2 Kōrinto 7:1-16
7 E te taina haŋa rahi ōꞌoku ē, te ŋā meꞌe nei he hōrea o te ꞌAtua mo tātou. ꞌO ira, e haka tapa tātou mai te meꞌe haka ꞌōꞌone hai hara i te hakari ꞌe i te vārua. ꞌE, ꞌi te moꞌa o tātou i a ia, e uꞌi mo tano o te tātou noho iŋa ki tōꞌona mata ki te roa ꞌina e tahi hara.
He koa iŋa o Pauro mo te nuꞌu o Kōrinto
2 ¡E mātaki mai te kōrua māhatu! ꞌIna, paꞌi, a mātou kai aŋa atu e tahi meꞌe taꞌe tano, kai aŋa atu e tahi meꞌe mo haka tapa e tahi o kōrua mai te ara parautiꞌa o te ꞌAtua, ꞌe kai reo-reo atu mātou mo ravaꞌa moni.
3 Taꞌe he riri mo kōrua e kī atu ena i te ŋā meꞌe nei. ꞌI muꞌa ꞌā, paꞌi, i kī rō atu au e maꞌu rō ꞌana a au i a kōrua ꞌi roto i tōꞌoku māhatu; ka ora ꞌo ka mate a au, e ko kore kōrua mai roto.
4 E koa rō ꞌana a au mo kōrua, ꞌe e vānaŋa atu ena taꞌe hai riꞌa-riꞌa. Ka ai atu e ꞌamo rō ꞌana a mātou i te ꞌati, ko te pūai iŋa ꞌana tōꞌoku manaꞌu ꞌe ko te koa iŋa ꞌana a au.
5 I tuꞌu era a mātou ki Mātērōnia, ꞌina a mātou he ravaꞌa mo haka ora ꞌi te haka tātake nō mai e te nuꞌu taꞌe haŋa mai, ꞌe ꞌi te ŋaroꞌa i te riꞌa-riꞌa ꞌi roto i a mātou.
6 ꞌE, o te ꞌAtua, haka pūai i te nuꞌu ꞌina he haŋu toe, i haka pūai mai i a mātou hai tuꞌu iŋa mai o Tito.
7 ꞌE taꞌe nō hai tuꞌu iŋa mai era ōꞌona, takoꞌa hai ꞌite mai e koa rō ꞌana ꞌi a kōrua. Ko ꞌaꞌamu mai ꞌana e ia i te rahi o te kōrua haŋa mo takeꞌa i a mātou, ꞌe ko ꞌaꞌamu takoꞌa mai ꞌana i te māui-ui e maꞌu ena ꞌi roto i te kōrua māhatu he manaꞌu rahi mai o kōrua ki a au. He ꞌata koa rō atu ꞌai a au ꞌi te ŋā meꞌe taꞌatoꞌa nei.
8 I ꞌite era e au i māui-ui rō te kōrua māhatu ꞌi te parau pāpaꞌi atu era e au, tē rā ia au ka manaꞌu: ko te ꞌaroha ꞌō i haka maꞌu atu ai. ꞌE hora nei, ka ai atu ꞌi rā parau i māui-ui ai te kōrua māhatu, ko kore ꞌana te haka ꞌaroha era ōꞌoku mo kōrua ꞌo te ai kai māuꞌa a au i pāpaꞌi atu ai.
9 ꞌE, ko koa ꞌana a au, taꞌe ꞌō ꞌo te māui-ui o te kōrua māhatu, ꞌo te ai hai rā māui-ui i hārui haka ꞌou ai te kōrua manaꞌu ki te ꞌAtua. Te meꞌe ŋaroꞌa era e kōrua he meꞌe haŋa o te ꞌAtua mo tāꞌana nuꞌu. ꞌI te ai pē ira, ꞌina ia a mātou kai aŋa atu i te meꞌe taꞌe tano ki a kōrua hai rā meꞌe pāpaꞌi atu era e au.
10 Ko rā māui-ui te māui-ui māhatu haŋa o te ꞌAtua, he meꞌe haka hārui i te manaꞌu o te taŋata ki a ia, maꞌu i a rāua mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE te māui-ui māhatu pē ira taꞌe he ꞌati. Te māui-ui māhatu o te taŋata taꞌe haŋa ki te ꞌAtua, taꞌe haka hārui i te manaꞌu o te taŋata ki ruŋa i te ꞌAtua, he meꞌe maꞌu i te taŋata ki te mate, te auraꞌa, he haꞌataꞌa mau rō ꞌāvai mai muri i te ꞌAtua.
11 Ka uꞌi rā he aha he aha te meꞌe riva-riva poreko mai te meꞌe ŋaroꞌa era e kōrua: ko haŋa ꞌana kōrua mo haka tī-tika i te meꞌe hape o roto i te nūnaꞌa taŋata ⸤haka moe i te manaꞌu⸥ ꞌi ruŋa i a Ietū o Kōrinto, ko riri ꞌana kōrua mo te meꞌe taꞌe tano aŋa era e rā kope, ꞌe ko riꞌa-riꞌa ꞌana ꞌo haka ūtuꞌa atu i a kōrua e te ꞌAtua ananake ko rā kope. Ko haŋa takoꞌa ꞌana a kōrua mo oho atu ōꞌoku mo uꞌi i a kōrua, ko ꞌata haꞌatura ꞌana a kōrua i tāꞌaku meꞌe kī atu era ꞌe ko haka ūtuꞌa ꞌā i rā kope. Hai ŋā meꞌe nei e takeꞌa ena: ꞌina e tahi hape o kōrua o rā meꞌe topa era.
12 Hora pāpaꞌi atu era ōꞌoku i rā parau, tōꞌoku manaꞌu taꞌe ꞌi ruŋa i te kope hara era, ꞌo ꞌi ruŋa i te kope māui-ui era o te māhatu ꞌi rā hara. Ko ꞌite ꞌana e te ꞌAtua: tōꞌoku manaꞌu i pāpaꞌi atu ai mo aŋi-aŋi e kōrua i te rahi o te haŋa o kōrua mo mātou.
13 He ꞌite o mātou ko haka tano tahi ꞌana e kōrua i te meꞌe pāpaꞌi atu era i ꞌata haŋu ai a mātou.
Ka ai atu pē ira, ꞌata hau rō atu te mātou koa ꞌi te takeꞌa i a Tito e koa rō ꞌā mo kōrua. Hai meꞌe aŋa era e kōrua i ꞌata haka haŋu ai i a ia.
14 Ko haka paka era ꞌana e au ki a Tito: a kōrua nuꞌu haꞌatura, ꞌe ꞌina kai hape rā vānaŋa era ꞌāꞌaku. Ko takeꞌa ꞌā, paꞌi, e Tito, he parautiꞌa, pa he meꞌe taꞌatoꞌa kī atu e mātou ki a kōrua.
15 E topa nei te manaꞌu o Tito ki te moꞌa ꞌe ki te haꞌatura iŋa era o kōrua ki a ia, he ꞌata rahi rō atu ꞌai tōꞌona haŋa mo kōrua.
16 ¡ꞌE hora nei, ko ꞌata koa ꞌana a au he ꞌite ōꞌoku: a kōrua nuꞌu haka tano i te kōrua meꞌe kī!
