1 Pētero 2:1-25
2 ꞌE hora nei, ꞌi te ai i a kōrua te ora ꞌāpī, e haka kore mai ruŋa i a kōrua te meꞌe taꞌatoꞌa taꞌe tano: te reo-reo, te haka tuꞌu i a kōrua pa he nuꞌu riva ꞌe rā riva a te haho ꞌā, te nou-nou ki te meꞌe o te rua, ꞌe te haꞌaꞌino.
2 E riro kōrua pa he ŋā poki poreko iho pohe ki te ū, te auraꞌa: e pohe kōrua ki te ū parautiꞌa mo te kōrua riva-riva, he vānaŋa o te ꞌAtua, mo haka pūai mo oho o te kōrua manaꞌu ꞌi ruŋa i te ꞌAtua ꞌātā ki te mahana ka toꞌo ena i a kōrua ki te raŋi pe muꞌa ka oho ena.
3 A kōrua ko ŋaroꞌa ꞌana i te ora o te riva rahi o te tātou Pūꞌoko Haka Tere ko Ietū Kiritō; ꞌo ira, e aŋa kōrua pē ira.
He nuꞌu haꞌataꞌa e te ꞌAtua māꞌana
4 E haka hāhine kōrua ki a ia, he māꞌea ora taꞌe haŋa era e te taŋata, māꞌea haꞌataꞌa e te ꞌAtua, ꞌe māꞌea hauhaꞌa rahi.
5 A kōrua takoꞌa pa he māꞌea ora, ꞌe te ꞌAtua, hai ŋā māꞌea ora ena ko kōrua, e aŋa mai ena i te kona mo haꞌamuri ki a ia. ꞌI roto a kōrua pa he ⸤oromatuꞌa⸥ haꞌataꞌa e ia māꞌana tūtia ki a ia i te meꞌe riva-riva haka poreko e te Vārua Maitai ꞌi roto i a kōrua, he tūtia koa ꞌāꞌana ꞌo te ai o kōrua ꞌa Ietū Kiritō.
6 Pē nei, paꞌi, e kī ena ꞌi ruŋa i te ⸤Pāpaꞌi Moꞌa⸥:«He haka tuꞌu au i te māꞌea e tahi ꞌi te kona era ko ⸤Tione⸥,he māꞌea matuꞌa haka noho hare, māꞌea haꞌataꞌa e au ꞌe māꞌea hauhaꞌa rahi.Te kope ⸤haka moe i te manaꞌu⸥ ꞌi ruŋa,e ko manaꞌu ki te hora hopeꞌa ko hape ꞌana ꞌō a ia».
7 Mo kōrua mo te nuꞌu haka moe i te manaꞌu ꞌi ruŋa i a Ietū, te māꞌea ena māꞌea hauhaꞌa rahi. ꞌE mo te nuꞌu taꞌe haka moe i te manaꞌu ꞌi ruŋa i a ia, e kī ena ꞌi ruŋa i te Pāpaꞌi Moꞌa pē nei ē:«Te māꞌea taꞌe haŋa era e te nuꞌu aŋa hare,ko riro ꞌana he māꞌea matuꞌa haka noho hare».
8 ꞌE e kī takoꞌa ena:
«He māꞌea e tahi ꞌi ruŋa ka tu-tuki ena».
Te nuꞌu taꞌe haka moe i te manaꞌu ꞌi ruŋa i a Ietū e tu-tuki ena ꞌo te taꞌe haꞌatura ki te roŋo o te ꞌAtua, he meꞌe mau ꞌana mo topa ki te nuꞌu taꞌe haka roŋo.
9 ꞌE a kōrua he huaꞌai toꞌo e te ꞌAtua, he oromatuꞌa aŋa ki te ꞌariki, he nuꞌu haꞌataꞌa māꞌana, ꞌe he taŋata haka tere e ia. Te ꞌAtua, kope haka eꞌa i a kōrua mai roto i te pōhāhā o te meꞌe taꞌe tano mo oꞌo ki roto i tōꞌona mōrī nui-nui ena, i haꞌataꞌa ai i a kōrua mo haka ꞌite mo oho o ruŋa i te meꞌe nui-nui aŋa e ia.
10 ꞌI muꞌa ꞌana taꞌe kōrua he nuꞌu o te ꞌAtua, ꞌe hora nei he nuꞌu ꞌāꞌana; ꞌi muꞌa ꞌā kai ŋaroꞌa e kōrua i te riva rahi o te ꞌAtua, ꞌe hora nei e ŋaroꞌa rō ꞌana e kōrua.
E uꞌi te kōrua haka tere iŋa
11 E te taina, a kōrua pa he nuꞌu o te kona kē noho ꞌi te ao nei mo te hora ꞌiti-ꞌiti nō e tahi. ꞌO ira, ꞌina ko vaꞌai i a kōrua ki te meꞌe pohe nō o te hakari, he meꞌe haka tapa i a kōrua mai te ara o te ꞌAtua.
