He Aŋa o te ꞌĀpōtoro 16:1-40
16 He oho ia a Pauro ki Reve ꞌe mai ira ki Rītara. ꞌI Rītara i māhani ai ki te taŋata ⸤haka moe i te manaꞌu⸥ ꞌi ruŋa i a Ietū te ꞌīŋoa ko Timoteo. A ia he poki o te viꞌe ⸤hūrio⸥ haka moe i te manaꞌu ꞌi ruŋa i a Ietū ꞌe tōꞌona matuꞌa tane he ⸤kirieko⸥.
2 Te taina o Rītara ꞌe o Īkōnio e vānaŋa riva-riva rō ꞌana o ruŋa i a Timoteo.
3 He haŋa ia e Pauro mo maꞌu ꞌi muri i a rāua. ꞌI raꞌe i haka tāpaꞌo ai i a Timoteo hai tāpaꞌo iŋa hūrio, he hore i te kiri o te kinoŋa, ꞌo riri te nuꞌu hūrio o te kona o rāua ka tuꞌu era. A rā nuꞌu, paꞌi, ko ꞌite ꞌā: te matuꞌa tane o Timoteo he kirieko.
4 ꞌI te kona taꞌatoꞌa tuꞌu o kuā Pauro, he haka ꞌite he oho ki te taina i te meꞌe kī e te ⸤ꞌāpōtoro⸥ ꞌe e te nuꞌu pūꞌoko haka tere o Hērutarema.
5 ꞌE te nuꞌu haka moe i te manaꞌu ꞌi ruŋa i a Ietū o rā ŋā kona ia, pe te ꞌata hio-hio nō te manaꞌu, ꞌe paurō te mahana pe te ꞌata rahi nō e oho era.
Te meꞌe haka takeꞌa e te ꞌAtua ki a Pauro
6 ꞌI te taꞌe haꞌatiꞌa e te ⸤Vārua Maitai⸥ mo haka ꞌite i te ⸤roŋo riva-riva o te ꞌAtua⸥ ꞌi te ŋā kona era o ꞌĀtia, he vari a kuā Pauro a te ŋā kona era o Firihia ꞌe o Karatia,
7 ꞌe he tuꞌu ki te tītaꞌa henua o Mītia. Mai ira i manaꞌu ai mo oho ki te ŋā kona era o Vītīnia, ꞌe ꞌina kai haꞌatiꞌa takoꞌa e te Vārua Maitai.
8 ꞌO ira i taꞌe hipa ai a ira.
He oho ia ananake a Mītia ꞌe he tuꞌu ki Toroare, he kona ꞌi ira te ꞌuahu nui-nui.
9 ꞌE ꞌi te pō e tahi i takeꞌa ai e Pauro i te meꞌe i haka takeꞌa e te ꞌAtua: he taŋata o te kona ko Mātērōnia e māroa rō ꞌana ꞌai ka ani ki a ia: «Ka oho mai koe ki Mātērōnia ka hāꞌūꞌū mai ki a mātou».
10 I takeꞌa era e Pauro i rā meꞌe, he ꞌaꞌamu mai ꞌe he haka riva-riva a mātou mo oho ki Mātērōnia, he ꞌite e mātou e kī mai ꞌana te ꞌAtua mo oho mo haka ꞌite i tāꞌana roŋo riva-riva ꞌi ira.
ꞌI Fīripo a kuā Pauro
11 ꞌI Toroare i eke ai a mātou ki ruŋa i te pahī, ꞌe he oho tī-tika ki te motu ko Tamotaratia. ꞌI te rua mahana i reva ai ki Nēāpori.
12 Mai ira i oho ai ki Fīripo, he kona hōnui o te rōmano ꞌi Mātērōnia. Mahana taꞌe rahi te mātou mahana noho ꞌi ira.
13 I tano era te ⸤mahana haka ora⸥, he eꞌa a mātou he oho ki haho o Fīripo ki te taha-taha o te rio, he ꞌite o mātou he kona pure o te hūrio. He noho ia a mātou ꞌi ira, he vānaŋa o ruŋa i te roŋo riva-riva o te ꞌAtua ki te ŋā viꞌe taka-taka atu.
