Māteo 26:1-75
26 I oti era a Ietū te vānaŋa i te ŋā meꞌe taꞌatoꞌa nei, he kī ki tāꞌana nuꞌu hāpī:
2 «Ko ꞌite ꞌana a kōrua: e rua mahana toe mo te ⸤ŋoŋoro o te Pakate⸥, ꞌe te ⸤Poki o te taŋata⸥ he vaꞌai ki te rima o te nuꞌu mo veo ꞌi ruŋa i te tātaurō».
3 ꞌI rā hora mau ꞌā ꞌi te hare o Kaifā, he ⸤oromatuꞌa hopeꞌa o te ra-rahi⸥, he taka-taka tahi te oromatuꞌa ra-rahi ꞌe te nuꞌu pūꞌoko haka tere ⸤hūrio⸥
4 ꞌe he haꞌaꞌau mo ꞌa-ꞌaru i a Ietū hai reo-reo mo tiŋaꞌi mo haka mate.
5 ꞌE tētahi o rāua e kī era: «ꞌIna ko ꞌa-ꞌaru ꞌi te ŋā mahana ena o te ŋoŋoro, ꞌo tātake ꞌe ꞌo moto te taŋata».
He huri iŋa i a Ietū hai manoꞌi
(Marko 14.3-9; Iovani 12.1-8)
6 A Ietū ia ꞌi Vētānia, ꞌi te hare o Tīmona, e kī takoꞌa era ko Rēpera.
7 He haka hāhine e tahi viꞌe e maꞌu rō ꞌana i te ipu aŋa hai māꞌea nehe-nehe ko ꞌī ꞌana e te manoꞌi hopeꞌa o te hauhaꞌa. E noho nō ꞌā a Ietū ꞌi ruŋa i te ꞌamuramaꞌa, he huri e rā viꞌe hai rā manoꞌi a ruŋa i te pūꞌoko.
8 I takeꞌa era e te nuꞌu hāpī ꞌa Ietū, he riri rō atu ꞌai ꞌe he haꞌamata he hēŋuꞌi-ŋuꞌi:
—¿Mo te aha i haka māuꞌa ai i te manoꞌi era?
9 Māuꞌa ꞌō i taꞌe hoꞌo ai mo hāꞌūꞌū ki te nuꞌu veve. Te manoꞌi era, paꞌi, e hauhaꞌa rahi rō ꞌā.
10 He ꞌite e Ietū ꞌe he kī:
—¿He aha kōrua e hēŋuꞌi-ŋuꞌi ena mo te viꞌe nei? ꞌĪ e aŋa mai ꞌā i te meꞌe riva-riva mōꞌoku.
11 Te nuꞌu veve e ko ŋaro mai muri i a kōrua ki te hora hopeꞌa, ꞌe a au e ko noho e ko oho nō atu ꞌi muri i a kōrua.
12 Te meꞌe aŋa mai nei e nei viꞌe hai huri mai i te manoꞌi ki ruŋa i tōꞌoku hakari e haka riva-riva ꞌana i a au mo tōꞌoku hora tanu.
13 ꞌĪ a au he kī atu: ꞌi te kona taꞌatoꞌa o te ao haka ꞌite i te ⸤roŋo riva-riva o te ꞌAtua⸥, he vānaŋa takoꞌa o ruŋa i te meꞌe aŋa mai nei e ia; pē ira ka taꞌe rehu ena a ia.
He hoꞌo iŋa o Hura i a Ietū
(Marko 14.10-11; Ruka 22.3-6)
14 E tahi o te hoꞌe ꞌahuru mā piti nuꞌu hāpī ꞌa Ietū, ko Hura Ikariote, he oho he uꞌi i te nuꞌu oromatuꞌa ra-rahi
15 ꞌe he kī: «¿E hia moni o kōrua mo vaꞌai mai mo vaꞌai atu ōꞌoku i a Ietū?».
He ꞌauhau e rā nuꞌu e toru ꞌahuru tara ꞌaurī.
16 ꞌE mai rā hora i uꞌi ai e Hura i te hora tano mo vaꞌai i a Ietū.
He kai iŋa hopeꞌa
(Marko 14.12-25; Ruka 22.7-23; Iovani 13.21-30; 1 Kōrinto 11.23-26)
17 ꞌI te mahana raꞌe o te ⸤ŋoŋoro kai i te haraoa ꞌina he revaura⸥, he haka hāhine tāꞌana nuꞌu hāpī ki a Ietū he ꞌui:
—¿ꞌI hē mātou ana aŋa i te tātou kai mo te Pakate?
