2 Kōrinto 1:1-24
1 A au a Pauro, ⸤ꞌāpōtoro⸥ ꞌa Ietū Kiritō hai haŋa o te ꞌAtua, ꞌe te tātou taina nei ko Timoteo he ꞌaroha atu ki a kōrua ki te nūnaꞌa taŋata ⸤haka moe i te manaꞌu⸥ ꞌi ruŋa i a Ietū o Kōrinto, ꞌe ki te tētahi atu taina o te ŋā kona taꞌatoꞌa ena o Ākāia.
2 Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.
He māuru-uru
3 Ki haꞌahana-hana tātou ki te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia he Matuꞌa haka ꞌaroha i a tātou, ꞌe he ꞌAtua haka koa ꞌe haka pūai mai.
4 ꞌI roto i te tātou ꞌati taꞌatoꞌa he haka koa ꞌe he haka pūai nō mai te aŋa e ia, mo ꞌite takoꞌa o tātou mo haka koa ꞌe mo haka pūai i te nuꞌu e ai rō ꞌana te rāua ꞌati hai hāꞌūꞌū vaꞌai mau mai era ꞌā e ia.
5 Pa he rahi ena ꞌā, paꞌi, o te ꞌati ꞌamo e tātou ꞌo te ai o tātou o te ⸤Kiritō⸥, pē ira takoꞌa ꞌā te rahi o te haka koa ꞌe o te haka pūai mai e te ꞌAtua ꞌo te ai o tātou o te Kiritō.
6 Hora ena o mātou o te ꞌāpōtoro e ꞌamo ena i te ꞌati, he meꞌe mo te kōrua riva-riva, ꞌe, takoꞌa, mo ravaꞌa e kōrua i te ora ꞌāpī ꞌina he hopeꞌa raꞌa. ꞌE, hora ena o te ꞌAtua e haka koa e haka pūai mai ena i a mātou, he meꞌe mo kōrua takoꞌa. Pē ira mātou e ꞌite nei mo haka koa ꞌe mo haka pūai atu i a kōrua, mo haꞌaoromaꞌi o kōrua hai pūai i te ꞌati ꞌamo e tātou ꞌo te ai o tātou o te Kiritō.
7 ꞌE, ko ꞌite riva-riva ꞌana e mātou: pa he ꞌamo iŋa takoꞌa ena ꞌā o kōrua i te ꞌati, ka haka koa ꞌe ka haka pūai takoꞌa atu ena i a kōrua e te ꞌAtua.
8 E te taina, e haŋa rō ꞌā a mātou mo ꞌite o kōrua i te rahi o te ꞌati topa mai ki a mātou ꞌi ꞌĀtia. He ꞌati taparahi-taꞌata e tahi, ꞌati ena mo taꞌe haꞌaoromaꞌi, ꞌe ꞌātā i manaꞌu rō e mātou he mā-mate a mātou.
9 I tuꞌu mau rō pa he meꞌe ena ē: he mā-mate mau ꞌā a mātou ꞌi ira. I topa mai ai te meꞌe nei mo ꞌite o mātou: ꞌi ruŋa i te ꞌAtua mau nō, kope haka ora i te taŋata mai te mate, ana haka moe mātou i te manaꞌu, ꞌe taꞌe ꞌō ꞌi ruŋa i a mātou mau ꞌā.
10 ꞌE te ꞌAtua i haka eꞌa rō i a mātou mai rā ꞌati, ꞌe ko ꞌite ꞌā e mātou pē ira ka aŋa ka oho ena. ꞌĒ-ē, ko ꞌite riva-riva ꞌana e mātou pē ira ka aŋa ka oho mai ena.
11 Te meꞌe haŋa he hāꞌūꞌū he pure mai o kōrua mo te mātou aŋa. ꞌE mo rahi o te nuꞌu pure mo mātou, he rahi takoꞌa ia te nuꞌu māuru-uru ki te ꞌAtua o tōꞌona haꞌamaitai mai i a mātou.
He aha a Pauro i taꞌe oho ai ki Kōrinto
12 E te taina, e koa nei a mātou ꞌi te meꞌe era e haka ꞌite rō mai ꞌana e te mātou māhatu pē nei ē: te noho iŋa o mātou ꞌi roto i a kōrua ꞌe ꞌi roto i te taŋata taꞌatoꞌa hai moꞌa ꞌe hai parautiꞌa o te ꞌAtua. A mātou e haka tere nei hai haka moe i te manaꞌu ꞌi ruŋa i te riva rahi o te ꞌAtua, ꞌe taꞌe ꞌō hai mārama-rama o te taŋata.
