1 Kōrinto 6:1-20
6 Mo ai o te taina e ai rō ꞌana tāꞌana ture mo te rua taina, ꞌina ko maꞌu i rā taina ki muꞌa o te nuꞌu pūꞌoko haka tere o te hare ture o te ao nei. Te meꞌe mau mo aŋa he ani ki te tētahi taina haꞌataꞌa e te ꞌAtua māꞌana mo hāꞌūꞌū i a ia.
2 ¿Kai ꞌite ꞌana ꞌō kōrua: pe muꞌa ka oho ena, mo tātou mo te nuꞌu haꞌataꞌa e te ꞌAtua e ture i te nuꞌu o te ao nei? ꞌE, mo ai pē ira, ¿e ko ravaꞌa mau ꞌō e kōrua ꞌi te hora nei mo haka riva-riva i te ture ꞌiti-ꞌiti e tahi?
3 ¿Kai ꞌite takoꞌa ꞌana ꞌō kōrua: pe muꞌa ka oho ena ꞌātā ki te merahi ka ture ena e tātou? ¿Pē hē ia ana taꞌe tano i a tātou mo ture i te meꞌe ꞌiti-ꞌiti o te ao nei?
4 Mo ai tāꞌue o te kōrua ture, e ko tano mo maꞌu o kōrua i te kōrua taina ki muꞌa o te nuꞌu taꞌe haka moe i te manaꞌu ꞌi ruŋa i a Ietū mo haka kore o te ture.
5 Te vānaŋa nei e kī atu ena mo haꞌamā o kōrua. E tuꞌu rō ꞌana, paꞌi, pa he meꞌe ena ē: ꞌina he kope mārama-rama o roto i a kōrua mo haka kore i te kōrua ture.
6 ꞌE ko te horo ko te oho iŋa ꞌana kōrua i a kōrua ꞌā ki te pūꞌoko haka tere o te hare ture taꞌe haka moe i te manaꞌu ꞌi ruŋa i a Ietū.
7 Te ai te oho nō o te ture ꞌi roto i a kōrua e takeꞌa ena ko rē atu ꞌana ki a kōrua te manaꞌu taꞌe tano. Te meꞌe mau o kōrua mo aŋa he haꞌaoromaꞌi i te kope aŋa atu i te meꞌe taꞌe tano ꞌe toke atu i a kōrua.
8 ꞌE te meꞌe aŋa oho nō e kōrua he meꞌe taꞌe tano ꞌe he toke, ꞌātā i te meꞌe o te kōrua taina.
9 ¿Kai ꞌite ꞌana hō kōrua: te nuꞌu aŋa i te meꞌe taꞌe tano ki te mata o te ꞌAtua e ko oꞌo ki roto i te nūnaꞌa taŋata haka tere e ia? ꞌIna kōrua ko reo-reo ki a kōrua ꞌā. ꞌIna, paꞌi, o roto i te nūnaꞌa taŋata haka tere e te ꞌAtua te nuꞌu moe i te viꞌe i te taŋata taꞌe he viꞌe ꞌo taꞌe he kenu ꞌāꞌana, ꞌina he nuꞌu haꞌamuri ki te ꞌītoro, he nuꞌu taiꞌata, he ŋāŋata haꞌariro i a rāua pa he viꞌe, he hiku, he toke-toke, he nuꞌu nou-nou, he nuꞌu rava taꞌero, he nuꞌu vānaŋa taꞌe tano mo te rua, ꞌe he nuꞌu toke i te rua hai reo-reo.
10 —
11 Tētahi o kōrua i aŋa rō i te ŋā meꞌe nei ꞌi muꞌa ꞌā. ꞌE, hora nei, ꞌi te ai o te tātou Pūꞌoko Haka Tere ko Ietū Kiritō hai haka moe i te manaꞌu ꞌi ruŋa i a ia, te ꞌAtua ko haka kore ꞌana i te kōrua hara, ko haꞌataꞌa ꞌana i a kōrua māꞌana, ꞌe ko haka riro ꞌana he nuꞌu tano ki tōꞌona mata ꞌi te ai o te ⸤Vārua Maitai⸥ ꞌi roto i a kōrua.