18 He pāhono e Ietū:
—Ka oho ki Hērutarema, ki te hare o te kope ko ꞌite ꞌā e kōrua ko ai, ꞌai ka kī rō: «Te kī o te Maꞌori: “Ko hāhine ꞌana tōꞌoku hora. ꞌĪ a au he oho atu ki tuꞌu hare ananake ko tāꞌaku nuꞌu hāpī mo aŋa i te ŋoŋoro o te Pakate”».
19 He oho ia te nuꞌu hāpī ꞌa Ietū, he aŋa i tū meꞌe kī era, he haka riva-riva i te kai mo te Pakate.
20 I pō era, ꞌi ruŋa i te ꞌamuramaꞌa a Ietū ananake ko tāꞌana hoꞌe ꞌahuru mā piti nuꞌu hāpī.
21 E ka-kai nō ꞌana he kī:
—ꞌĪ a au he kī atu: e tahi o roto o kōrua nā he vaꞌai i a au ki te nuꞌu.
22 He māui-ui rō atu ꞌai te māhatu o tū nuꞌu era, ꞌe he haꞌamata he ꞌui e tahi e tahi:
—E Ietū, ¿ko au hō nā meꞌe?
23 He pāhono e Ietū:
—He kope o roto o kōrua haka ruku i tāꞌana haraoa ꞌi roto i te mareti haka ruku takoꞌa ꞌāꞌaku.
24 ꞌĪ a au he kī atu: te meꞌe taꞌatoꞌa hāꞌaki ꞌi ruŋa i te ⸤Pāpaꞌi Moꞌa⸥ mo topa ki te Poki o te taŋata e ko taꞌe topa; ꞌe, ¡ko te ꞌaroha i te kope māꞌana e vaꞌai ki te nuꞌu! I hau ꞌi te riva mōꞌona ꞌāhani i taꞌe poreko.
25 A Hura, he kope māꞌana e vaꞌai i a Ietū, he ꞌui:
—E te Maꞌori, ¿ko au hō nā kope?
—ꞌĀꞌau mau ꞌā i kī —i pāhono ai e Ietū.
26 E ka-kai nō ꞌana ananake, he toꞌo e Ietū i te haraoa e tahi, he māuru-uru ki te ꞌAtua, he more-more, he tuhaꞌa ki tāꞌana nuꞌu hāpī ꞌe he kī:
«Ka kai kōrua i te haraoa ena; he hakari ōꞌoku».
27 I oti era he toꞌo i te hapaina vino, he māuru-uru ki te ꞌAtua, he vaꞌai ki tāꞌana nuꞌu hāpī ꞌe he kī:
«Ka unu kōrua taꞌatoꞌa mai roto i te hapaina ena.
28 He toto nā ōꞌoku ka tehe ena mo te riva-riva o te taŋata, mo haka kore o te rāua hara. Hai nā toto ka tāpaꞌo ena i te ⸤haka tere iŋa ꞌāpī o te ꞌAtua ananake ko te taŋata⸥.
29 ꞌĪ a au he kī atu: e ko unu haka ꞌou a au i te vino ꞌātā ki te mahana ka unu ena tātou i te vino ꞌāpī ꞌi te ao haka tere e tōꞌoku Matuꞌa».
He haka rehu iŋa i a Ietū
(Marko 14.26-31; Ruka 22.31-34; Iovani 13.36-38)
30 He hīmene ia ananake mo haꞌahana-hana ki te ꞌAtua. I oti era he eꞌa a kuā Ietū he oho ki te Maꞌuŋa era o te ꞌŌrivo.
31 ꞌI te ara he kī e Ietū:
—A kōrua taꞌatoꞌa he haka rehu i a au ꞌi te pō nei. Pē ira, paꞌi, e hāꞌaki ena ꞌi ruŋa i te Pāpaꞌi Moꞌa ꞌi te vānaŋa kī e te ꞌAtua pē nei ē:“He tiŋaꞌi a au i te taŋata hāpaꞌo māmoe,ꞌe he maraŋa tahi tāꞌana māmoe”.
32 »ꞌE, ka ai atu pē ira, ki ora a au mai te mate, he piri a tātou ꞌi Karirea.
