1 Iovani 2:1-29
2 E te ŋā poki ꞌāꞌaku ē, e pāpaꞌi atu ena a au i te meꞌe nei ꞌo hara kōrua. ꞌE mo hara tāꞌue e tahi o kōrua, e ai rō ꞌana e tahi kope ꞌi muꞌa o te ꞌAtua mo vānaŋa mo te tātou ora ko Ietū Kiritō, ꞌe a ia he kope aŋa i te meꞌe tī-tika.
2 A Ietū i vaꞌai rō i a ia pa he tūtia mo tātou, ki haka kore ai e te ꞌAtua i te tātou hara, ꞌe taꞌe nō i te hara o tātou, i te hara takoꞌa o te nuꞌu taꞌatoꞌa o te ao.
He roŋo o te meꞌe he haŋa
3 A tātou e ꞌite nei e māhani rō ꞌana ki te ꞌAtua hai haꞌatura o tātou ki te roŋo o te ꞌAtua.
4 Te kope kī: «Ko māhani ꞌā a au i te ꞌAtua» ꞌe ꞌina he haꞌatura ki tāꞌana meꞌe kī, he reo-reo e tahi, ꞌe ꞌina he maꞌu i te roŋo parautiꞌa o te ꞌAtua.
5 ꞌE te kope haꞌatura ki tāꞌana vānaŋa, ko ia te kope haŋa parautiꞌa ki te ꞌAtua. E ꞌite nei: o te ꞌAtua mau ꞌā a tātou hai haꞌatura tātou ki a ia.
6 Te kope kī: ꞌi muri i te ꞌAtua a ia, e haka tere ia i a ia pē Ietū Kiritō.
7 E te taina, taꞌe o ruŋa i te roŋo ꞌāpī a au e pāpaꞌi atu ena, o ruŋa i te roŋo tuai, he roŋo ko ꞌite era ꞌana e kōrua mai te hora haka moe era ꞌā i te manaꞌu ꞌi ruŋa i a Ietū: e haŋa ki te rua.
8 ꞌE, ka ai atu pē ira, e haka ꞌite atu ena ꞌi nei roŋo pa he meꞌe ꞌāpī. Ko takeꞌa ꞌā, paꞌi, ꞌi ruŋa i a Ietū ꞌe ꞌi ruŋa i a kōrua. Hai haꞌatura ki te roŋo nei he ŋaro he oho te meꞌe he pōhāhā, ꞌe he māꞌeha he oho te hāpī parautiꞌa o te ꞌAtua pa he mōrī.
9 Te kope kī: ꞌi roto i te māꞌeha a ia, ꞌe te parautiꞌa mau e riri rō ꞌana mo tōꞌona taina, ko te noho iŋa ꞌana ꞌi roto i te pōhāhā.
10 Te kope haŋa hai māhatu ki tōꞌona taina, ꞌi roto i te māꞌeha e noho ena, ꞌe ꞌina e tahi meꞌe haka hara i a ia.
11 ꞌE te kope riri mo tōꞌona taina ꞌi roto i te pōhāhā e noho ꞌe e haꞌere ena, ꞌe ꞌina he ꞌite ki hē e oho ena, ꞌi te meꞌe era ꞌi te pōhāhā ꞌina he takeꞌa haka ꞌou.
E haŋa ki te ꞌAtua ꞌe taꞌe ki te meꞌe o te ao nei
12 E te ŋā poki ē, nuꞌu haka moe iho i te manaꞌu ꞌi ruŋa i a Ietū ē,e pāpaꞌi atu ena a au ꞌo te ai hai Ietū Kiritō te kōrua hara i haka kore ai e te ꞌAtua.
13 E te matuꞌa ē, nuꞌu paꞌari ꞌi te meꞌe o te ꞌAtua haka moe oho nō i te manaꞌu ꞌi ruŋa i a Ietū ē,e pāpaꞌi atu ena a au ꞌo te ai ko māhani ꞌana a kōrua i te kope ko ai era ꞌana ꞌi raꞌe ki te haꞌamata iŋa o te ao.E te ŋā poki ꞌāpī, nuꞌu pūai pa he ŋā poki ꞌāpī ꞌi te ⸤haka moe i te manaꞌu⸥ ꞌi ruŋa i a Ietū ē,e pāpaꞌi atu ena a au ki a kōrua ꞌo te ai ko rē ꞌana a kōrua ki a Rukifero.
14 I pāpaꞌi atu ai a au, e te nuꞌu haka moe iho i te manaꞌu ꞌi ruŋa i a Ietū ē,ꞌo te ai ko māhani ꞌā a kōrua ki te ꞌAtua Matuꞌa.I pāpaꞌi atu ai a au, e te nuꞌu paꞌari ꞌi te meꞌe o te ꞌAtua ē,ꞌo te ai ko māhani ꞌana a kōrua i te kope ko ai era ꞌana ꞌi raꞌe ki te haꞌamata iŋa o te ao.I pāpaꞌi takoꞌa atu ai a au, e te nuꞌu pūai pa he ŋā poki ꞌāpī ē,he hio-hio o te kōrua haka moe iŋa i te manaꞌu ꞌi ruŋa i a Ietū;e maꞌu rō ꞌana, paꞌi, kōrua i te vānaŋa o te ꞌAtua ꞌi roto i te kōrua māhatu,ꞌe ko rē ꞌana kōrua ki a Rukifero.
