1 Pētero 5:1-14
5 Hora nei e haŋa rō ꞌana a au mo hatu ki te ŋā pūꞌoko haka tere ena o kōrua o te nuꞌu ⸤haka moe i te manaꞌu⸥ ꞌi ruŋa i a Ietū. A au he pūꞌoko haka tere takoꞌa, pē rāua, ꞌe he mataꞌite o te ꞌati topa era ꞌi ruŋa i te ⸤Kiritō⸥. Pē rāua e oꞌo takoꞌa rō a au ꞌi roto i tōꞌona nui-nui ka haka takeꞌa ena, te auraꞌa, i a au takoꞌa, pe muꞌa ka oho ena, te huru riva ōꞌona.
2 E te pūꞌoko haka tere, e hāpaꞌo riva-riva kōrua i te māmoe o te ꞌAtua haka hāpaꞌo atu ki a kōrua. ꞌE ana hāpaꞌo, hai māhatu, pa he meꞌe haŋa o te ꞌAtua, taꞌe ꞌō ꞌo te ai nō ꞌāꞌana i kī atu. E hāpaꞌo hai haŋa, taꞌe ꞌō hai pohe ki te moni.
3 ꞌIna ko manaꞌu: o kōrua rā māmoe haka hāpaꞌo atu era. Te meꞌe mo aŋa he haka takeꞌa ki a rāua pē hē a rāua ana haka tere hai haka tere iŋa tano ena o kōrua.
4 Pē ira, ꞌi te hora o te tuꞌu iŋa haka ꞌou mai o te Pūꞌoko Haka Tere o te ŋāŋata hāpaꞌo māmoe taꞌatoꞌa, he haka hei atu i a kōrua hai meꞌe ꞌina e ko ŋaro ki te hora hopeꞌa, ko te meꞌe ena: he noho mau rō ꞌai kōrua ꞌi muri i a ia ꞌi roto i tōꞌona nui-nui ꞌana-ꞌana.
He hatu mo te taꞌatoꞌa nō taina
5 ꞌE a kōrua, e te ŋā poki ꞌāpī ē, e haꞌatura ki te kōrua nuꞌu pūꞌoko haka tere. ꞌI roto i a kōrua i te nuꞌu haka moe i te manaꞌu ꞌi ruŋa i a Ietū ꞌina ko ai e tahi kope manaꞌu i hau rō atu a ia ki te rua ꞌo te ai:«Te ꞌAtua ꞌina he haka tano i te manaꞌu o te nuꞌu manaꞌu i hau rō atu rāua ki te tētahi,ꞌe ki te nuꞌu taꞌe manaꞌu pē ira, e hāꞌūꞌū ena hai riva rahi ōꞌona».
6 E haka hauhaꞌa-ꞌore kōrua i a kōrua ꞌi muꞌa i te pūai nui-nui o te ꞌAtua, ki haka nui-nui atu ai i a kōrua ꞌi te hora tano ki a ia.
7 E haka rē ꞌi te rima o te ꞌAtua te meꞌe taꞌatoꞌa haka mana-manaꞌu atu i a kōrua; e haŋa rō ꞌana, paꞌi, a ia mo hāpaꞌo atu i a kōrua.
8 E veveri e ꞌara kōrua; te kope taꞌe haŋa atu ena ko Rukifero, nā e kimi e oho ꞌana, pa he reone maruaki, ki te taŋata mo kai.
9 ꞌIna ko haꞌatiꞌa mo haka tere atu i a kōrua. E haka hio-hio e oho te kōrua haka moe iŋa i te manaꞌu ꞌi ruŋa i te ꞌAtua ꞌi te ꞌite pē nei ē: ꞌi te kona taꞌatoꞌa o te ao, e topa takoꞌa rō ꞌana te ꞌati tuꞌu pē ira ki te kōrua taina.
10 ꞌE ki oti i te haꞌaoromaꞌi tahi i te ꞌati topa atu ꞌi ruŋa i a kōrua, he meꞌe e ko roa rahi, he haka riro e te ꞌAtua i a kōrua he nuꞌu ꞌina e tahi hape, e hio-hio rō ꞌana te manaꞌu ꞌi ruŋa i a ia, nuꞌu pūai mo haꞌaoromaꞌi, ꞌe nuꞌu noho, ki te hora hopeꞌa, ꞌi te ara o te ꞌAtua. A ia, paꞌi, he ꞌAtua kī mai, ꞌi tōꞌona riva rahi, mo noho o tātou ꞌi muri i a ia ꞌina he hopeꞌa raꞌa ꞌi roto i tōꞌona nui-nui ꞌana-ꞌana hai haka moe o tātou i te manaꞌu ꞌi ruŋa i a Ietū Kiritō,
11 ꞌe ꞌAtua hopeꞌa o te pūai haka tere i te meꞌe taꞌatoꞌa ꞌina he hopeꞌa raꞌa. Ka ai pē ira.
He ꞌaroha
12 A Tirivano i hāꞌūꞌū mai mo pāpaꞌi atu i te parau nei. Mōꞌoku a ia he taina taꞌe haka rē i te ꞌAtua ki te hora hopeꞌa.
Tāꞌaku meꞌe ꞌiti-ꞌiti haka pāpaꞌi atu ena he meꞌe mo hatu ꞌe mo haka aŋi-aŋi atu pē nei ē: te riva rahi ꞌe te haŋa o te ꞌAtua ꞌi ruŋa i a kōrua. ꞌO ira, e uꞌi ꞌo hārui rō hai tuaꞌivi i tōꞌona haŋa mo kōrua.
13 Te nuꞌu haka moe i te manaꞌu ꞌi ruŋa i a Ietū o ⸤Vāvīrōnia⸥,* haꞌataꞌa e te ꞌAtua māꞌana, pa he haꞌataꞌa iŋa ena i a kōrua, ꞌī e ꞌaroha atu ena ꞌe pē ira takoꞌa ꞌana a Marko, he kope pa he poki ꞌā ꞌāꞌaku.
14 E ꞌaroha kōrua ki te kōrua taina hai māhatu.
Ka ai te haumārū ꞌi roto i a kōrua taꞌatoꞌa, e te nuꞌu o te Kiritō ē.
Notas
^ Te Vāvīrōnia ꞌi te kona nei ko Roma.
