1 Kōrinto 12:1-31
12 E te taina, e haŋa rō ꞌana a au mo aŋi-aŋi riva-riva e kōrua o ruŋa i te meꞌe vaꞌai mai e te Vārua Maitai ki a tātou, ki te nuꞌu ⸤haka moe i te manaꞌu⸥ ꞌi ruŋa i a Ietū, mo aŋa i te aŋa o te ꞌAtua.
2 A kōrua ko ꞌite riva-riva ꞌana: hora era kai haka moe ꞌana i te manaꞌu ꞌi ruŋa i a Ietū, e haka rē nō ꞌana a kōrua i a kōrua mo haꞌamuri ki te ꞌītoro, ki te meꞌe reꞌo kore.
3 ꞌO ira e haŋa ꞌana a au mo ꞌite o kōrua: ꞌina e tahi kope haka tere e te Vārua Maitai tohu i a Ietū, ꞌe ꞌina e tahi kope taꞌe o te Vārua Maitai te haka tere kī: a Ietū he Pūꞌoko Haka Tere ōꞌona.
Rauhuru te meꞌe vaꞌai mai e te Vārua Maitai
4 ꞌI roto i a tātou i te nūnaꞌa taŋata haka moe i te manaꞌu ꞌi ruŋa i a Ietū e ai rō ꞌā huru kē huru kē te meꞌe vaꞌai mai mo aŋa i te aŋa o te ꞌAtua. Ka ai atu pē ira, o te kope mau nō e tahi te vaꞌai mai, o te Vārua Maitai.
5 E ai takoꞌa rō ꞌā rauhuru rāveꞌa mo tāvini. Ka ai atu pē ira, ki te kope mau nō e tahi e tāvini ena, ki a Ietū Kiritō, he Pūꞌoko Haka Tere o tātou.
6 ꞌE, huru kē huru kē te meꞌe aŋa e tātou hai pūai o te ꞌAtua. Ka ai atu pē ira, o te kope mau nō e tahi te vaꞌai mai i rā pūai, o te ꞌAtua.
7 Hai meꞌe vaꞌai mai mo aŋa i te aŋa o te ꞌAtua e takeꞌa ena: o te Vārua Maitai te haka tere i a tātou. ꞌE nei ŋā meꞌe i vaꞌai mai ai ki a tātou e tahi e tahi mo te riva-riva o te nuꞌu taꞌatoꞌa haka moe i te manaꞌu ꞌi ruŋa i a Ietū.
8 O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata.
9 O te Vārua Maitai te vaꞌai ki te tētahi taŋata i te pūai mo ꞌata haka moe i tōꞌona manaꞌu ꞌi ruŋa i a Ietū, ꞌe ki te tētahi haka ꞌou atu i te pūai mo haka ora i te māui-ui.
10 E ai rō ꞌā te nuꞌu i a rāua te pūai vaꞌai e te Vārua Maitai mo aŋa i te mana, ꞌe te nuꞌu i a rāua te pūai mo vānaŋa i te meꞌe haka ꞌite e te ꞌAtua. Ki te tētahi nuꞌu i vaꞌai ai e te ꞌAtua i te pūai mo ꞌite hoki te meꞌe vānaŋa e te rua he roŋo mau ꞌā o te ꞌAtua ꞌo he meꞌe o te tātane. ꞌE ki te tētahi haka ꞌou nuꞌu i vaꞌai ai i te pūai mo vānaŋa hai ꞌarero kē taꞌe ꞌite e rāua, ꞌe ki te tētahi haka ꞌou atu te pūai mo haka ꞌite i te auraꞌa o te vānaŋa kī hai rā ꞌarero.
11 O te Vārua Maitai mau ꞌā e tahi mau nō te vaꞌai i te ŋā meꞌe taꞌatoꞌa nei, ꞌe ꞌāꞌana te vaꞌai ki te kope nō era ꞌāꞌana i haŋa.
12 Te hakari, ka ai atu e rahi rō ꞌā te kona, he meꞌe mau nō e tahi. Pē ira takoꞌa te Kiritō koia ko te nuꞌu taꞌatoꞌa haka moe i te manaꞌu ꞌi ruŋa i a ia he meꞌe e tahi mau nō.
13 Taꞌatoꞌa o tātou ko ⸤papatito⸥ tahi ꞌana hai tū Vārua ꞌā mo riro he hakari mau nō e tahi, ka ⸤hūrio⸥, ka taꞌe hūrio, ka ꞌekaravo, ꞌe ka taꞌe ꞌekaravo. ꞌE ki te taꞌatoꞌa o tātou ko vaꞌai mai ꞌana i tū Vārua Maitai ꞌā.
14 Te hakari meꞌe rahi nō atu kona, taꞌe e tahi mau nō.
15 Mo kī o te vaꞌe pē nei ē: «ꞌI te taꞌe ai ōꞌoku he rima, taꞌe ia a au he kona o te hakari», taꞌe ꞌo te kī pē ira ana taꞌe ai o te hakari.
