌAtua e uꞌi rō ꞌā i tāꞌana taŋata era ko māui-ui ꞌā, ꞌe o ruŋa i te meꞌe nei te Pipiria e kī rō ꞌā, mo ai ko moe ꞌā koe i ruŋa i te roꞌi i te māui-ui mā Iehoha koe e hāpaꞌo (Salmo 41:3). Mo ai ko rahi ꞌā te matahiti o tou māui-ui e ai rō ꞌana e toru rāveꞌa mo hāꞌūꞌū atu:

1.   E pure ki te ꞌAtua mo vaꞌai atu hai haŋu mo haka ꞌuhu. Mo aŋa koe pē ira “he vaꞌai atu e te ꞌAtua i te haumarū” (Fīripo 4:6, 7). ꞌE mo nā haumarū e hāpaꞌo i tuꞌu manaꞌu o tipa-tipa haka ꞌou rō koe. Takoꞌa, he haka haŋu koe e te ꞌAtua.

2.   ꞌIna ko hōriŋa. Te Pipiria e kī rō ꞌā: “Te māhatu koa pa he raꞌau e haka ora ena i tuꞌu māui-ui, ꞌe mo hōriŋa ōꞌou he kore tuꞌu haŋu” (Proverbios 17:22). Mo koa ꞌe mo kata ōꞌou he haka kore tuꞌu hōriŋa ꞌe he hāꞌūꞌū atu mo ai ko māui-ui ꞌā koe.

3.   Ka haka hio-hio te manaꞌu ki te meꞌe kī e te ꞌAtua mo piri mai pe muꞌa ka oho ena. Mo manaꞌu o tātou ki te meꞌe era ka piri mai ena pe muꞌa ka oho ena, he hāꞌūꞌū mai mo koa o tātou i te hora era o te māui-ui (Rōmano 12:12). Te Pipiria e kī rō ꞌā nā e tuꞌu rō te mahana “ꞌina e tahi taŋata e ko kī: “Ko māui-ui ꞌā au”” (Isaías 33:24). Te ꞌAtua he haka kore tahi te ŋā māui-ui era kai riva ꞌā i te taŋata mo haka kore. Pē ira ꞌā he ꞌāpī haka ꞌou te taŋata, te Pipiria e kī rō ꞌā: “He hoki tōꞌona hakari he ꞌāpī haka ꞌou, he ai haka ꞌou te haŋu pa he hora era e ꞌāpī nō ꞌā” (Job 33:25).

 Mo haka ꞌite atu: te Taŋata haka ꞌite o ruŋa o Iehoha, ko ꞌite ꞌā e hāꞌūꞌū rō te ꞌAtua ki te nuꞌu māui-ui, no atu rā meꞌe e oho rō ꞌā ki te taote mo ai ko māui-ui ꞌā (Marko 2:17). Te meꞌe nō ꞌina rāua he kī atu ko raꞌau hē te raꞌau mo unu ōꞌou, māꞌau ꞌā e uꞌi te raꞌau ꞌe te rāveꞌa mo ora ōꞌou.