2 Kōrinto 8:1-24
8 E te taina, e haŋa rō ꞌā a mātou mo ꞌaꞌamu atu he aha te meꞌe riva-riva i poreko ꞌi roto i te nūnaꞌa taŋata ⸤haka moe i te manaꞌu⸥ ꞌi ruŋa i a Ietū o te kona era ko Mātērōnia ꞌo te toꞌo mo rāua i te riva rahi o te ꞌAtua.
2 Ka ai atu i topa rō te ꞌati taparahi-taꞌata ki te nuꞌu nei, ko te koa iŋa ꞌana, ꞌe, ka ai atu he nuꞌu veve, ꞌi te rāua riva, pa he ꞌono e vaꞌai era i te moni.
3 He mataꞌite a au e vaꞌai era hai māhatu e haka tano ki te meꞌe ai o rāua, ꞌe ꞌātā ꞌata rahi rō atu. Te nuꞌu nei, hai manaꞌu mau ꞌā o rāua,
4 i haka koni mai ai mo haꞌatiꞌa o mātou i a rāua mo hāꞌūꞌū takoꞌa hai tara mo te nuꞌu haka moe i te manaꞌu ꞌi ruŋa i a Ietū o Hērutarema.
5 ꞌE taꞌe he moni nō te meꞌe i vaꞌai mai e te nuꞌu nei, pa he meꞌe manaꞌu era e mātou. ꞌI raꞌe i vaꞌai ai i a rāua mo tāvini ki te ꞌAtua, ꞌe ki oti ki a mātou, pa he meꞌe haŋa o te ꞌAtua.
6 ꞌI te nehe-nehe o rā meꞌe aŋa era e te taina o Mātērōnia, ꞌī mātou ko ani ꞌā ki a Tito mo oho atu ōꞌona mo haka mao i te aŋa haꞌamata era e ia ꞌi muꞌa ꞌā he haka taka-taka, mai i a kōrua, i te moni mo te taina o Hērutarema.
7 A kōrua he nuꞌu haka kē ꞌi te meꞌe taꞌatoꞌa: ꞌi te haka moe i te manaꞌu ꞌi ruŋa i a Ietū, ꞌi te ꞌite mo vānaŋa, ꞌi te ꞌite i te hāpī parautiꞌa o te ꞌAtua, ꞌi te haŋa mo hāꞌūꞌū, ꞌe ꞌi te haŋa mo te rua, he meꞌe i ꞌite e kōrua mai i a mātou. Pē ira takoꞌa ꞌana kōrua ana haka kē ꞌi te aŋa riva nei: he haꞌaputu i te moni ꞌi roto i a kōrua mo te taina veve o Hērutarema.
8 Taꞌe a au e kī atu ena i te meꞌe nei pa he meꞌe mo haꞌatura mau ꞌā e kōrua. Mo riva o kōrua mo haꞌatura, ko tano ꞌā. Tōꞌoku haŋa mau mo uꞌi hoki he parautiꞌa mau ꞌana te kōrua haŋa mo te rua, pa he meꞌe i takeꞌa e au ꞌi te taina o Mātērōnia.
9 Ko ꞌite ꞌana, paꞌi, kōrua: te tātou Pūꞌoko Haka Tere ko Ietū Kiritō, ka ai atu he ꞌono ꞌi te raŋi, ꞌi tōꞌona riva rahi, i haka veve nō i a ia mo te kōrua riva-riva, ki ꞌono ai kōrua ꞌi te meꞌe o te ꞌAtua hai rā haka veve iŋa era ōꞌona.
10 Mo te kōrua riva-riva he haka ꞌite atu a au i tōꞌoku manaꞌu o ruŋa i tū meꞌe haꞌamata aŋa era e kōrua hai koa ꞌi tū matahiti oti ena, he haka taka-taka i te moni mo te nuꞌu veve o Hērutarema.
11 Te meꞌe haŋa: he haka mao i rā aŋa hai meꞌe tara o kōrua hai koa takeꞌa mau era ꞌā e au i a kōrua ꞌi muꞌa ꞌā hora manaꞌu era mo aŋa i rā meꞌe.
12 Mo ai ꞌi roto i te kōrua māhatu te haŋa parautiꞌa mo vaꞌai, ꞌe te meꞌe vaꞌai e kōrua e tano rō ꞌā ki te meꞌe ai o kōrua, he koa te ꞌAtua. ꞌIna, paꞌi, a ia he no-noꞌi mai ꞌata rahi te meꞌe ki te meꞌe ai o tātou mo vaꞌai.
