2 Kōrinto 6:1-18
6 Hora nei, pa he nuꞌu hokorua mātou ꞌi te aŋa o te ꞌAtua, he ani atu: ꞌina kōrua ko haka māuꞌa i te riva rahi o te ꞌAtua vaꞌai atu era e ia.
2 I kī rō, paꞌi, e ia ꞌi ruŋa i te ⸤Pāpaꞌi Moꞌa⸥:«ꞌI te hora mo haka takeꞌa i tōꞌoku riva rahi,i haka roŋo atu ai au i te kōrua pure;ꞌi te mahana mo haka eꞌa i te taŋata mai roto i te ūtuꞌa o te hara,i hāꞌūꞌū atu ai au».
E te taina, ko te hora nei rā hora, he mahana mo eꞌa mai roto i te ūtuꞌa o te hara.
He ꞌati topa ꞌi ruŋa i a Pauro
3 A mātou e hāpaꞌo rō ꞌā i te mātou meꞌe aŋa, ꞌo aŋa i te meꞌe taꞌe tano haka ꞌaka-ꞌaka i te manaꞌu o te taŋata ꞌo ⸤haka moe i te manaꞌu⸥ ꞌi ruŋa i a Ietū, ꞌe ꞌo tuhi tāꞌue mai i te taꞌe tano o te mātou aŋa.
4 Hai meꞌe taꞌatoꞌa aŋa e mātou e takeꞌa ena he tāvini parautiꞌa mātou o te ꞌAtua. E haꞌaoromaꞌi rō ꞌana, paꞌi, mātou hai haumārū i te ꞌati, i te meꞌe kore,
5 i te tiŋaꞌi, i te puru ꞌi roto i te hare maꞌuꞌaurī, i te haka tumu i te ture, i te aŋa paŋahaꞌa, i te taꞌe haꞌuru ꞌe i te maruaki.
6 E takeꞌa takoꞌa ena he tāvini mātou o te ꞌAtua hai noho iŋa taꞌe hara o mātou, hai ꞌite i te parautiꞌa o ruŋa i a ia, hai riva o mātou, hai haꞌaoromaꞌi o mātou i te rua, hai ai o te ⸤Vārua Maitai⸥ ꞌi roto i a mātou, hai haŋa parautiꞌa ki te rua,
7 hai hāpī i te roŋo parautiꞌa, ꞌe hai pūai o te ꞌAtua ꞌi roto i a mātou. Te noho iŋa tano nei o mātou ki te mata o ꞌAtua, ꞌi te hora taꞌatoꞌa, pa he meꞌe e rua maꞌu e te vaꞌehau ꞌi te rima ꞌi te hora o te tamaꞌi, e tahi o rā meꞌe mo moto ꞌe te rua mo puru i a ia ꞌo pū.
8 E ai rō ꞌā te nuꞌu haka nui-nui i a mātou, ꞌe te nuꞌu parauꞌino mai. E ai rō ꞌā te nuꞌu vānaŋa riva-riva ꞌe te nuꞌu vānaŋa rake-rake o ruŋa i a mātou. A rāua he kī nō mai te aŋa i te mātou reo-reo, ka ai atu he parautiꞌa te mātou meꞌe kī.
9 E uꞌi mai ena i a mātou pa he nuꞌu taꞌe māhani e rāua, ka ai atu e ꞌite riva-riva rō ꞌā ko ai a mātou. He oho nō te aŋa o mātou mo mate i a rāua, ꞌe ko te ora iŋa ꞌana. He tōtōā nō mai te aŋa, ꞌe, ka ai atu pē ira, ꞌina a mātou he mate.
10 E tuꞌu rō ꞌā a mātou pa he nuꞌu e mamae rō ꞌā te māhatu, ꞌe, ka ai atu pē ira, ko te koa iŋa ꞌā. E uꞌi mai ena i a mātou pa he nuꞌu veve, ꞌe, ka ai atu pē ira, e rahi rō ꞌā te nuꞌu haka ꞌono e mātou. E tuꞌu rō ꞌā pa he meꞌe ena ē: ꞌina e tahi mātou meꞌe, ꞌe te parautiꞌa e ai tahi rō ꞌā.
11 E te taina o Kōrinto ē, taꞌatoꞌa meꞌe manaꞌu e mātou ko haka ꞌite tahi atu ꞌana. Ko vaꞌai tahi atu ꞌā a mātou i te mātou māhatu.
12 Mo ai o te hihi-hihi ꞌi roto o tātou, taꞌe ꞌo te kore o te mātou haŋa ki a kōrua, he kore o te haŋa o kōrua mo mātou.
13 He ani atu ia a au, pa he ani iŋa o te matuꞌa ki tāꞌana ŋā poki: e haŋa mai kōrua, pa he haŋa iŋa atu ena o mātou.
E haka tapa mai te meꞌe taꞌe tano
14 E te taina, ko ꞌite ꞌana e tātou taꞌatoꞌa e ko tano mo here ꞌi ruŋa i tū iuko ꞌā e tahi hoi ꞌe e tahi ꞌuei. Pē ira ꞌā e ko tano mo ⸤hāipo-ipo⸥ ꞌo mo haꞌaꞌau i te aŋa e tahi mo aŋa te kope haka moe i te manaꞌu ꞌi ruŋa i a Ietū ararua ko te kope ꞌina he haka moe i te manaꞌu ꞌi ruŋa i a Ietū. ¿Pē hē, paꞌi, ana tano te meꞌe riva-riva ki te meꞌe rake-rake? ꞌE ¿pē hē te māꞌeha ana hokorua i te pōꞌuri?
15 ¿Hoki e haꞌaꞌau mau rō te ⸤Kiritō⸥ ararua ko Rukifero? ¿Hoki e haꞌaꞌau mau rō te nuꞌu haka moe i te manaꞌu ꞌi ruŋa i a Ietū ꞌe te nuꞌu taꞌe haka moe i te manaꞌu ꞌi ruŋa i a ia?
16 ꞌE te ꞌītoro, ¿e tano mau rō ꞌi te kona haꞌamuri ꞌAtua? E kī atu ena a au i te meꞌe nei ꞌo te ai a tātou pa he kona haꞌamuri ꞌAtua. ꞌI ruŋa i te Pāpaꞌi Moꞌa e kī ena, paꞌi, e te ꞌAtua:«Ka noho nei a au ꞌi roto i a rāua,a au mo ꞌAtua o rāua,ꞌe a rāua mo taŋata ꞌāꞌaku».
17 ꞌE ꞌi te rua kona o te Pāpaꞌi Moꞌa e kī takoꞌa ena:
«E eꞌa kōrua mai roto i te nuꞌu aŋa i te meꞌe taꞌe tanoꞌe ꞌina ko noho haka ꞌou ꞌi muri;ꞌina kōrua ko aŋa i te meꞌe taꞌe tano pē rāua.Pē ira he toꞌo a au i a kōrua māꞌaku,
18 ꞌe he riro au he Matuꞌa mo kōrua,ꞌe a kōrua mo ŋā poki ꞌāꞌaku.Pē ira te ꞌAtua, i a ia te pūai taꞌatoꞌa, i kī ai».
