Fīripo 1:1-30
1 A au, a Pauro, ꞌe a Timoteo, tāvini o Ietū Kiritō, he ꞌaroha atu ki a kōrua ki te nuꞌu o Fīripo haꞌataꞌa e te ꞌAtua māꞌana ꞌo te ⸤haka moe i te manaꞌu⸥ ꞌi ruŋa i a Ietū. Te ꞌaroha nei mo te taꞌatoꞌa o kōrua ananake ko te nuꞌu pūꞌoko haka tere o kōrua ꞌe ko te kōrua ⸤taina hāꞌūꞌū⸥.
2 Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.
He māuru-uru
3 ꞌI te taꞌatoꞌa nō hora manaꞌu ōꞌoku ki a kōrua e māuru-uru nei au mo kōrua ki te tātou ꞌAtua,
4 ꞌe hai koa a au e pure nei mo kōrua taꞌatoꞌa.
5 Mai te hora haka moe era, paꞌi, o kōrua i te manaꞌu ꞌi ruŋa i a Ietū ꞌātā ki te hora nei e hāꞌūꞌū rō mai ꞌā kōrua ꞌi tāꞌaku aŋa he haka ꞌite he oho i te ⸤roŋo riva-riva o ruŋa i a Ietū⸥.
6 O te ꞌAtua, paꞌi, i haꞌamata i aŋa i te meꞌe riva-riva ꞌi roto i a kōrua ꞌi te hora haka moe o kōrua i te manaꞌu ꞌi ruŋa i a Ietū. ꞌE, ko ꞌite riva-riva ꞌana e au he aŋa he oho rō ꞌai i nei aŋa ꞌātā ka oti rō ꞌi te mahana o te hoki iŋa mai o Ietū Kiritō.
7 Taꞌe he meꞌe mo māere te manaꞌu ōꞌoku i te ŋā meꞌe nei mo kōrua; e maꞌu rō ꞌana, paꞌi, au i a kōrua ꞌi roto i tōꞌoku māhatu. A kōrua, paꞌi, ka ai a au ꞌi roto i te hare maꞌuꞌaurī ꞌo ꞌi muꞌa o te nuꞌu ra-rahi e haka aŋi-aŋi ꞌā pē nei ē: he parautiꞌa mau ꞌā te ⸤roŋo riva-riva o te ꞌAtua⸥, ko te hokorua iŋa nō mai ꞌā kōrua ꞌi tāꞌaku aŋa vaꞌai mai e te ꞌAtua hai riva rahi ōꞌona.
8 He ꞌAtua te meꞌe i ꞌite i te rahi o tōꞌoku manaꞌu mo kōrua taꞌatoꞌa; tōꞌoku haŋa ki a kōrua pa he haŋa iŋa atu ena ꞌā o Ietū Kiritō.
9 E pure nei au mo kōrua, e ani rō ꞌana a au mo ꞌata rahi mo oho o te kōrua haŋa mo te ꞌAtua ꞌe mo te rua, mo ꞌata aŋi-aŋi mo oho kōrua ko ai mau a ia, ꞌe mo ꞌata ꞌite o kōrua he aha te meꞌe riva-riva ꞌe he aha te meꞌe rake-rake,
10 ki aŋa ki oho ai kōrua i te meꞌe riva-riva mau nō. Pē ira he tano te kōrua noho iŋa ki te mata o te ꞌAtua, ꞌe he oho mau rō ꞌai kōrua pē ira ꞌina e tahi hape ꞌātā ki te hoki iŋa mai o Ietū.
11 ꞌE pē ira takoꞌa he poreko mai roto i a kōrua meꞌe rahi te meꞌe riva-riva hai pūai o Ietū Kiritō, ꞌe he haꞌahana-hana ia te taŋata i te ꞌAtua.
Te hauhaꞌa o te puru i a Pauro
12 E te taina, e haŋa rō ꞌana a au mo ꞌite o kōrua: taꞌe he ꞌati mōꞌoku te meꞌe topa mai nei ki a au ꞌo te ai hai nei meꞌe ko rahi ko oho ꞌana te nuꞌu ŋaroꞌa i te roŋo riva-riva o ruŋa i a Ietū ꞌe haka moe i te manaꞌu ꞌi ruŋa i a ia.
13 Te nuꞌu ꞌauario o te hare o te ꞌariki ꞌe te taꞌatoꞌa haka ꞌou atu nuꞌu o nei ko ꞌite ꞌana e puru atu ena a au ꞌi roto i te hare maꞌuꞌaurī ꞌo te haka ꞌite ōꞌoku o ruŋa i a Ietū.
14 ꞌE te rahi raꞌa o te tātou taina, i ꞌite era ko puru ꞌana a au, ko ꞌata haŋu ꞌā te manaꞌu mo haka ꞌite mo oho o ruŋa i te roŋo riva-riva o te ꞌAtua ꞌina he riꞌa-riꞌa haka ꞌou, ꞌe ko haka noho mau ꞌā i te rāua manaꞌu ꞌi ruŋa i a Ietū.
15 Ko ꞌite ꞌana e au e ai rō ꞌana te nuꞌu haka ꞌite o ruŋa i a Ietū he mākota ꞌe he haŋa mo ai ꞌata hau rō atu rāua ki a au, ꞌe e ai takoꞌa rō ꞌā te nuꞌu haka ꞌite o ruŋa hai manaꞌu riva-riva.
16 Te nuꞌu nei e haka ꞌite ena o ruŋa i a Ietū Kiritō he haŋa mai ki a au ꞌe he ꞌite: o te ꞌAtua a au i maꞌu mai ki roto nei mo kī i te parautiꞌa o ruŋa i tāꞌana roŋo.