13 Taꞌe a au e kī atu ena mo vaꞌai tahi i te meꞌe ai o kōrua, ꞌo kore te kōrua meꞌe hai hāꞌūꞌū ki te rua. Te meꞌe haŋa he haka tano-tano mo te taꞌatoꞌa.
14 ꞌI te hora nei e ai rō ꞌā i a kōrua te meꞌe ꞌina i te nuꞌu o Hērutarema. Pe muꞌa ka oho ena, pēaha, he ai i a rāua te meꞌe e hape rō ꞌā i a kōrua, ꞌe mo hāꞌūꞌū o te taina ꞌi roto i a rāua, e ko hape te meꞌe.
15 Mo aŋa o kōrua pē ira, he topa pa he meꞌe kī ꞌi ruŋa i te ⸤Pāpaꞌi Moꞌa⸥ o ruŋa i te itaraera, hora vaꞌai era e te ꞌAtua i te ⸤mānā⸥ mai te raŋi: «Te kope haꞌaputu rahi, ꞌe te kope taꞌe haꞌaputu rahi, ko tū mākona iŋa ꞌana ararua».
He uŋa iŋa i a kuā Tito ki Kōrinto
16 Māuru-uru ki te ꞌAtua ꞌo te haka poreko ꞌi roto i te manaꞌu o Tito te haŋa mo hāꞌūꞌū atu ki a kōrua pē au.
17 I kī era e mātou mo oho atu mo uꞌi i a kōrua, ꞌina kai pātoꞌi mai. Te parautiꞌa, ko koa atu ꞌā ꞌi te haŋa mo oho atu mo uꞌi ꞌe mo hāꞌūꞌū atu i a kōrua.
18 ꞌI muri i a Tito i uŋa atu ai a au i te taina e tahi. E vānaŋa riva-riva rō ꞌā o ruŋa i a ia te taina taꞌatoꞌa o Mātērōnia, he tano o tāꞌana aŋa he haka ꞌite i te ⸤roŋo riva-riva o te ꞌAtua⸥.
19 Te kope nei o te ŋā taina mau nei ꞌā i haꞌataꞌa mo hokorua takoꞌa mai ꞌi te mātou ara ki Hērutarema maꞌu i te moni mo te taina veve o ira. Te meꞌe nei he rāveꞌa e tahi mo haꞌahana-hana o te taŋata ki te ꞌAtua ꞌe mo takeꞌa i te haŋa o mātou mo hāꞌūꞌū.
20 I uŋa atu ai mātou i te kope nei ꞌi muri i a Tito ꞌo ai tāꞌue te vānaŋa mo kī i te hape o te haka tere iŋa o mātou i te moni ena.
21 Te meꞌe haŋa o mātou he aŋa riva-riva i te aŋa nei ki te mata o te ꞌAtua, ꞌe pē ira takoꞌa ꞌana ki te mata o te taŋata.
22 ꞌI muri i a kuā Tito i uŋa takoꞌa atu ai a au i te taina haka ꞌou e tahi. Te kope nei hai rauhuru atu meꞌe aŋa e takeꞌa ena i te rahi o tōꞌona haŋa mo hāꞌūꞌū ꞌi te aŋa o te ꞌAtua. ꞌE hora nei, ko ꞌata haŋa ꞌana a ia mo hāꞌūꞌū ꞌo te ꞌite e ko taꞌe vaꞌai kōrua hai māhatu mo te taina veve o Hērutarema.
23 ꞌE o ruŋa i a Tito he kī atu a au: a ia he hokorua ōꞌoku ꞌe e aŋa nei a māua mo te kōrua riva-riva. ꞌE te ŋā taina haka ꞌou ena e rua o muri he nuꞌu moꞌa ꞌe haꞌatura ki te ⸤Kiritō⸥ uŋa atu e te nuꞌu haka moe i te manaꞌu ꞌi ruŋa i a Ietū o te ŋā kona nei.
24 E kuā taina, e hāpaꞌo kōrua i a rāua hai haŋa, ki takeꞌa ai e tū ŋā nuꞌu uŋa atu ena i a rāua, he parautiꞌa mau ꞌā te mātou meꞌe kī o ruŋa i a kōrua.
