He Aŋa o te ꞌĀpōtoro 21:1-40
21 I hoki era tū ŋā taina era, he eke a mātou ki ruŋa i te pahī ꞌe he oho tī-tika ki Kō. ꞌI te rua mahana i oho ai ki Rora, ꞌe mai ira ki Pātara.
2 ꞌI Pātara a mātou i ꞌite ai he eꞌa te pahī e tahi ki Fenitia. He eke a mātou ki ruŋa he oho.
3 ꞌI te oho iŋa he takeꞌa mai te motu era ko Tīpere ꞌi te pāꞌiŋa maui, ꞌe ko te oho iŋa ꞌā a mātou ki te henua era ko Tīria. ꞌI te ai o te meꞌe o ruŋa o te pahī mo haka topa ꞌi Tiro, he tomo ꞌi ira.
4 He piri ia a mātou ki te nuꞌu ⸤haka moe i te manaꞌu⸥ ꞌi ruŋa i a Ietū o ira, ꞌe he noho ꞌi muri i a rāua e hitu mahana. He kī e rā nuꞌu ki a Pauro, hai vānaŋa i haka ꞌite e te ⸤Vārua Maitai⸥, mo taꞌe oho ki Hērutarema.
5 I oti era te ŋā mahana nei, he eꞌa a mātou mo oho. Te nuꞌu taina taꞌatoꞌa ananake ko te rāua ŋā viꞌe ꞌe ŋā poki he uŋa i a mātou ꞌātā ka tuꞌu rō ki te taha-taha o te tai. ꞌI ira a mātou i tū-turi i pure tahi ai.
6 I oti era te ꞌaroha, he eke a mātou ki ruŋa i te pahī, ꞌe he hoki rā nuꞌu ki te rāua hare.
7 Mai Tiro i reva ai a mātou ki Toremaira. I tuꞌu era he ꞌaroha ki te nuꞌu taina, ꞌe he noho ꞌi muri i a rāua e tahi mahana.
8 ꞌI te rua mahana he eꞌa a mātou mai ira he oho ki Tētārea ki te hare o Feripe, ꞌe ꞌi muri i a ia i noho ai. A Feripe he taŋata haka ꞌite i te ⸤roŋo riva-riva o te ꞌAtua⸥. A ia o roto o te ŋāŋata hoko hitu hāꞌūꞌū i te aŋa o te ⸤ꞌāpōtoro⸥.
9 A Feripe e hā ꞌāꞌana ŋā poki vahine taureꞌa-reꞌa. Rā ŋā poki he perofeta, e vānaŋa rō ꞌana i te meꞌe haka ꞌite e te ꞌAtua.
10 Ko rahi atu ꞌā te mahana o mātou ꞌi Tētārea i tuꞌu atu ai mai Hūrea te perofeta e tahi te ꞌīŋoa ko Ākapo.
11 I piri mai era ki a mātou, he toꞌo i te pena o Pauro, he here-here i tōꞌona rima i tōꞌona vaꞌe ꞌe he kī: «O te Vārua Maitai i haka ꞌite mai e here-here rō pē nei e te ⸤hūrio⸥ ꞌi Hērutarema i te taŋata ōꞌona te pena nei, ꞌe ꞌai ka vaꞌai ki te rima o te hau kē».
12 I ŋaroꞌa era e mātou ꞌe e te nuꞌu o Tētārea i te meꞌe nei, he ani ki a Pauro mo taꞌe oho ki Hērutarema.
13 He pāhono mai e Pauro: «¿He aha rā a kōrua e haka mamae ena i tōꞌoku māhatu hai taŋi o kōrua? Taꞌe nō mo here-here a au e noho atu ena, ꞌātā mo mate takoꞌa ꞌi Hērutarema o ruŋa i a Ietū, he Pūꞌoko Haka Tere o tātou».
14 ꞌI te taꞌe ravaꞌa mo haka noho i a Pauro, he haka rē e mātou ꞌai ka kī: «Ka ai pe he meꞌe o te ꞌAtua i haŋa».
15 I oti era te mātou mahana ꞌi Tētārea, he haka riva-riva ꞌe he eꞌa he oho ki Hērutarema.
16 I oho takoꞌa rō atu ꞌi muri i a mātou te tētahi nuꞌu o Tētārea haka moe i te manaꞌu ꞌi ruŋa i a Ietū. O rāua a mātou i maꞌu ki te hare o te taŋata e tahi o Tīpere te ꞌīŋoa ko Nātone, taŋata haka moe takoꞌa i te manaꞌu ꞌi ruŋa i a Ietū mai muꞌa ꞌā, ꞌe ꞌāꞌana i vaꞌai mai hai kona mo moe ꞌi tōꞌona hare.