33 He kī e Pētero:
—Mo haka rehu i a koe e te nuꞌu taꞌatoꞌa ena, māꞌaku koe e taꞌe haka rehu.
34 He kī e Ietū:
—ꞌArīnā mau nei ꞌā ꞌi te pō, e ko ꞌoꞌoa hia te moa, ka kī ena koe ki te nuꞌu e toru kī iŋa kai ꞌite koe ko ai a au.
35 He kī haka ꞌou e Pētero:
—¡Ka ai atu he mate a au ꞌi muri i a koe, e ko kī au ki te hora hopeꞌa kai ꞌite a au ko ai a koe!
ꞌE ꞌai te tētahi nuꞌu hāpī ꞌa Ietū e kī takoꞌa era pē ira.
He pure iŋa o Ietū ꞌi Hetesēmānī
(Marko 14.32-42; Ruka 22.39-46)
36 He oho ia a Ietū ananake ko tāꞌana nuꞌu hāpī ki te kona te ꞌīŋoa ko Hetesēmānī ꞌi te Maꞌuŋa era o te ꞌŌrivo ꞌe he kī: «Ka noho nō kōrua ꞌi nei, ꞌī a au he oho he pure».
37 He maꞌu ꞌi muri i a ia i a Pētero ꞌe i te ŋā poki e rua ꞌa Tevereo. He oꞌo ia te māui-ui ki roto i te māhatu o Ietū, he haka kiva-kiva, ꞌe he ŋaroꞌa ꞌina ōꞌona haŋu toe mo ꞌamo i te rahi o te ꞌati ka topa era ki a ia.
38 He kī: «E rahi rō ꞌana te māui-ui ŋaroꞌa e au ꞌi roto i tōꞌoku māhatu ꞌi te ꞌati ka topa mai ena. Ka no-noho kōrua ꞌi nei; e uꞌi ꞌo hāꞌuru rō».
39 He haka ꞌava-ꞌava a Ietū pe muꞌa, he tū-turi he noi ꞌātā ka puā rō te tira ki te ꞌōꞌone, he pure: «E Koro ōꞌoku ē, ana tano ki a koe, ka toꞌo te ꞌati nei mai ruŋa i a au. ꞌE, ka ai atu ꞌī ꞌāꞌaku meꞌe haŋa, ka haka tano hai meꞌe ꞌāꞌau i haŋa ꞌe taꞌe hai meꞌe ꞌāꞌaku».
40 He hoki ia ki tū kona era ꞌi ira a kuā Pētero, he uꞌi ko hāꞌuru ꞌana. He meꞌe ki a Pētero: «¿Kai ravaꞌa hia ka tahi hora o te hokorua mai o kōrua i hāꞌuru rō ai?
41 E ꞌa-ꞌara e pure ꞌo hara. Nā ꞌi roto i a kōrua te haŋa mo aŋa i te meꞌe riva-riva, te ꞌino nō he taꞌe pūai o kōrua».
42 He hoki ia a Ietū he pure: «E Koro ōꞌoku ē, mo kore o te rāveꞌa mo taꞌe ꞌamo ōꞌoku ꞌi te ꞌati ka topa mai ena, ka aŋa taꞌa meꞌe nō era i haŋa».
43 I hoki era ki muri i a kuā Pētero, ko hāꞌuru haka ꞌou ꞌā ananake ꞌi te rohi-rohi.
44 He haka rē ia i rā nuꞌu, he hoki he pure te toru pure iŋa, ꞌe ko tū vānaŋa ꞌā i kī ai.
45 He hoki ia ki te kona ꞌi ira tū nuꞌu era ꞌe he kī: «¿E hāꞌuru ꞌana a kōrua e haka ora ꞌā? Ko tano ꞌā te hora o te Poki o te taŋata mo vaꞌai ki te rima o te nuꞌu hara.
46 Ka eꞌa ki ruŋa ki oho rō tātou. Nā ko hāhine mai ꞌā tū kope era mo vaꞌai i a au ki te rima o te nuꞌu ra-rahi».
He ꞌa-ꞌaru iŋa i a Ietū
(Marko 14.43-50; Ruka 22.47-53; Iovani 18.2-11)
47 E vānaŋa nō ꞌā a Ietū ki tū nuꞌu era, i tuꞌu ai a Hura, he kope o roto o te hoꞌe ꞌahuru mā piti nuꞌu hāpī ꞌāꞌana. ꞌI muri i oho takoꞌa ai meꞌe rahi taŋata e maꞌu-maꞌu rō ꞌā i te hoe ꞌe i te miro, i uŋa e te nuꞌu oromatuꞌa ra-rahi ꞌe e te nuꞌu pūꞌoko haka tere hūrio.