16 ꞌE mo kī o te tariŋa pē nei ē: «ꞌI te taꞌe ai ōꞌoku he mata, taꞌe a au o te hakari», taꞌe ꞌo te kī takoꞌa pē ira ana taꞌe ai o te hakari.
17 ꞌĀhani te hakari taꞌatoꞌa he mata, e ko ŋaroꞌa e tātou te vānaŋa. ꞌE ꞌāhani i ai he tariŋa, e ko ŋaroꞌa e tātou te hauꞌa.
18 Te ꞌAtua meꞌe rahi nō atu kona o te hakari i aŋa ai ꞌe i haka rē ai i rā ŋā kona ꞌi te kona manaꞌu e ia e tano rō ꞌā.
19 ꞌĀhani e tahi mau nō kona o te hakari, taꞌe ia he hakari.
20 Ka ai atu meꞌe rahi kona o te hakari, te hakari he meꞌe e tahi mau nō.
21 Te mata e ko tano mo kī ki te rima: «¿Mo aha koe ꞌāꞌaku?», ꞌe mo kī takoꞌa pē ira e te pūꞌoko ki te vaꞌe.
22 Te parautiꞌa, te ŋā kona ena o te hakari e tuꞌu rō ꞌana pa he kona rehe-rehe, taꞌe hauhaꞌa, he kona hopeꞌa o te hauhaꞌa mo te hakari.
23 Te kona o te hakari manaꞌu e tātou e ko tano mo takeꞌa, he ꞌapi riva-riva hai kahu;
24 ꞌe te kona ꞌina he ꞌati mo takeꞌa, ꞌina he hāpaꞌo pē ira. Te ꞌAtua ko popo ꞌana i te kona taꞌatoꞌa o te hakari ꞌi te rāua kona ꞌe ko vaꞌai mai ꞌana ki a tātou i te haŋa mo moꞌa ꞌe mo hāpaꞌo riva-riva i te kona manaꞌu e tātou ꞌina e tahi hauhaꞌa.
25 I aŋa ai pē ira mo aŋa tahi o rā ŋā kona pa he meꞌe mau nō e tahi ꞌe mo hāpaꞌo i a rāua.
26 E ꞌati ena e tahi kona o te hakari, taꞌatoꞌa nō kona o te hakari e maꞌu ena i rā ꞌati, ꞌe e moꞌa ena, taꞌatoꞌa nō e koa ena.
27 Te meꞌe nei ꞌāꞌaku e haŋa nei mo haka aŋi-aŋi atu: te nūnaꞌa taŋata haka moe i te manaꞌu ꞌi ruŋa i a Ietū he hakari o te ⸤Kiritō⸥, ꞌe e tahi e tahi o te nuꞌu nei he kona o rā hakari koia ko tāꞌana aŋa.
28 ꞌE te meꞌe haŋa o te ꞌAtua mo te hakari nei: he nuꞌu mo ⸤ꞌāpōtoro⸥, te raꞌe; he nuꞌu mo vānaŋa i te meꞌe haka ꞌite e ia, te rua; ꞌe te toru he maꞌori hāpī; takoꞌa he nuꞌu mo aŋa i te mana, he nuꞌu mo haka ora i te māui-ui, he nuꞌu mo hāꞌūꞌū ki te rua, he nuꞌu mo haka tika i te taŋata ꞌi te aŋa, ꞌe he nuꞌu mo vānaŋa i te ꞌarero kē taꞌe ꞌite e rāua.
29 ꞌE taꞌe taꞌatoꞌa o te nuꞌu haka moe i te manaꞌu ꞌi ruŋa i a Ietū he ꞌāpōtoro, ꞌe he nuꞌu vānaŋa i te meꞌe haka ꞌite e te ꞌAtua. Taꞌe taꞌatoꞌa he maꞌori hāpī ꞌe he nuꞌu aŋa i te mana.
30 Taꞌe taꞌatoꞌa e ai rō ꞌā te pūai mo haka ora i te māui-ui. ꞌE, takoꞌa, taꞌe taꞌatoꞌa e vānaŋa rō ꞌā i te ꞌarero kē taꞌe ꞌite e rāua, ꞌe taꞌe taꞌatoꞌa e ꞌite rō ꞌana mo haꞌaauraꞌa i te vānaŋa kī hai rā ꞌarero.
31 ꞌO ira, e haŋa tātou mo ai i a tātou te meꞌe hopeꞌa o te hauhaꞌa o te meꞌe vaꞌai e te Vārua Maitai mo aŋa i te aŋa o te ꞌAtua. ꞌE, hora nei, ꞌī a au he haka ꞌite atu i te meꞌe ꞌata hau rō atu i te hauhaꞌa ki tū ŋā meꞌe taꞌatoꞌa ena.