14 E tahi o rā ŋā viꞌe te ꞌīŋoa ko Riria o te kona ko Tiatira; tāꞌana aŋa he hoꞌo kahu hopeꞌa o te riva-riva kōrore moana ꞌapa mea. Te viꞌe nei viꞌe haꞌamuri ki te ꞌAtua. E haka roŋo nō ꞌā rā viꞌe ki a Pauro, i haka māꞌeha ai e te ꞌAtua i tōꞌona manaꞌu mo aŋi-aŋi i te auraꞌa o rā vānaŋa ꞌe mo haka moe i te manaꞌu ꞌi ruŋa i a Ietū.
15 I haka ⸤papatito⸥ rō i a ia ananake ko te nuꞌu taꞌatoꞌa o tōꞌona hare. I oti era he kī mai: «Mo ai a au he viꞌe haka moe parautiꞌa i te manaꞌu ꞌi ruŋa i a Ietū mo kōrua, ka oho mai ia kōrua ka noho ꞌi tōꞌoku hare». He haka koni he oho mai ꞌātā ka oho rō a mātou ꞌi muri.
16 E tahi mahana, e oho nō ꞌana a mātou ki tū kona era mo pure, he piri mai e tahi poki vahine ꞌāpī, he ꞌekaravo, ko uru ꞌana e te tātane. O rā tātane te haka ꞌite ki rā poki he aha te meꞌe mo topa. ꞌE hai meꞌe haka ꞌite e rā poki ki te nuꞌu ꞌauhau ki a ia, e ravaꞌa era meꞌe rahi moni mo te nuꞌu ꞌāꞌana rā ꞌekaravo.
17 Te aŋa o nei poki he oho mai ꞌi tuꞌa o mātou ko kuā Pauro koia ko ohu: «¡Te ŋāŋata nei he tāvini o te ꞌAtua, kope haka tere i te meꞌe taꞌatoꞌa o te ao. E haka ꞌite atu ꞌā i te ara mo eꞌa o kōrua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua!».
18 Meꞌe rahi mahana e ohu-ohu era ꞌātā ka ꞌeꞌete rō te manava o Pauro. He teka ia he kī ki te tātane o roto o tū poki era: «¡Hai ꞌīŋoa o Ietū Kiritō he kī atu au: ka eꞌa koe mai roto i te poki ena!». ꞌI tū hora mau era ꞌā he eꞌa tū tātane era mai roto.
19 Te nuꞌu haka aŋa i rā poki, i uꞌi era ꞌina he rāveꞌa toe mo ravaꞌa haka ꞌou e rāua i te moni hai rā poki, he ꞌa-ꞌaru i a Pauro ararua ko Tira, he maꞌu ki muꞌa o te nuꞌu ra-rahi ꞌi te kona taka-taka o te taŋata,
20 ꞌe ki muꞌa o te nuꞌu pūꞌoko o te hare ture he kī: «Te ŋā hūrio nei e haka mira-mira ꞌana i te tātou kāiŋa,
21 ꞌe e hāpī ꞌana i te haka tere iŋa kē taꞌe haꞌatiꞌa mo aŋa e tātou e te rōmano».
22 He peꞌe te taŋata taꞌatoꞌa ki rā nuꞌu era o rāua rā ꞌekaravo mo tōtōā i a Pauro ararua ko Tira. Tū nuꞌu pūꞌoko haka tere era o te hare ture he ihi-ihi i te kahu o kuā Pauro ꞌe he kī mo tiŋaꞌi hai ꞌuaka.
23 I oti era te tiŋaꞌi, he maꞌu he puru ꞌi roto i te hare maꞌuꞌaurī, ꞌe he kī ki te pūꞌoko o te hare maꞌuꞌaurī mo ꞌauario riva-riva.
24 I kī era i te meꞌe nei, he maꞌu e tū taŋata era he puru ꞌi te kona hopeꞌa o te raro nui o roto i te hare maꞌuꞌaurī ꞌai ka ha-haꞌo i te vaꞌe o kuā Pauro ki roto i te meꞌe i aŋa hai miro ꞌo mākenu-kenu.