48 Ko haꞌaꞌau era ꞌā e Hura ki rā nuꞌu pē nei ē: «Ka uꞌi atu ena kōrua i te kope ko hoŋi ꞌā e au, ko ia rā taŋata. Ka ꞌa-ꞌaru».
49 He haka hāhine a Hura ki a Ietū he ꞌui:
—¿Pē hē koe, e te Maꞌori ē?
ꞌE he hoŋi a te ꞌāriŋa.
50 He kī e Ietū:
—E hoa, ka haka mao taꞌa aŋa.
He haka hāhine te tētahi o tū nuꞌu era he ꞌa-ꞌaru i a Ietū.
51 E tahi kope o roto o te nuꞌu ꞌa Ietū he kume i tāꞌana hoe, he paꞌo i te tariŋa o te tāvini o te oromatuꞌa hopeꞌa o te ra-rahi.
52 He kī e Ietū:
—Ka haka hoki taꞌa hoe ena ki tōꞌona kona. Te taŋata taꞌatoꞌa moto hai hoe hai hoe ka mate ena.
53 ¿Kai ꞌite ꞌō koe mo ani ōꞌoku ki tōꞌoku Matuꞌa, he uŋa mai e ia, ꞌi te hora mau nei ꞌā, ka taꞌutini ka taꞌutini te merahi?
54 Mo aŋa ōꞌoku pē ira, ¿pē hē ia ana haka tano te meꞌe hāꞌaki ꞌi ruŋa i te Pāpaꞌi Moꞌa kī pē ira ana topa?
55 He ꞌui ia e Ietū ki tū nuꞌu taꞌatoꞌa era:
—¿He toke-toke ꞌō a au i oho mai ai kōrua e maꞌu-maꞌu rō ꞌana i te hoe ꞌe i te miro mo ꞌa-ꞌaru i a au? Paurō te mahana, paꞌi, a au e hāpī era ꞌi te Kona Haꞌamuri ꞌAtua, ꞌe ꞌina kōrua kai ꞌa-ꞌaru i a au.
56 Te meꞌe taꞌatoꞌa nei i topa ai mo tano ki te meꞌe kī e te perofeta ꞌi ruŋa i te Pāpaꞌi Moꞌa.
ꞌI tū hora mau era ꞌā, he hoa i a Ietū e tāꞌana nuꞌu hāpī taꞌatoꞌa ꞌe he tē-tere.
Ko Ietū ꞌi muꞌa o te nuꞌu hūrio ra-rahi
(Marko 14.53-65; Ruka 22.54-55, 63-71; Iovani 18.12-14, 19-24)
57 He maꞌu i a Ietū e tū nuꞌu ꞌa-ꞌaru era i a ia, he oho ki te hare o Kaifā, he oromatuꞌa hopeꞌa o te ra-rahi. E taka-taka rō ꞌā ꞌi ira te ⸤maꞌori o te haka tere hūrio⸥ ꞌe te nuꞌu pūꞌoko haka tere hūrio.
58 A Pētero ia i haka ꞌava-ꞌava i oho ai ꞌi tuꞌa o rā nuꞌu ꞌātā ka tuꞌu rō ki tū hare era. He uru ki te kona o haho ꞌā, he noho ꞌi muri i te ꞌauario mo uꞌi pē hē rā meꞌe ka hopeꞌa era.
59 Te nuꞌu oromatuꞌa ra-rahi ꞌe tū ŋāŋata taꞌatoꞌa haka ꞌou era o te ⸤nūnaꞌa i a rāua te kī iŋa hopeꞌa o te haka tere hūrio⸥ e uꞌi ꞌana i te ꞌōtohe mo haka ūtuꞌa i a Ietū hai mate hai reo-reo o te nuꞌu mataꞌite,
60 ꞌe ꞌina e rāua he ravaꞌa, ka ai atu nuꞌu rahi te nuꞌu i tuꞌu i reo-reo o ruŋa i a Ietū.