He oho a Pauro he uꞌi i a kuā Tanatiako
17 I tuꞌu era a mātou ki Hērutarema, he oho atu te taina taꞌatoꞌa, e koa rō ꞌā, he toꞌo mai i a mātou.
18 ꞌI te rua mahana he maꞌu e Pauro i a mātou ꞌi muri i a ia mo uꞌi i a ⸤Tanatiako⸥ ꞌe i te tētahi atu nuꞌu pūꞌoko haka tere o te nūnaꞌa taŋata haka moe i te manaꞌu ꞌi ruŋa i a Ietū o Hērutarema.
19 I piri era a mātou ki rā nuꞌu, he ꞌaroha e Pauro, ꞌe he ꞌaꞌamu i te meꞌe taꞌatoꞌa aŋa e te ꞌAtua hai ia ki te nuꞌu taꞌe he hūrio.
20 I ŋaroꞌa era i tū vānaŋa era, he haꞌahana-hana tahi ananake ki te ꞌAtua. He kī ia e tū nuꞌu era ki a Pauro:
«E te taina, ko ꞌite ꞌana e koe ka taꞌutini ka taꞌutini te nuꞌu hūrio haka moe i te manaꞌu ꞌi ruŋa i a Ietū, ꞌe taꞌatoꞌa e kī rō ꞌana mo maꞌu mo oho nō o tātou i te ⸤haka tere iŋa ꞌa Mōtē⸥.
21 I ŋaroꞌa rō e rāua e hāpī e oho ꞌana koe ki te hūrio taꞌatoꞌa noho i te tētahi henua mo taꞌe haꞌatura haka ꞌou ki te haka tere iŋa ꞌa Mōtē, mo taꞌe hore o te kiri o te kinoŋa o te ŋā poki, ꞌe mo taꞌe maꞌu haka ꞌou i te tātou haka tere iŋa.
22 ¿He aha te tātou meꞌe mo aŋa ꞌo manaꞌu he parautiꞌa mau ꞌā te rāua meꞌe ŋaroꞌa era? E ꞌite nō, paꞌi, e te nuꞌu ꞌī koe ko tuꞌu mai ꞌā.
23 »¿Ko ꞌite ꞌā koe? ꞌI roto i a mātou te ŋāŋata hoko hā ꞌī he haka mao i te rāua hōrea. Te meꞌe ꞌāꞌau mo aŋa:
24 ka maꞌu ꞌi muri i a koe, ka ⸤haka maꞌitaki⸥ kōrua mo haka tano ki te haka tere iŋa o tātou o te hūrio. E ꞌauhau te rāua meꞌe mo tūtia, ki riva ai a rāua mo haka varu i te pūꞌoko mo haka takeꞌa ko oti ꞌā te rāua hōrea. Pē ira te nuꞌu taina hūrio ka uꞌi ena he reo-reo te vānaŋa kī o ruŋa i a koe, ꞌe he ꞌite ko te haꞌatura iŋa ꞌā a koe i te haka tere iŋa ꞌa Mōtē.
25 »ꞌE, a koe ko ꞌite ꞌana ko pāpaꞌi ko haka ꞌite ꞌā a mātou ki te nuꞌu taꞌe he hūrio haka moe i te manaꞌu ꞌi ruŋa i a Ietū i te mātou manaꞌu: te rāua meꞌe nō mo maꞌu o te haka tere iŋa ꞌa Mōtē ko te ŋā meꞌe nei: ꞌina ko kai i te kiko tūtia ki te ꞌītoro, i te toto, ꞌe i te kiko o te ꞌanimare kai haka hiho i te toto, ꞌe ꞌina ko piri tane mo taꞌe ai he kenu he viꞌe».
He ꞌa-ꞌaru iŋa i a Pauro
26 He maꞌu ia e Pauro i tū ŋāŋata era hoko hā ꞌi muri i a ia. ꞌI te rua mahana he oho ananake he haꞌamata he haka maꞌitaki, pa he meꞌe kī ꞌi ruŋa i te rāua haka tere iŋa. He uru ia ananake ki te ⸤Kona Haꞌamuri ꞌAtua⸥, he haka ꞌite ki te ⸤oromatuꞌa⸥ a hē ka tano te hitu mahana o te rāua haka maꞌitaki, he mahana mo vaꞌai i te rāua tūtia.