25 Pe te ꞌahuru mā piti o te pō, e pure ꞌe e hīmene nō ꞌā a Pauro ararua ko Tira ki te ꞌAtua ꞌe te tētahi nuꞌu puru e haka roŋo ꞌana ki a rāua,
26 he haꞌamata he mākenu-kenu te henua ꞌe he rurū tū hare maꞌuꞌaurī era. ꞌI rā hora ꞌā he ha-hata tahi te ꞌōpani ꞌe he pākoꞌo-koꞌo te vivi mai ruŋa i te nuꞌu puru taꞌatoꞌa.
27 I ꞌara era te pūꞌoko o te hare maꞌuꞌaurī, ꞌe i takeꞌa era ko ha-hata tahi ꞌā te ꞌōpani, he kume i tāꞌana hoe mo tiŋaꞌi i a ia ꞌi te manaꞌu ko tē-tere tahi ꞌā te nuꞌu puru.
28 He ohu ia e Pauro: «¡ꞌIna koe ko tiŋaꞌi i a koe; ꞌī a mātou taꞌatoꞌa ꞌi ꞌā!».
29 He kī e tū taŋata era ki te nuꞌu ꞌauario mo vaꞌai i te mōrī. I tahuti i uru ai e rurū rō ꞌā ꞌi te riꞌa-riꞌa, he tū-turi a te vaꞌe o Pauro ararua ko Tira.
30 He toꞌo i a rāua mai roto i tū kona hopeꞌa era o te raro nui ꞌe he ꞌui:
—¿He aha tāꞌaku meꞌe mo aŋa mo eꞌa mai roto i te ūtuꞌa o te hara?
31 He pāhono e kuā Pauro:
—Mo haka moe kōrua i te manaꞌu ꞌi ruŋa i a Ietū, he eꞌa a koe ꞌe te nuꞌu o tuꞌu hare mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.
32 He vānaŋa ia e Pauro ararua ko Tira o ruŋa o te roŋo riva-riva o te ꞌAtua ki tū taŋata era ꞌe ki te nuꞌu taꞌatoꞌa o tōꞌona hare.
33 ꞌI rā pō mau ꞌā he haka hopu e rā taŋata i te more o Pauro ꞌe o Tira, ꞌe he haka papatito i a ia ꞌe i te nuꞌu taꞌatoꞌa o tōꞌona hare.
34 I oti era he vaꞌai hai kai. Rā taŋata ananake ko tū nuꞌu taꞌatoꞌa era ko koa atu ꞌana ꞌo te haka moe i te manaꞌu ꞌi ruŋa i te ꞌAtua.
35 ꞌI te rua mahana ꞌi te pōꞌā, he uŋa e te nuꞌu pūꞌoko haka tere o te hare ture i te ꞌauario mo kī ki te taŋata pūꞌoko o te hare maꞌuꞌaurī mo haka eꞌa i a Pauro ararua ko Tira.
36 He kī e tū taŋata era ki a Pauro: «Ko uŋa mai ꞌana e te nuꞌu pūꞌoko haka tere o te hare ture mo haka eꞌa i a kōrua. ꞌO ira, ka eꞌa kōrua ka oho».
37 He kī ia e Pauro ki tū nuꞌu era:
«Ena, i toꞌo nō mai i a māua i te rōmano, he haka tiŋaꞌi ꞌi muꞌa o te taŋata taꞌatoꞌa kai aŋa hia mai e tahi ture, he haka puru ꞌi roto i te hare maꞌuꞌaurī; ꞌe, ¿ꞌi te hora ena ko haŋa ꞌā mo haka eꞌa kiva-kiva? E ko eꞌa a māua. Ka oho mai e rāua mau ꞌā ka kī mai».
38 He haka ꞌite e te ꞌauario i tū meꞌe era ki te nuꞌu pūꞌoko haka tere o te hare ture. I ꞌite era e rā nuꞌu he rōmano a kuā Pauro, he riꞌa-riꞌa rō atu ꞌai.
39 He oho he kī e rā nuꞌu ki a Pauro ararua ko Tira mo haka rehu i tū meꞌe aŋa era e rāua. He haka eꞌa ia mai roto i te hare maꞌuꞌaurī ꞌe he ani mo oho rō ꞌai mai Fīripo.
40 I eꞌa era a Pauro ararua ko Tira, he oho ki te hare o tū viꞌe era ko Riria. I oti era te uꞌi, te haka koa, ꞌe te haka haŋu i te nuꞌu taina o rā hare, he eꞌa he oho mai Fīripo.