13 ꞌE te meꞌe pāpaꞌi atu e mātou taꞌe he meꞌe mo taꞌe aŋi-aŋi e kōrua ana taiꞌo, he meꞌe mo aŋi-aŋi. Te meꞌe haŋa he aŋi-aŋi riva-riva e kōrua
14 i te mātou māhatu ꞌe i te mātou meꞌe aŋa, ki koa ai kōrua mo mātou, ꞌe pē ira takoꞌa ꞌana a mātou mo kōrua ꞌi te hora o te hoki iŋa mai o te tātou Pūꞌoko Haka Tere ko Ietū.
15 ꞌE he ꞌite ōꞌoku e koa rō ꞌana a kōrua mo mātou, i topa mai ai te manaꞌu mo hipa atu mo uꞌi i a kōrua ꞌi tōꞌoku ara ki Mātērōnia ꞌe, takoꞌa, ꞌi tōꞌoku hoki iŋa mai; pē ira e rua tātou koa iŋa. ꞌE ꞌi tōꞌoku hoki iŋa mai takoꞌa, e tano nō kōrua mo hāꞌūꞌū mai hai rāveꞌa mo tōꞌoku ara ki Hūrea, ana haŋa kōrua.
16 —
17 ꞌI te taꞌe oho atu ōꞌoku, kai haŋa a au mo manaꞌu o kōrua pē nei ē: a au he taŋata huri tahaŋa o te manaꞌu, ꞌo he taŋata kī, pa he nuꞌu o te ao nei, «ꞌē-ē», ꞌe te parautiꞌa o te rāua manaꞌu «ꞌina».
18 Te ꞌAtua he kope aŋa i tāꞌana meꞌe kī ꞌe he mataꞌite pē nei ē: a mātou takoꞌa. Mo kī atu o mātou «ꞌē-ē», ꞌē-ē mau ꞌā; ꞌe mo kī atu «ꞌina», ꞌina mau ꞌā.
19 A Ietū Kiritō, Poki era o te ꞌAtua, haka ꞌite atu era e au, e Tira ꞌe e Timoteo, kope taꞌe kī «ꞌē-ē» mo ꞌina, ꞌe «ꞌina» mo ꞌē-ē. A ia he ꞌē-ē mau ꞌā o te ꞌAtua;
20 hai ia, paꞌi, e haka tano tahi ena e te ꞌAtua i tāꞌana meꞌe hōrea. ꞌO ira, ꞌi te hora haꞌahana-hana o tātou ki te ꞌAtua e kī nei: «⸤ꞌĀmene⸥».
21 ꞌĀꞌana, paꞌi, te haka pūai i te tātou haka moe iŋa i te manaꞌu ꞌi ruŋa i te Kiritō, ꞌe te haꞌataꞌa i a tātou māꞌana.
22 Te ꞌAtua ko vaꞌai mai ꞌana i te ⸤Vārua Maitai⸥ pa he tāpaꞌo haka ꞌite mai: a tātou ꞌāꞌana. ꞌE, ꞌi te ai o te Vārua Maitai ꞌi roto i a tātou, e ꞌite nei: te meꞌe taꞌatoꞌa hōrea mai era e te ꞌAtua e haka tano tahi rō.
23 He ꞌAtua te meꞌe i ꞌite, e te taina ē, pē nei ē: a au i taꞌe tuꞌu atu ai mo uꞌi i a kōrua ꞌo ture atu a au o ruŋa i te meꞌe taꞌe tano aŋa e kōrua ꞌo mamae te kōrua māhatu ꞌi tāꞌaku vānaŋa.
24 Taꞌe, paꞌi, i a mātou te kī pē hē kōrua ana maꞌu i te kōrua haka moe iŋa i te manaꞌu ꞌi ruŋa i a Ietū. Te meꞌe i a mātou he hāꞌūꞌū atu mo ꞌata koa o kōrua. E ꞌite rō ꞌana, paꞌi, mātou e pūai rō ꞌana te kōrua haka moe iŋa i te manaꞌu.