15 E te taina, ꞌina kōrua ko haŋa ki te ao haka tere hai manaꞌu taŋata ꞌe ki te meꞌe vaꞌai mai. Mo haŋa o kōrua, ꞌina ia kōrua he haŋa ki te ꞌAtua Matuꞌa
16 ꞌo te ai pē nei ē: te meꞌe vaꞌai mai e te ao haka tere hai manaꞌu taŋata taꞌe mai te Matuꞌa i oho mai ai, mai te ao mau nei ꞌā. ꞌE ko te ŋā meꞌe nei te meꞌe vaꞌai e te ao: he pohe ki te meꞌe haŋa nō e te hakari, he pohe ki te meꞌe takeꞌa e te mata ꞌe he haka manaꞌu i te taŋata: i a ia mau nō te tano ꞌo te ai ōꞌona he ꞌono.
17 ꞌE te ao haka tere hai manaꞌu taŋata nā e kore e oho ena koia ko tāꞌana meꞌe taꞌatoꞌa taꞌe tano. ꞌE te kope aŋa i te meꞌe haŋa e te ꞌAtua, i a ia te ora ꞌāpī ꞌina he hopeꞌa raꞌa.
ꞌIna ko haka tapa mai muri i a Ietū
18 E ŋā poki ē, ko te hora hopeꞌa era nei. Ko ŋaroꞌa ꞌana e kōrua nā e oho mai ena te kiritō reo-reo. ꞌE ꞌi te hora nei, ko ꞌata rahi mai ꞌana. Pē ira a tātou e ꞌite nei ko te hora hopeꞌa era nei.
19 A rāua mai roto i a tātou i eꞌa ai, ꞌe, ka ai atu pē ira, taꞌe a rāua o tātou. ꞌĀhani, paꞌi, o tātou ko noho mai ꞌana. Te meꞌe nei i topa ai mo takeꞌa riva-riva: taꞌe taꞌatoꞌa nuꞌu o roto i a tātou he nuꞌu o tātou.
20 ꞌE a kōrua ko haꞌataꞌa ꞌana e Ietū Kiritō māꞌana hai vaꞌai atu i te ⸤Vārua Maitai⸥. ꞌO ira a kōrua taꞌatoꞌa e ꞌite ena i te hāpī parautiꞌa.
21 E pāpaꞌi atu ena a au taꞌe ꞌo te taꞌe ꞌite o kōrua i te hāpī parautiꞌa, ꞌo te ai e ꞌite rō ꞌana e kōrua. ꞌE, ko ꞌite takoꞌa ꞌana e kōrua ꞌina e tahi reo-reo eꞌa mai roto i te hāpī parautiꞌa.
22 ¿Ko ai ia te kope reo-reo? He kope kī: a Ietū taꞌe he ⸤Kiritō⸥. Ko ia te kiritō reo-reo ꞌo te ai pa he taꞌe haŋa iŋa era ꞌā ōꞌona ki te ꞌAtua Matuꞌa, pē ira ꞌā e taꞌe haŋa takoꞌa ena ki tāꞌana Poki.
23 Te kope taꞌe haŋa ki te Poki, taꞌe a ia o te ꞌAtua Matuꞌa. ꞌE te kope kī: o te Poki a ia, o te ꞌAtua Matuꞌa takoꞌa a ia.
24 ꞌO ira, e hāpaꞌo ꞌe e haka tere kōrua hai hāpī ŋaroꞌa mai te hora haka moe era ꞌā i te kōrua manaꞌu ꞌi ruŋa i a Ietū. Mo aŋa pē ira, e ko topa kē a kōrua mai muri i te ꞌAtua Poki ꞌe mai muri i te ꞌAtua Matuꞌa.
25 ꞌE te meꞌe hōrea mai era e Ietū Kiritō ko te meꞌe nei: he ora ꞌāpī ꞌina he hopeꞌa raꞌa.
26 E pāpaꞌi atu ena a au i te ŋā meꞌe nei, ꞌo haka roŋo kōrua ki te nuꞌu reo-reo atu ꞌe ꞌo haka tapa kōrua mai te hāpī parautiꞌa.
27 ꞌIna ko rehu: a kōrua ko haꞌataꞌa ꞌā e Ietū Kiritō māꞌana hai vaꞌai atu i te Vārua Maitai, ꞌe taꞌe i te taŋata te vānaŋa hopeꞌa o ruŋa i te meꞌe o te ꞌAtua. Mo te Vārua Maitai e haka ꞌite atu o ruŋa i te meꞌe taꞌatoꞌa ꞌe tāꞌana hāpī he parautiꞌa, taꞌe he reo-reo. ꞌE, pa he meꞌe haka ꞌite atu e ia, ꞌina kōrua ko haka tapa mai muri i a Ietū Kiritō.
28 ꞌĒ-ē, ꞌina kōrua ko haka tapa. Ka haka noho nō kōrua, e ŋā poki ē, ꞌi muri i te Kiritō, ꞌo haꞌamā kōrua ꞌe ꞌo riꞌa-riꞌa ꞌi muꞌa i a ia ꞌi te hora o tōꞌona hoki iŋa mai.
He ŋā poki o te ꞌAtua
29 Ko ꞌite ꞌana e kōrua: a Ietū he kope aŋa i te meꞌe tī-tika. ꞌE e ꞌite takoꞌa: te nuꞌu taꞌatoꞌa aŋa i te meꞌe tī-tika he ŋā poki o te ꞌAtua.