Te tātou hakari mo tāvini ki a Ietū
12 Mo kī o te kope e tahi o roto i a kōrua pē nei ē: «A mātou, te nuꞌu haka moe i te manaꞌu ꞌi ruŋa i a Ietū, ꞌina e tahi meꞌe taꞌe haꞌatiꞌa i a mātou mo aŋa i te meꞌe nō era o mātou i haŋa ꞌo te ai taꞌe hai haka tano ki te ⸤haka tere iŋa ꞌa Mōtē⸥ e tano nei mātou ki te mata o te ꞌAtua», he aŋi mau ꞌana tāꞌana meꞌe kī. Ka ai atu pē ira, taꞌe taꞌatoꞌa meꞌe mo aŋa e tātou he meꞌe mo te tātou riva-riva. A au mau nei ꞌā, ka ai atu ꞌina he meꞌe taꞌe haꞌatiꞌa i a au mo aŋa i tāꞌaku meꞌe haŋa, ꞌina a au he aŋa e tahi meꞌe mo ai ka hopeꞌa era he haka tere mai i a au e rā meꞌe.
13 ꞌE mo kī o te rua kope pē nei ē: «Te ꞌAtua i aŋa ai i te tātou kōpū mo te kai ꞌe te kai mo te kōpū», he aŋi takoꞌa ꞌā tāꞌana vānaŋa, ka ai atu pe muꞌa ka oho ena e ko ai haka ꞌou pē ira. Te meꞌe nō, ꞌina kōrua ko manaꞌu: pē ira takoꞌa ꞌana te hakari. Te ꞌAtua, paꞌi, kai aŋa i te hakari mo moe i te viꞌe ꞌo i te taŋata taꞌe he kenu taꞌe he viꞌe; i aŋa ai e te ꞌAtua mo tāvini ki te tātou Pūꞌoko Haka Tere ko Ietū Kiritō, ꞌe tāꞌana meꞌe haŋa he hāpaꞌo o tātou i te hakari.
14 ꞌE pe muꞌa ka oho ena, he haka ora e te ꞌAtua i a tātou mai te mate hai pūai ōꞌona, pa he haka ora iŋa era e ia i a Ietū, Pūꞌoko Haka Tere o tātou.
15 A kōrua ko ꞌite ꞌana: te kōrua hakari he ŋā kona ena o te hakari o Ietū. Iā. ¿E toꞌo mau rō ia a kōrua i te kona e tahi o te hakari o te ⸤Kiritō⸥ ꞌe he haka riro he kona o te hakari o te viꞌe taiꞌo? ¡ꞌIna!
16 Hora ena o te taŋata e piri ena ki te taiꞌo, he riro ararua e tahi mau nō hakari, pa he meꞌe kī ꞌi ruŋa i te ⸤Pāpaꞌi Moꞌa⸥: «Ararua he riro e tahi mau nō hakari».
17 ꞌIna ko rehu, te kope o te Kiritō e tahi mau nō vārua ararua.
18 ꞌO ira, e hāpaꞌo kōrua e te hara he moe i te viꞌe i te kenu taꞌe o kōrua. Te kope moe i te viꞌe i te kenu taꞌe ꞌāꞌana e hara ꞌana ki tōꞌona hakari ꞌe ki tōꞌona vārua. ꞌE ꞌina he rua hara hopeꞌa o te taparahi-taꞌata tōtōā i te taŋata pa he hara nei.
19 ꞌIna ko rehu, te tātou hakari pa he Kona Haꞌamuri o te Vārua Maitai vaꞌai mai e te ꞌAtua, ꞌe ꞌi roto e noho ena a ia. A tātou taꞌe o tātou ꞌā, o te ꞌAtua.
20 Ko ꞌauhau ꞌana, paꞌi, e ia i a tātou māꞌana ꞌi te hora mate era o Ietū ꞌi ruŋa i te tātaurō. ꞌO ira, te meꞌe taꞌatoꞌa aŋa e tātou hai hakari e takeꞌa e moꞌa rō ꞌana tātou i te ꞌAtua.
