2 Kōrinto 3:1-18
3 Taꞌe te mātou vānaŋa nei e haka paka atu ꞌana i a mātou. Taꞌe, paꞌi, mo mātou e vaꞌai atu i te parau vānaŋa riva-riva o ruŋa i a mātou, pe he tētahi atu nuꞌu, ꞌo mo ani atu ki a kōrua mo pāpaꞌi mai i te parau pē ira o ruŋa i a mātou mo ꞌite e te nuꞌu pē nei ē: te meꞌe aŋa e mātou he meꞌe tī-tika.
2 Ko kōrua, paꞌi, te mātou parau haka ꞌite ko ai a mātou pāpaꞌi ꞌi roto i te māhatu, te auraꞌa: hai uꞌi i te kōrua noho iŋa tano, e ꞌite ena e te taŋata taꞌatoꞌa: te meꞌe aŋa e mātou meꞌe riva-riva.
3 A kōrua he parau pāpaꞌi e te ⸤Kiritō⸥ hai mātou, parau taꞌe hai ꞌārahu i pāpaꞌi ai, hai ⸤Vārua Maitai⸥ o te ꞌAtua, ꞌe taꞌe ꞌi ruŋa i te māꞌea pa he roŋo pāpaꞌi e ⸤Mōtē⸥; i pāpaꞌi ai ꞌi roto i te māhatu o te taŋata.
4 E tano nei mo kī pē ira he ꞌite o mātou: o te ꞌAtua te hāꞌūꞌū mai hai Ietū Kiritō.
5 E ko tano mātou mo kī: hai mārama-rama mau ꞌā o mātou e aŋa nei; ko ꞌite riva-riva ꞌana, paꞌi, e mātou: o te ꞌAtua te vaꞌai mai i te mārama-rama mo aŋa i nei aŋa.
6 Hai hāꞌūꞌū mau nō ōꞌona e tano nei mātou mo haka ꞌite o ruŋa i te haka tere iŋa ꞌāpī ōꞌona ananake ko te taŋata, ꞌe te oho iŋa nei taꞌe hai haꞌatura ki te ⸤haka tere iŋa ꞌa Mōtē⸥ ana tano ki tōꞌona mata, hai ai o te Vārua Maitai ꞌi roto i te māhatu. Te meꞌe mo ravaꞌa hai haꞌatura ki te haka tere iŋa ꞌa Mōtē he mate, ꞌe te meꞌe vaꞌai e te Vārua Maitai he ora ꞌāpī ꞌina he hopeꞌa raꞌa.
7 Hai pūai nui-nui te ꞌAtua i haka ꞌite mai ai i te haka tere iŋa tuai ōꞌona ananake ko tātou ko te taŋata i pāpaꞌi ꞌi ruŋa i te māꞌea pararaha. Te auraꞌa: hora turu mai era o Mōtē mai ruŋa i te maꞌuŋa e maꞌu rō ꞌana i nei māꞌea, e ꞌana-ꞌana rō ꞌā tōꞌona ꞌāriŋa ꞌi te pūai o te ꞌAtua ki te roa ꞌina he itaraera he tano mo uꞌi a ruŋa, ka ai atu ꞌai e ŋaro e oho era te pūai o rā ꞌana-ꞌana. Mo ai ia hai pūai nui-nui pē ira i haka ꞌite mai ai e te ꞌAtua i rā haka tere iŋa tuai era ōꞌona, he meꞌe mo maꞌu i a tātou ki te mate,
8 ¿e ko ai hō hai pūai ꞌata hau rō atu ꞌi te nui-nui te haka ꞌite iŋa mai o te haka tere iŋa ꞌāpī ōꞌona ananake ko tātou ko te taŋata vaꞌai mai i te Vārua Maitai?
9 Mo ai he meꞌe pūai ꞌe nui-nui te haka tere iŋa tuai o te ꞌAtua ananake ko te taŋata maꞌu mai i te ūtuꞌa, ¿e ko ai hō te ⸤haka tere iŋa ꞌāpī o te ꞌAtua ananake ko te taŋata⸥ haka tano i te taŋata ki te mata o te ꞌAtua he meꞌe ꞌata hau rō atu ꞌi te pūai ꞌe ꞌi te nui-nui?
10 Hora nei ꞌina e tahi pūai ꞌe nui-nui toe o te meꞌe raꞌe era; ko mono ꞌana hai haka tere iŋa ꞌāpī ꞌata nui-nui ꞌe ꞌata pūai ki rā meꞌe.
11 Mo ai ia he meꞌe pūai ꞌe nui-nui te haka tere iŋa raꞌe era, haka tere iŋa era mo ŋaro, ꞌata hau rō atu ia te pūai ꞌe te nui-nui o te haka tere iŋa ꞌāpī nei, he meꞌe e ko ŋaro ki te hora hopeꞌa.
12 ꞌE, ꞌo te ꞌite o mātou e ko ŋaro te haka tere iŋa ꞌāpī nei, ꞌina e tahi mātou meꞌe naꞌa e haka ꞌite e oho nei o ruŋa.
13 A mātou taꞌe pē Mōtē, puru i tōꞌona ꞌāriŋa hai kahu ꞌo takeꞌa e te itaraera te ŋaro iŋa o te ꞌana-ꞌana mai ruŋa.
14 ꞌE te itaraera, ꞌātā ki te hora nei, ꞌina he haŋa mo aŋi-aŋi pē nei ē: te haka tere iŋa tuai o te ꞌAtua ananake ko te taŋata he meꞌe mo ŋaro. E taiꞌo ena i rā haka tere iŋa, e tuꞌu rō ꞌā pa he meꞌe ena ē: e ai rō ꞌā te meꞌe puru i te rāua manaꞌu ꞌo aŋi-aŋi i te parautiꞌa. ꞌE te meꞌe mau nō mo kume i te meꞌe puru i te rāua manaꞌu ꞌo aŋi-aŋi he ⸤haka moe i te manaꞌu⸥ ꞌi ruŋa i a Ietū.
15 ꞌĀtā ki ꞌaŋarīnā, e taiꞌo ena i te puka pāpaꞌi e Mōtē, e ai rō ꞌā te meꞌe puru i te rāua manaꞌu ꞌo aŋi-aŋi.
16 Ka ai atu pē ira, ꞌi te hora haka moe o te kope e tahi i tōꞌona manaꞌu ꞌi ruŋa i te tātou Pūꞌoko Haka Tere ko Ietū Kiritō, he kume e te ꞌAtua i te meꞌe puru i tōꞌona manaꞌu.
17 Te tātou Pūꞌoko Haka Tere e haka tika ena i te tātou māhatu hai Vārua Maitai. ꞌE te kope haka tika e te Vārua Maitai ko eꞌa ꞌā mai te pūai o te hara ꞌe ko eꞌa takoꞌa ꞌā mai te manaꞌu pē nei ē: hai haꞌatura ki te haka tere iŋa ꞌa Mōtē he tano ki te mata o te ꞌAtua.
18 Hora nei a tātou taꞌatoꞌa, te nuꞌu haka moe i te manaꞌu ꞌi ruŋa i a Ietū, kume o te meꞌe puru o te ꞌāriŋa, e haka takeꞌa ena i te pūai ꞌe i te nui-nui o te tātou Pūꞌoko Haka Tere, pa he ꞌata ꞌi roto i te hiꞌo, ꞌe a ia hai Vārua Maitai e aŋa e oho ena ꞌi roto i te tātou māhatu mo haka riro mo oho i te tātou huru pa he huru riva mau ꞌā ōꞌona.
