2 Kōrinto 10:1-18
10 E te taina, nā ꞌi roto i a kōrua te nuꞌu e haꞌaꞌino rō ꞌā i a au pē nei ē: ꞌi te hora ōꞌoku ꞌi muri i a kōrua, ꞌina a au he kī atu ki te kōrua ꞌāriŋa i te kōrua hape, ꞌe, ꞌi te hora mo pāpaꞌi atu, he ture nō atu tāꞌaku aŋa. ꞌO ira, a au, a Pauro, he ani atu hai haŋa ꞌe hai riva rahi o te ⸤Kiritō⸥:
2 Ka uꞌi ka haka tī-tika rō ꞌai te ŋā nuꞌu ena, nuꞌu manaꞌu: a mātou e haka tere nei hai manaꞌu taŋata mau nō, ꞌo tuꞌu atu au, he ture atu ki a kōrua ananake ko nā ŋā nuꞌu.
3 Ka ai atu a mātou he taŋata noho ꞌi te ao nei, taꞌe pa he taŋata o te ao nei e moto nei.
4 ꞌE te mātou meꞌe maꞌu mo moto taꞌe he meꞌe o te ao nei, he pūai o te ꞌAtua mo rē ki te manaꞌu taꞌatoꞌa poreko mai i a Rukifero taꞌe haka rē i te taŋata mo haka hāhine ki te ꞌAtua. Hai pūai nei o te ꞌAtua e rē nei mātou ki te manaꞌu o te nuꞌu taꞌe haŋa mai,
5 ꞌe pē ira takoꞌa ꞌā ki te manaꞌu o te nuꞌu teꞌo-teꞌo taꞌe haꞌatiꞌa i a rāua mo māhani ki te ꞌAtua. Pē ira e hāꞌūꞌū nei a mātou ki te nuꞌu mo huri ki te ꞌAtua ꞌe mo manaꞌu o rāua pa he meꞌe haŋa o te Kiritō.
6 ꞌE ki takeꞌa ia e mātou i te rahi raꞌa o kōrua e haꞌatura parautiꞌa mau rō ꞌā ki te meꞌe taꞌatoꞌa haŋa o te Kiritō, ꞌi rā hora he uꞌi mātou he haka ūtuꞌa i te nuꞌu o roto i a kōrua taꞌe haꞌatura ki a ia.
7 E haka topa te kōrua manaꞌu o ruŋa i te meꞌe ko ꞌite riva-riva ꞌā e kōrua o ruŋa i a mātou. Nā, paꞌi, ꞌi roto i a kōrua te nuꞌu kī: a rāua he tāvini parautiꞌa o te Kiritō. E ꞌite e te nuꞌu era: a mātou takoꞌa he tāvini o te Kiritō.
8 ꞌE mo ai tāꞌue i rahi rō tōꞌoku teꞌo-teꞌo iŋa atu: i a au te parau mo haka tere i a kōrua a te ara parautiꞌa o te ꞌAtua, e ko haꞌamā a au. O te tātou Pūꞌoko Haka Tere, paꞌi, i vaꞌai mai mo haka pūai atu i te kōrua haka moe iŋa i te manaꞌu ꞌi ruŋa i a ia, taꞌe ꞌō mo haka tapa i te kōrua manaꞌu mai ruŋa.
9 ꞌIna kōrua ko manaꞌu e haŋa ꞌana ꞌō a au mo haka riꞌa-riꞌa i a kōrua hai parau pāpaꞌi atu e au.
10 ꞌĪ a au e kī atu ena: nā ꞌi roto i a kōrua te nuꞌu kī: pūai riꞌa-riꞌa tāꞌaku vānaŋa ꞌi te hora pāpaꞌi atu, ꞌe, ꞌi te hora ꞌi muꞌa i a kōrua, e tuꞌu rō ꞌā pa he kope taꞌe pūai ꞌe taꞌe ꞌite mo tātara.
11 Te nuꞌu kī i te vānaŋa nei e ꞌite: pa he pūai ena ꞌā o te mātou huru ꞌi ruŋa i te parau pāpaꞌi atu ena, pē ira te mātou pūai ka takeꞌa ena e rāua ka tuꞌu atu ena a mātou, ka haka tano tahi ena i te mātou meꞌe kī.
12 Taꞌe mātou o roto o te nuꞌu teꞌo-teꞌo. Te nuꞌu nei, ꞌi te hora uꞌi hoki e tano rō ꞌā te rāua aŋa mo te ꞌAtua, e hāito ena hai meꞌe aŋa ꞌe manaꞌu e rāua mau ꞌā, taꞌe ꞌō hai manaꞌu o te ꞌAtua. ¡Te oho iŋa nei he meꞌe maꞌa-maꞌa e tahi!
13 A mātou, taꞌe pa he nuꞌu nei. ꞌI te hora vānaŋa o mātou o ruŋa i te mātou aŋa mo te ꞌAtua, e hāito rō ꞌana te mātou meꞌe kī ki te meꞌe haꞌatiꞌa nō mai e te ꞌAtua. ꞌE o te ꞌAtua te kī mai ꞌātā ki kona hē ana tuꞌu te mātou aŋa, ꞌe ꞌāꞌana te haꞌatiꞌa mai i a mātou mo tuꞌu atu ꞌātā ki a kōrua ena ꞌi Kōrinto.
14 ꞌO ira ꞌina a mātou he eꞌa mai te meꞌe haꞌatiꞌa mai e te ꞌAtua ꞌi te hora kī atu: i a mātou te parau mo haka tere i a kōrua a te ara o te ꞌAtua. ꞌĀhani mātou i taꞌe ai ꞌi roto i a kōrua ꞌi muꞌa ꞌā, ko eꞌa era ꞌā ia a mātou mai rā roa haꞌatiꞌa mai era e te ꞌAtua. ꞌE te parautiꞌa, ko mātou te nuꞌu raꞌe i haka ꞌite atu i te ⸤roŋo riva-riva o ruŋa i a Ietū Kiritō⸥.
15 ꞌE ꞌina takoꞌa a mātou he teꞌo-teꞌo ꞌi te aŋa o te rua, ꞌo eꞌa a mātou mai rā roa. Te mātou meꞌe haŋa he pūai he oho te kōrua haka moe iŋa i te manaꞌu ꞌi ruŋa i a Ietū, mo ꞌata rahi mo oho te mātou aŋa ꞌi roto i a kōrua.
16 E haŋa takoꞌa rō ꞌā a mātou mo oho mo haka ꞌite i te ⸤roŋo riva-riva o te ꞌAtua⸥ ꞌi te kona ꞌata roa mai te kona ena ꞌi ira a kōrua, hai kona ꞌina he kope raꞌe i hāpī, ꞌo teꞌo-teꞌo a mātou ꞌi te aŋa o te rua.
17 E kī rō ꞌā, paꞌi, ꞌi ruŋa i te ⸤Pāpaꞌi Moꞌa⸥: «Te kope haŋa mo haka paka i tāꞌana meꞌe aŋa, te tano mau: e haka paka i te meꞌe aŋa e te tātou Pūꞌoko Haka Tere».
18 Te kope koa o te ꞌAtua taꞌe he kope teꞌo-teꞌo kī pē nei ē: a ia e aŋa riva-riva rō ꞌā mo te ꞌAtua; he kope o ruŋa e kī ena e te ꞌAtua: «E koa rō ꞌana a au mōꞌona».