27 I hāhine era mo tano o tū hitu mahana era, he takeꞌa e te tētahi nuꞌu hūrio o ꞌĀtia i a Pauro ꞌi te Kona Haꞌamuri ꞌAtua ꞌe he haka riri i te nuꞌu. He rere he ꞌa-ꞌaru i a Pauro,
28 koia ko ohu:
«¡E te itaraera ē, ka hāꞌūꞌū mai kōrua! O te taŋata nei te hāpī te oho ki te nuꞌu ꞌi te kona taꞌatoꞌa i te meꞌe ꞌina he tano ki a tātou ki te hūrio, ki te haka tere iŋa ꞌa Mōtē ꞌe ki te Kona Haꞌamuri ꞌAtua. ꞌE ꞌātā i maꞌu rō mai, ꞌi te mahana e tahi, i te nuꞌu taꞌe he hūrio ki roto i te kona o te hare nei o te ꞌAtua taꞌe haꞌatiꞌa ki te nuꞌu taꞌe he hūrio, ꞌe hai rā meꞌe i aŋa ai i te meꞌe taꞌe tano mo te kona moꞌa nei».
29 I kī ai pē ira he takeꞌa i a Pauro ꞌi te rua kona ꞌi muri i a Torofimo, taŋata o Ēfeto. He manaꞌu e rā nuꞌu i maꞌu rō e Pauro i rā taŋata ki roto i te Kona Haꞌamuri ꞌAtua.
30 Te nuꞌu o te kona taꞌatoꞌa o Hērutarema, i ꞌite era i tū meꞌe era, he riri rō atu ꞌai ꞌe i tāhuti i oho ai ki ira. He ꞌa-ꞌaru i a Pauro, he to-toi he oho ki haho o te Kona Haꞌamuri ꞌAtua, ꞌe he puru i te ꞌōpani.
31 E oho ꞌana ia rā nuꞌu mo tiŋaꞌi mo haka mate i a Pauro ꞌī ko tuꞌu ꞌā ki te kōmana o te vaꞌehau rōmano te parau ꞌāpī pē nei ē: te nuꞌu taꞌatoꞌa o Hērutarema ko riri ꞌana.
32 He haka taka-taka te kōmana i tāꞌana vaꞌehau ꞌe i te nuꞌu kape, he tāhuti he oho ki tū kona era ꞌi ira rā nuꞌu.
I takeꞌa era ananake i te kōmana ꞌe i te vaꞌehau, he haka rē i a Pauro, ꞌina kai tiŋaꞌi haka ꞌou.
33 He haka hāhine tū kōmana era, he ꞌa-ꞌaru i a Pauro, he kī mo here-here hai vivi e rua. I oti era he ꞌui ko ai a ia ꞌe he aha tāꞌana meꞌe i aŋa.
34 Meꞌe kē meꞌe kē e kī era e te nuꞌu. ꞌIna he aŋi-aŋi e tū kōmana era i te tī-tika o tū ture era ꞌi te rahi o te pōŋeha. ꞌO ira i haka maꞌu ai i a Pauro ki te kona noho o te vaꞌehau.
35 Ko hāhine ꞌana mo eke ki ruŋa i te ara o rā kona he ꞌamo a ruŋa e te vaꞌehau i a Pauro ꞌo tōtōā e te nuꞌu
36 ꞌo te ai ꞌi tuꞌa e oho era koia ko ohu-ohu: «¡Ka tiŋaꞌi ki te mate!».
He tātara iŋa o Pauro ki te taŋata
37 Ka oho mo ha-haꞌo i a Pauro ki roto i tū hare era o te vaꞌehau, ka ꞌui e Pauro ki tū kōmana era:
—¿E tano rō au mo vānaŋa ꞌiti-ꞌiti atu?
He pāhono e tū kōmana era:
—¿Ko ꞌite ꞌana ꞌō koe i te vānaŋa ⸤kirieko⸥?
38 ¿Taꞌe ꞌō koe he ehipto haka tumu era i te ture ꞌi muꞌa ꞌā oho ki roto i te kona ꞌone taꞌe noho taŋata e maꞌu rō ꞌā e maha taꞌutini taŋata taparahi-taꞌata mo te tamaꞌi?
39 He pāhono e Pauro:
—A au he hūrio o te kona era ko Taraso o Tiritia, he taŋata o te kona taꞌe ꞌiti-ꞌiti. He ani atu au mo haꞌatiꞌa mai ōꞌou mo vānaŋa ōꞌoku ki te taŋata.
40 He haꞌatiꞌa ia e tū kōmana era. He māroa a Pauro ꞌi ruŋa i tū ara era, he haꞌaauraꞌa hai rima mo mou o te taŋata. I mo-mou era he vānaŋa hai ꞌarero ⸤ꞌevereo⸥, he kī: