2 Kōrinto 4:1-18
4 Te ꞌAtua i vaꞌai mai ai i te aŋa nei, he riva rahi ōꞌona. ꞌO ira a mātou e taꞌe hōriŋa nei.
2 A mātou e hārui rō ꞌana hai tuaꞌivi i te meꞌe taꞌe tano taꞌatoꞌa aŋa e te taŋata e naꞌa rō ꞌana ꞌo haꞌamā, ꞌe, takoꞌa, ꞌina a mātou he reo-reo ꞌe he huri i te vānaŋa o te ꞌAtua. Te ꞌAtua ko ꞌite ꞌana he parautiꞌa mau nō te meꞌe haka ꞌite e mātou o ruŋa i a ia, ꞌe taꞌatoꞌa taŋata manaꞌu riva-riva e ꞌite takoꞌa rō ꞌā: te mātou meꞌe kī he parautiꞌa.
3 ꞌE mo ai o te meꞌe puru i te manaꞌu ꞌo aŋi-aŋi i te auraꞌa parautiꞌa o te roŋo riva-riva haka ꞌite e mātou, mo te nuꞌu taꞌe eꞌa mau nō mai roto i te ūtuꞌa o te hara ka ai ena.
4 Te nuꞌu nei, ꞌi te taꞌe haka moe i te rāua i te manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⸤Kiritō⸥, ꞌāriŋa ora o te ꞌAtua.
5 ꞌIna a mātou he haka ꞌite he oho o ruŋa i a mātou. E haka ꞌite nei o ruŋa i a Ietū Kiritō, he Pūꞌoko Haka Tere o te taꞌatoꞌa. Te meꞌe mau nō haka ꞌite e mātou o ruŋa i a mātou: he tāvini mātou o te taꞌatoꞌa ꞌi te haŋa o mātou ki a Ietū.
6 O te ꞌAtua kī era pē nei ē: «Ka ai te mōrī ꞌi roto i te pōhāhā», te haka māꞌeha i te mātou manaꞌu mo haka māꞌeha takoꞌa e mātou i te manaꞌu o te tētahi nuꞌu hai haka ꞌite i te pūai ꞌe i te nui-nui o te ꞌAtua takeꞌa ꞌi ruŋa i a Ietū Kiritō.
Hai pūai o te ꞌAtua
7 Te aŋa vaꞌai mai nei e te ꞌAtua, he haka ꞌite i te ⸤roŋo riva-riva o ruŋa i a Ietū⸥, he meꞌe hopeꞌa o te hauhaꞌa. ꞌE a mātou, te nuꞌu i a rāua nei hauhaꞌa, pa he pani aŋa hai ꞌōꞌone. Pē ira te ꞌAtua i aŋa ai mo ꞌite e te taꞌatoꞌa: te pūai nui-nui nei i a mātou o te ꞌAtua, taꞌe ꞌō o mātou mau ꞌā.
8 He topa nō mai te ꞌati, ꞌe ꞌina a mātou he haka tapa i te mātou manaꞌu mai ruŋa i te ꞌAtua; e ai rō ꞌā te mahana e tuꞌu rō ꞌā pa he meꞌe ena ē: ꞌina he rāveꞌa toe mo eꞌa mai roto i te ꞌati, ꞌe ko te haka moe iŋa ꞌana te mātou manaꞌu ꞌi ruŋa i te ꞌAtua mo hāꞌūꞌū mai.
9 He tute nō mai te aŋa i a mātou mo tōtōā e te nuꞌu taꞌe haŋa mai, ꞌe ꞌina te ꞌAtua he haka rē i a mātou; e tiŋaꞌi rō mai ꞌā e te nuꞌu ki te piꞌi-piꞌi, ꞌe e eꞌa haka ꞌou nō ꞌā a mātou ki ruŋa.
10 ꞌI te kona taꞌatoꞌa tuꞌu o mātou, he takeꞌa nō te aŋa e te nuꞌu pē nei ē: e oho rō ꞌana a mātou mo mate ꞌi te rima o te nuꞌu taꞌe haŋa mai, pa he meꞌe topa ki a Ietū. ꞌE, hai hāꞌūꞌū mai ōꞌona ꞌo mate a mātou, e takeꞌa takoꞌa ena: e ora nō ꞌā a Ietū.
11 —
12 A mātou e oho mau rō ꞌā mo mate ꞌo te haka ꞌite i te roŋo riva-riva o ruŋa i a Ietū, ꞌe a kōrua, hai nei meꞌe mau ꞌā, e ravaꞌa ena i te ora ꞌāpī ꞌina he hopeꞌa raꞌa.
13 A mātou pa he kope kī ꞌi ruŋa i te ⸤Pāpaꞌi Moꞌa⸥ pē nei ē: «E haka moe rō ꞌana a au i tōꞌoku manaꞌu ꞌi ruŋa i te ꞌAtua, ꞌo ira a au e vānaŋa nei o ruŋa i a ia». ꞌE, pa he oho iŋa era ꞌā o rā kope, a mātou takoꞌa, ꞌi te haka moe iŋa i te manaꞌu ꞌi ruŋa i te Kiritō, e haka ꞌite e oho nei o ruŋa i a ia.
14 E ꞌite rō ꞌana, paꞌi, a mātou: te ꞌAtua haka ora era i a Ietū mai te mate, pe muꞌa ka oho ena he haka ora takoꞌa i a mātou, ꞌe pē ira ꞌana i a kōrua, ꞌo te ai o tātou ꞌāꞌana. ꞌE ananake tātou ka maꞌu ena e te ꞌAtua ki muri i a ia.
15 Te haꞌaoromaꞌi o mātou i te ꞌati taꞌatoꞌa he meꞌe mo te riva-riva o kōrua, ꞌe mo ꞌata rahi mo oho o te nuꞌu ⸤haka moe i te manaꞌu⸥ ꞌi ruŋa i a Ietū, he ꞌite o ruŋa i te riva rahi o te ꞌAtua. Pē ira ka rahi ka oho ena te nuꞌu māuru-uru ꞌe haꞌahana-hana ki te ꞌAtua.
16 ꞌO ira a mātou e taꞌe hōriŋa nei ꞌi te mātou aŋa. Te mātou hakari, pe te rehe-rehe pe te oho nō, ꞌe, ka ai atu pē ira, te mātou haka moe iŋa i te manaꞌu ꞌi ruŋa i a Ietū pe te pūai pe te oho nō te mahana te mahana.
17 E haka topa nei i te manaꞌu o ruŋa i te meꞌe ka ai ena mo tātou pe muꞌa ka oho ena: he noho iŋa riva-riva ꞌina he hopeꞌa raꞌa ꞌi te raŋi, te ꞌati ꞌamo e mātou ꞌi te ao nei ꞌina e mātou he tapa atu; e tuꞌu rō ꞌana, paꞌi, pa he meꞌe taꞌe paŋahaꞌa ꞌe e ko roa he ŋaro.
18 ꞌO ira, te meꞌe manaꞌu o mātou taꞌe he meꞌe o te ao nei, pa he ꞌati topa mai. Te mātou manaꞌu e haka noho nei ꞌi ruŋa i te meꞌe o te raŋi. Te meꞌe takeꞌa, paꞌi, o te ao nei e ko roa he ŋaro, ꞌe te meꞌe taꞌe takeꞌa vaꞌai mai e te ꞌAtua e ko ŋaro ki te hora hopeꞌa.