12 E noho kōrua ꞌina e tahi hape ꞌi roto i te nuꞌu taꞌe haŋa ki te ꞌAtua. Mo noho o kōrua pē ira, he takeꞌa e rā nuꞌu i te meꞌe riva-riva aŋa e kōrua ꞌe he haꞌahana-hana ki te ꞌAtua ꞌi te mahana ka kī era e ia i te meꞌe tano ꞌe i te meꞌe taꞌe tano aŋa e te taŋata, ka ai atu ꞌi te hora nei e kī rō ꞌana e rāua pē nei ē: a kōrua he nuꞌu aŋa i te meꞌe taꞌe tano.
E haꞌatura ki te nuꞌu ra-rahi
13 Pa he moꞌa iŋa i te tātou Pūꞌoko Haka Tere ko Ietū Kiritō ana haꞌatura kōrua i te nuꞌu ra-rahi taꞌatoꞌa. E haꞌatura kōrua ki te ꞌariki rōmano, i a ia te tōroꞌa hopeꞌa o te nui-nui,
14 ꞌe ki te suerekao uŋa e ia mo haka ūtuꞌa i te nuꞌu aŋa i te meꞌe taꞌe tano ꞌe mo haka paka mo haka nui-nui i te nuꞌu aŋa i te meꞌe tano.
15 Te ꞌAtua, paꞌi, e haŋa rō ꞌana mo aŋa o kōrua i te meꞌe riva-riva. Pē ira he ꞌapi i te haha o te nuꞌu maꞌa-maꞌa tuhi atu i te kōrua hape, he taꞌe haŋa mo aŋi-aŋi i te meꞌe o te ꞌAtua.
16 E noho kōrua pa he nuꞌu taꞌe haka tere e te meꞌe o te ao nei; te ꞌAtua, paꞌi, ko haka eꞌa ꞌana i a kōrua mai rā haka tere iŋa. ꞌE, ka ai atu pē ira, e uꞌi ꞌo riro te parautiꞌa nei he ꞌōtohe e tahi mo aŋa o kōrua i te meꞌe taꞌe tano. Te meꞌe haŋa mau: e noho kōrua pa he tāvini o te ꞌAtua.
17 E moꞌa kōrua i te taŋata taꞌatoꞌa. E haŋa ki te taina, e haꞌamuri ki te ꞌAtua ꞌe e moꞌa i te pūꞌoko haka tere o te kōrua henua.
Te meꞌe mo aŋa o te ꞌekaravo
18 E te ꞌekaravo, e haꞌatura ꞌe e moꞌa kōrua i te taŋata haka aŋa i a kōrua ka ai atu he taŋata riva ꞌo taꞌe riva.
19 Te ꞌAtua, paꞌi, e haꞌamaitai rō ꞌana i te kope ꞌamo ꞌe haꞌaoromaꞌi hai pūai i te ūtuꞌa taꞌe tano topa ꞌi ruŋa i a ia ꞌi te haŋa mo aŋa i te meꞌe tī-tika ki te mata o te ꞌAtua.
20 Te ꞌamo ꞌe te haꞌaoromaꞌi i te ūtuꞌa ꞌo te aŋa i te meꞌe taꞌe tano, ꞌina e tahi hauhaꞌa. ꞌE mo ꞌamo ꞌe mo haꞌaoromaꞌi hai pūai i te ūtuꞌa ꞌo te aŋa i te meꞌe tī-tika, he koa te ꞌAtua.
21 Mo nei meꞌe te ꞌAtua i haꞌataꞌa ai i a tātou. Te Kiritō, paꞌi, i ꞌamo rō pē ira i te ꞌati mo tātou, ꞌe pē ira i haka rē mai ai i te haꞌaauraꞌa pē hē a tātou ana haka tere.
22 Kai hara te ⸤Kiritō⸥ ꞌe kai reo-reo ki te hora hopeꞌa.
23 Hora vā-vā era i a ia, ꞌina he pāhono hai vānaŋa taꞌe tano, ꞌe hora tōtōā era, ꞌina kai kī i te vānaŋa mo haka riꞌa-riꞌa i te taŋata. Te meꞌe mau nō i aŋa he haka rē i a ia ki te rima o te ꞌAtua, kope ture hai tī-tika.
24 A Ietū i ꞌamo ai i te tātou hara ꞌi ruŋa i te tātaurō, ki haka rē ai a tātou i te aŋa i te meꞌe taꞌe tano, ꞌe ki tano ai te tātou noho iŋa ki te mata o te ꞌAtua. Hai ꞌamo e ia i te ꞌati i ora ai tātou.
25 ꞌI muꞌa ꞌā, paꞌi, e haꞌere era a tātou pa he māmoe ko ŋaro ꞌana, ꞌe, hora nei, ko hoki tahi ꞌana ki te Kiritō, kope hāpaꞌo mai i a tātou pa he taŋata hāpaꞌo māmoe.