17 Tū nuꞌu mākota ena taꞌe hai māhatu e haka ꞌite ena o ruŋa i a Ietū, hai haŋa mo ai ko rāua te raꞌe ꞌe mo haka ꞌati i a au hora nei ōꞌoku ꞌi roto i te hare maꞌuꞌaurī.
18 Nōatu. Mo ai he parautiꞌa te rāua meꞌe hāpī, ko te koa iŋa ꞌana a au, ka ai hai māhatu ꞌo taꞌe hai māhatu e hāpī ena. Te meꞌe hauhaꞌa, paꞌi, ko te haka ꞌite ko te oho iŋa ꞌana o ruŋa i a Ietū.
ꞌE, koa riꞌa-riꞌa au
19 ꞌi te ꞌite ōꞌoku: māuru-uru ki te kōrua pure ꞌe ki te hāꞌūꞌū o te ⸤Vārua Maitai⸥ vaꞌai mai e Ietū Kiritō te meꞌe taꞌatoꞌa topa mai ki a au mo tōꞌoku riva-riva.
20 Tāꞌaku meꞌe hopeꞌa o te haŋa he taꞌe aŋa ōꞌoku e tahi meꞌe ꞌo haꞌamā a au ꞌi muꞌa i a Ietū, ꞌe he vānaŋa he oho ōꞌoku o ruŋa i a ia hai pūai, pa he meꞌe nei e aŋa atu ena ki ꞌaŋarīnā, ki takeꞌa ai e te nuꞌu i te nui-nui o Ietū hai meꞌe taꞌatoꞌa aŋa ꞌe kī e au, ꞌo, ana haŋa te ꞌAtua, hai mate iŋa ōꞌoku.
21 A au e ora nei mo tāvini ꞌe mo haꞌamuri mau nō ki a Ietū. ꞌE mo mate ōꞌoku, ko ꞌata tano ꞌā; he ai, paꞌi, a au ꞌi muri i a ia.
22 ꞌE mo ora mo oho nō ōꞌoku, he ꞌata ai ia tōꞌoku hora mo aŋa i tāꞌana aŋa. Te meꞌe nō, kai ꞌite a au he aha te meꞌe ka topa mai ena ki a au ꞌi te hora nei.
23 E tātake rō ꞌana, paꞌi, tōꞌoku manaꞌu o ruŋa i te ŋā meꞌe nei ararua. E haŋa rō ꞌana, paꞌi, a au mo mate mo iri ōꞌoku ki muri i a Ietū, he meꞌe ꞌata riva-riva mōꞌoku.
24 ꞌE, ka ai atu pē ira, te meꞌe riva-riva mo kōrua he ora he oho nō atu ōꞌoku.
25 ꞌI te aŋi-aŋi ōꞌoku kai oti ꞌā tāꞌaku aŋa ꞌi roto i a kōrua, he ꞌite e au ꞌina kai tano ꞌā tōꞌoku hora mo mate, ꞌe he noho atu a au mo hāꞌūꞌū mo ꞌata haka pūai i te kōrua haka moe iŋa i te manaꞌu ꞌi ruŋa i a Ietū ki ꞌata koa ai kōrua.
26 Pē ira he tuꞌu haka ꞌou atu a au ki muri i a kōrua, ꞌe he ꞌata haꞌamuri kōrua ki a Ietū ꞌo te hāꞌūꞌū mai mo hoki haka ꞌou atu ki a kōrua ena.
Te noho iŋa tano mo te nuꞌu kiritiano
27 E te taina, te meꞌe haŋa: e uꞌi e haka tano te kōrua noho iŋa ki te roŋo riva-riva o te ꞌAtua. Te meꞌe haŋa nō, paꞌi, ꞌāꞌaku mo ꞌite mai o ruŋa i a kōrua, ka oho atu ꞌo ka taꞌe oho atu a au: nā kōrua e haka pūai mai ena e tahi nō manaꞌu ꞌi te haka ꞌite iŋa i te roŋo riva-riva o ruŋa i a Ietū
28 taꞌe hai riꞌa-riꞌa, ka ai atu e ai rō ꞌā te nuꞌu ꞌina he haŋa ki te kōrua aŋa. ꞌE ꞌi te taꞌe riꞌa-riꞌa o kōrua, ka aŋi-aŋi ena e rā nuꞌu: te hopeꞌa o te rāua ara he ūtuꞌa, ꞌe ka aŋi-aŋi ena e kōrua: he vaꞌai atu i te ora ꞌāpī ꞌina he hopeꞌa raꞌa. ꞌE te ŋā meꞌe nei ararua o te ꞌAtua.
29 Te ꞌAtua, paꞌi, hai riva rahi ōꞌona, ko vaꞌai mai ꞌana ki a tātou i te meꞌe taꞌe vaꞌai ki te taꞌatoꞌa: te meꞌe ena he haka moe i te manaꞌu ꞌi ruŋa i a Ietū, ꞌe pē ira ꞌā te meꞌe ena he ꞌamo i te ꞌati topa mai ki a tātou ki te nuꞌu ꞌāꞌana,
30 he ꞌati nā e kōrua e ꞌamo mai ena ꞌo te haka ꞌite i te roŋo riva-riva o ruŋa i a Ietū ꞌi muꞌa o te nuꞌu e riri rō ꞌana mo te vānaŋa o te ꞌAtua. A kōrua, paꞌi, he mataꞌite pē hē a au i ꞌamo ai ꞌi rā ꞌati ꞌi muꞌa ꞌā, ꞌe ko ꞌite ꞌana ko te ꞌamo iŋa ꞌana a au ꞌātā ki ꞌaŋarīnā.
