1 Iovani 4:1-21
4 E te taina, ꞌina kōrua ko manaꞌu he parautiꞌa te vānaŋa o te nuꞌu taꞌatoꞌa kī e vānaŋa ꞌana a rāua i te meꞌe haka vānaŋa e te ꞌAtua. Te meꞌe o kōrua mo aŋa he haka ꞌatu ana ai te vārua era ꞌi roto i a rāua o te ꞌAtua mau ꞌā; e rahi rō ꞌana, paꞌi, te perofeta reo-reo ꞌi te ao.
2 ¿Pē hē a kōrua ana aŋi-aŋi ko ai te kope i a ia te Vārua o te ꞌAtua? He kope nō era mo kī: a Ietū Kiritō pa he taŋata i oho mai ai, i a ia te Vārua o te ꞌAtua.
3 ꞌE te kope taꞌe kī pē ira o ruŋa i a Ietū, ꞌina i a ia te Vārua o te ꞌAtua; he vārua o te kiritō reo-reo te meꞌe i a ia. A kōrua i ŋaroꞌa rō i te vānaŋa e oho rō mai te vārua ena, ꞌe te parautiꞌa mau, ꞌī a ia ꞌi te ao nei.
4 E ŋā poki, o te ꞌAtua a kōrua, ꞌe ko rē ꞌana ki te ŋā haꞌavare era ꞌo te ai te Vārua ena i a kōrua ꞌata pūai ki te vārua o te ao nei.
5 A rāua o te ao nei. ꞌO ira e vānaŋa ena i te meꞌe o te ao nō nei, ꞌe te nuꞌu o te ao ki a rāua e haka roŋo ena.
6 ꞌE a tātou o te ꞌAtua. Te kope māhani i te ꞌAtua ki a tātou e haka roŋo mai ena, ꞌe te kope taꞌe o te ꞌAtua e ko haka roŋo mai. Hai meꞌe nei e ꞌite ena e tātou ko ai te kope i a ia te Vārua kī i te parautiꞌa ꞌe ko ai te kope i a ia te vārua kī i te reo-reo.
Hai haŋa ki te rua e ꞌite ena o te ꞌAtua a tātou
7 E te taina, e haŋa a tātou ki te rua ꞌo te ai te meꞌe he haŋa, mai te ꞌAtua e oho mai ena. Te nuꞌu taꞌatoꞌa haŋa ki te rua he ŋā poki o te ꞌAtua, ꞌe ko māhani ꞌā i a ia.
8 ꞌE te kope taꞌe haŋa ki te rua, ꞌina he māhani i te ꞌAtua; te ꞌAtua, paꞌi, he haŋa.
9 Ko haka takeꞌa mai ꞌana e te ꞌAtua i tōꞌona haŋa hai uŋa mai i tāꞌana Poki mau nō era e tahi ki te ao nei mo ravaꞌa e tātou te ora ꞌāpī ꞌina he hopeꞌa raꞌa hai ia.
10 Ko te meꞌe nei te meꞌe he haŋa parautiꞌa: he uŋa mai o te ꞌAtua i tāꞌana Poki pa he tūtia mo haka kore o te tātou hara, taꞌe ꞌō ko te haŋa nei o tātou ki a ia.
11 E te taina, mo ai pē ira te haŋa iŋa mai o te ꞌAtua ki a tātou, e haŋa takoꞌa a tātou ki te rua.
12 Ka ai atu ꞌina e tahi kope i takeꞌa i te ꞌAtua, mo haŋa o tātou ki te rua, he noho te ꞌAtua ꞌi roto i a tātou, ꞌe tōꞌona haŋa he takeꞌa ꞌi ruŋa i te tātou haka tere iŋa.
13 Te meꞌe haka ꞌite mai he parautiꞌa mau ꞌana ananake tātou ko te ꞌAtua ko te meꞌe nei: ko vaꞌai mai ꞌana e ia i tōꞌona Vārua.
14 ꞌE o mātou mau ꞌana i takeꞌa ꞌe i haka ꞌite pē nei ē: te Matuꞌa ko uŋa mai ꞌana i tāꞌana Poki mo eꞌa o te taŋata o te ao mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai ia.
15 Te kope kī: a Ietū he Poki o te ꞌAtua, ararua ko te ꞌAtua e noho ena.
16 Pē ira a tātou e ꞌite nei: te ꞌAtua e haŋa rahi rō mai ꞌana ꞌe tōꞌona haŋa iŋa mai e ko pau. Te ꞌAtua, paꞌi, he haŋa. Te kope noho ꞌi roto i te haŋa he kope haŋa ki te ꞌAtua ꞌe ki te rua, ꞌe ararua ko te ꞌAtua a ia e noho ena.
17 Hai haŋa ki te rua e takeꞌa ena e maꞌu rō ꞌana a tātou i te haŋa o te ꞌAtua ꞌi roto i te tātou māhatu. Pē ira, ꞌi te mahana o te ture hopeꞌa, e ko haꞌamā tātou ꞌi te meꞌe era te noho iŋa o tātou ꞌi te ao nei pa he noho iŋa era ꞌā o Ietū Kiritō.
18 Te kona ꞌi ira te haŋa, ꞌina he riꞌa-riꞌa. Te taŋata e riꞌa-riꞌa ena ꞌi te manaꞌu he haka ūtuꞌa i a rāua, ꞌe te haŋa parautiꞌa o te ꞌAtua he haka kore i te riꞌa-riꞌa. Te kope riꞌa-riꞌa ia, ꞌina kai aŋi-aŋi riva-riva ꞌā i te pūai o te haŋa o te ꞌAtua mōꞌona.
19 A tātou e haŋa nei ꞌo te ai ꞌi raꞌe te ꞌAtua i haŋa mai ai.
20 Mo kī o te kope e tahi: «E haŋa rō ꞌana a au ki te ꞌAtua» ꞌe ꞌina he haŋa ki tōꞌona taina, he reo-reo e tahi. Te taŋata taꞌe haŋa ki tōꞌona taina, he meꞌe takeꞌa e ia, ¿pē hē ia ana haŋa ki te ꞌAtua, he meꞌe taꞌe takeꞌa e ia?
21 He roŋo haka rē mai era nei e Ietū Kiritō: te kope haŋa ki te ꞌAtua e haŋa takoꞌa ki tōꞌona taina.