I hopeꞌa i tuꞌu ai e rua kope haka ꞌou
61 he kī: «Te taŋata nei i kī rō pē nei ē: “E ravaꞌa nō e au mo haka hiŋa ꞌe mo haka tuꞌu haka ꞌou e toru nō mahana i te Kona Haꞌamuri ꞌAtua”».
62 He māroa ia te oromatuꞌa hopeꞌa o te ra-rahi he ꞌui ki a Ietū:
—¿ꞌIna ꞌō ꞌaꞌa pāhono? ¿He aha te meꞌe e kī mai nei o ruŋa ōꞌou?
63 I mou nō a Ietū. He kī e rā oromatuꞌa:
—Mo ai koe he ⸤Kiritō⸥, he Poki o te ꞌAtua, ka kī mai koe hai ꞌīŋoa o te ꞌAtua ora.
64 He pāhono e Ietū:
—Nā e koe ko kī ꞌā. ꞌE ꞌī a au he kī takoꞌa atu: e takeꞌa rō e kōrua i te Poki o te taŋata e noho rō ꞌā ꞌi te pāꞌiŋa mataꞌu o te ꞌAtua, i a ia te pūai taꞌatoꞌa, ꞌe i tōꞌona topa iŋa mai ꞌi ruŋa i te raŋi e tahi.
65 I ŋaroꞌa era i te vānaŋa ꞌa Ietū e rā oromatuꞌa, he ihi i tōꞌona kahu mo haka takeꞌa i tōꞌona riri ꞌe he kī:
—¡Te vānaŋa o te taŋata nei he vānaŋa taꞌe tano mo te ꞌAtua! ¿Mo aha nō o tātou te mataꞌite haka ꞌou? Nā ko ŋaroꞌa ꞌana e kōrua i te kī iŋa mai i te vānaŋa taꞌe tano.
66 ¿Pē hē te kōrua kī?
He pāhono e rā nuꞌu:
—Ko hape ꞌana a ia, ka tiŋaꞌi ka haka mate.
67 He ꞌanu-ꞌanu e te tētahi o rā nuꞌu a te ꞌāriŋa o Ietū ꞌe he puꞌa. He puru i te mata hai kahu e te tētahi atu ꞌe he haka eke hai rima ki te ꞌāriŋa
68 koia ko kī: «Mo ai koe he Kiritō, ¡ka kī mai ꞌa ꞌai i puꞌa atu!».
He kī iŋa o Pētero kai ꞌite a ia ko ai a Ietū
(Marko 14.66-72; Ruka 22.56-62; Iovani 18.15-18, 25-27)
69 E noho nō ꞌana a Pētero ꞌi haho o te hare o tū oromatuꞌa hopeꞌa era o te ra-rahi, he haka hāhine e tahi viꞌe tāvini he kī:
—Ē, a koe o roto i te nuꞌu oho ꞌi muri i a Ietū era o Karirea.
70 ꞌI muꞌa o te taꞌatoꞌa a Pētero i ꞌina ai ꞌe he kī:
—Kai ꞌite a au he aha taꞌa meꞌe e kī mai ena.
71 I hini ꞌiti era he oho ki muri i te ꞌōpani. ꞌI ira i takeꞌa ai i a Pētero e te rua viꞌe tāvini he kī ki te tētahi nuꞌu:
—Te taŋata era o muri o kuā Ietū era o Nātāreta.
72 I hōrea, i ꞌina haka ꞌou ai e Pētero:
—¡Kai ꞌite a au ko ai te taŋata ena!
73 Ko hini atu ꞌā, he haka hāhine ki a Pētero te nuꞌu māroa o rā kona he kī:
—He parautiꞌa mau ꞌā a koe o roto o rā nuꞌu; hai huru o tuꞌu vānaŋa iŋa e aŋi-aŋi ena.
74 He kī e Pētero:
—¡He hōrea atu au hai ꞌīŋoa o te ꞌAtua, kai ꞌite a au ko ai te taŋata ena, ꞌe ka hoa a au ki roto i te pōꞌauahi mo ai e reo-reo atu ꞌana a au!
ꞌI rā hora mau ꞌana he ꞌoꞌoa te moa.
75 He topa te manaꞌu o Pētero ki tū meꞌe kī era e Ietū: «E ko ꞌoꞌoa hia te moa ka kī rō ena e koe e toru kī iŋa kai ꞌite koe ko ai a au». He eꞌa ia a Pētero he oho mai tū kona era, ꞌe he toꞌo rō atu ꞌai te taŋi.
