1 Iovani 5:1-21
5 Nuꞌu nō era mo rāua he parautiꞌa mau ꞌā a Ietū he ⸤Kiritō⸥ he ŋā poki rāua o te ꞌAtua. ꞌE te kope haŋa ki te ꞌAtua Matuꞌa e haŋa takoꞌa ki tāꞌana ŋā poki.
2 Mo haŋa ia o tātou ki te ŋā poki o te ꞌAtua, he takeꞌa e haŋa parautiꞌa rō ꞌana tātou ki te ꞌAtua ꞌe e aŋa rō ꞌana tātou i tāꞌana meꞌe kī mai.
3 Te haŋa ki te ꞌAtua ko te meꞌe nei: he haꞌatura ki tāꞌana roŋo, ꞌe tāꞌana roŋo meꞌe taꞌe paŋahaꞌa.
4 A tātou, te ŋā poki o te ꞌAtua, e ko ravaꞌa e te ao haka tere hai manaꞌu taŋata mo haka tapa mai te ara o te ꞌAtua. Hai haka moe, paꞌi, o te tātou manaꞌu ꞌi ruŋa i a Ietū, e rē nei a tātou ki te ao nei.
5 ¿Ko ai ia te kope mo rē ki te ao nei? Te kope mōꞌona he parautiꞌa mau ꞌā a Ietū he Poki o te ꞌAtua.
6 Te ꞌAtua i haka takeꞌa ai pē nei ē: a Ietū Kiritō he Poki ꞌāꞌana, ꞌi te hora ⸤papatito⸥ hai vai, ꞌe ꞌi te hora pariŋi o tōꞌona toto ꞌi ruŋa i te tātaurō. Te ⸤Vārua Maitai⸥ he mataꞌite o te meꞌe nei, ꞌe tāꞌana meꞌe kī he parautiꞌa.
7 Hoko toru mataꞌite o te meꞌe nei:
8 he Vārua Maitai, he vai ꞌe he toto, ꞌe ko tū meꞌe ꞌā i mataꞌite ai a to-toru.
9 Mo haka roŋo o tātou ki te meꞌe kī ꞌe mataꞌite e te taŋata, ¿pē hē ia a tātou ana taꞌe haka roŋo ki te vānaŋa kī e te ꞌAtua o ruŋa i tāꞌana poki era ko Ietū?
10 Te kope haka moe i tōꞌona manaꞌu ꞌi ruŋa i te Poki o te ꞌAtua e ꞌite mau rō ꞌana ꞌi roto i tōꞌona māhatu a Ietū he Poki o te ꞌAtua. ꞌE te kope taꞌe haka moe i tōꞌona manaꞌu ꞌi ruŋa i te meꞌe kī e te ꞌAtua e kī ꞌana i te reo-reo o te ꞌAtua, he taꞌe haka roŋo i te vānaŋa o te ꞌAtua o ruŋa o tāꞌana Poki.
11 ꞌE ko te meꞌe nei te meꞌe i kī e te ꞌAtua: ko vaꞌai mai ꞌana e ia ki a tātou i te ora ꞌāpī ꞌina he hopeꞌa raꞌa, ꞌe nei ora i tāꞌana Poki.
12 Te kope i a ia te Poki o te ꞌAtua, i a ia te ora ꞌāpī nei, ꞌe te kope ꞌina he Poki o te ꞌAtua i a ia, ꞌina he ora ꞌāpī i a ia.
He meꞌe hopeꞌa
13 E pāpaꞌi atu ena a au i te meꞌe nei mo ꞌite o kōrua, e te nuꞌu ⸤haka moe i te manaꞌu⸥ ꞌi ruŋa i te Poki o te ꞌAtua ē: i a kōrua te ora ꞌāpī ꞌina he hopeꞌa raꞌa.
14 A tātou, te nuꞌu haka moe i te manaꞌu ꞌi ruŋa i a Ietū, ꞌina he riꞌa-riꞌa mo no-noꞌi ki te ꞌAtua, he ꞌite o tātou: te ꞌAtua e haka roŋo rō mai ꞌana i te meꞌe no-noꞌi e tātou ana tano rā meꞌe ki tōꞌona manaꞌu.
15 ꞌE, ꞌi te ꞌite e haka roŋo rō mai ꞌana te ꞌAtua ki te tātou pure, e ꞌite takoꞌa nei: ꞌī i a tātou te meꞌe no-noꞌi era.
16 Mo takeꞌa e tahi taŋata i tōꞌona taina e hara ꞌana, ꞌe rā hara taꞌe he hara mo haka ūtuꞌa i a ia hai mate, e pure mōꞌona, ꞌe mo te ꞌAtua e vaꞌai i te ora ꞌāpī ꞌina he hopeꞌa raꞌa ki rā taina. ꞌE nā e ai rō ꞌā e tahi hara he haka ūtuꞌa i a koe hai mate, ꞌe mo rā hara e ko kī atu e au e pure e kōrua.
17 Te meꞌe taꞌatoꞌa taꞌe tano he hara. Ka ai atu pē ira, e ai rō ꞌana te hara e ko haka ūtuꞌa i a koe hai mate.
18 Ko ꞌite ꞌana, paꞌi, e tātou ꞌina e tahi poki parautiꞌa o te ꞌAtua noho ꞌi roto i te hara. E hāpaꞌo rō ꞌana e te Poki o te ꞌAtua, ko Ietū Kiritō, ꞌe ꞌina e ko ravaꞌa mo haka puā e Rukifero.
19 A tātou ko ꞌite takoꞌa ꞌana: o te ꞌAtua a tātou, ka ai atu ꞌa Rukifero te haka tere i te ao nei.
20 ꞌE, ko ꞌite takoꞌa ꞌā e tātou: ko tuꞌu mai ꞌana te Poki o te ꞌAtua, ꞌe ko vaꞌai mai ꞌā i te mārama-rama mo aŋi-aŋi ko ai te ꞌAtua parautiꞌa. ꞌE hora nei, ananake tātou ko nei ꞌAtua ꞌo te ai a tātou o tāꞌana Poki ko Ietū Kiritō. A ia he ꞌAtua parautiꞌa vaꞌai i te ora ꞌāpī ꞌina he hopeꞌa raꞌa.
21 E ŋā poki, e uꞌi kōrua ꞌo haꞌamuri rō ki te meꞌe taꞌe he ꞌAtua parautiꞌa.
