Māteo 27:1-66
27 ꞌI te pō era ꞌā o te rua mahana, he haꞌaꞌau te ⸤oromatuꞌa ra-rahi⸥ taꞌatoꞌa ꞌe te nuꞌu pūꞌoko haka tere ⸤hūrio⸥ mo haka tiŋaꞌi i a Ietū.
2 He maꞌu ia i a Ietū e here-here rō ꞌana he vaꞌai ki a Pirato, he suerekao rōmano.
He mate iŋa o Hura
3 A Hura, taŋata hoꞌo era i a Ietū, i ꞌite era ko haka ūtuꞌa ꞌana i a Ietū hai mate, he oꞌo te mamae ki roto i te māhatu. He oho he haka hoki i tū tara ꞌaurī era e toru ꞌahuru ki te nuꞌu oromatuꞌa ra-rahi ꞌe ki te nuꞌu pūꞌoko haka tere hūrio,
4 he kī:
—Ko hara ꞌana a au ꞌo te vaꞌai atu i te taŋata ꞌina e tahi ōꞌona hape mo tiŋaꞌi mo haka mate.
He pāhono e rā nuꞌu:
—Taꞌe he meꞌe o mātou. ¡Ōꞌou ꞌā tuꞌu ꞌati!
5 He ava e Hura i rā ŋā tara ꞌaurī a roto i te Kona Haꞌamuri ꞌAtua. Ki oti he oho he tau reva-reva i a ia.
6 He runu e rā ŋā oromatuꞌa i tū ŋā tara ꞌaurī era ꞌe he kī: «Te moni nei ko ꞌōꞌone ꞌana ꞌi te toto, he moni ꞌauhau mo haka tiŋaꞌi i te taŋata; e ko tano tātou mo ha-haꞌo ki roto i te ꞌavahata moni haꞌataꞌa mo te ꞌAtua».
7 He haꞌaꞌau ia mo hoꞌo hai rā moni i te henua kī «He Henua o te Taŋata Aŋa i te Meꞌe hai ꞌŌꞌone», mo ai o te kona mo tanu o te nuꞌu o te rua henua.
8 Pē ira rā kona i nape ai «He Henua Toto» ꞌe pē ira e kī ena ꞌātā ki te hora nei.
9 Pē nei i tano ai te meꞌe kī e te perofeta era ko Heremia:«He toꞌo i rā toru ꞌahuru tara ꞌaurī era,he moni haꞌaꞌau e te itaraera mo ꞌauhau mo rā taŋata,
10 ꞌe hai rā moni i hoꞌo ai i te henua o te taŋata aŋa i te meꞌe hai ꞌōꞌone,pa he meꞌe kī mai era e te ꞌAtua».
A Ietū ꞌi muꞌa o Pirato
(Marko 15.2-5; Ruka 23.3-5; Iovani 18.33-38)
11 He haka māroa i a Ietū ꞌi muꞌa o tū suerekao era ko Pirato, ꞌe ꞌāꞌana i ꞌui:
—¿He ꞌariki koe o te hūrio?
—ꞌĀꞌau i kī —i pāhono ai e Ietū.
12 Te nuꞌu oromatuꞌa ra-rahi ꞌe te nuꞌu pūꞌoko haka tere hūrio ꞌai e tuhi era i te meꞌe mo rāua he hape o Ietū, ꞌe ꞌina he pāhono e Ietū.
13 ꞌO ira i ꞌui haka ꞌou ai e Pirato:
—¿ꞌIna ꞌō he ŋaroꞌa e koe te meꞌe taꞌatoꞌa e tuhi atu ena?
14 ꞌIna e tahi vānaŋa i kī e Ietū ꞌe he māere rō atu ꞌai te suerekao.
Kai haŋa a Pirato mo haka ūtuꞌa i a Ietū hai mate
(Marko 15.6-20; Ruka 23.13-25; Iovani 18.38–19.16)
15 ꞌI te ⸤ŋoŋoro o te Pakate⸥, e ai rō ꞌā te meꞌe rava māhani aŋa e te suerekao, he haka eꞌa e tahi taŋata mai roto i te hare maꞌuꞌaurī, he kope haŋa nō era e te nuꞌu.
16 ꞌI roto i te hare maꞌuꞌaurī te taŋata e tahi te ꞌīŋoa ko Ietū Varavā, he kope o ruŋa i a ia e vānaŋa rahi era te taŋata.
17 I taka-taka era te nuꞌu, he ꞌui e Pirato: «¿Ko ai te meꞌe haŋa o kōrua mo haka eꞌa atu: ko Ietū Varavā, ꞌo ko Ietū kī he ⸤Kiritō⸥?».
18 A Pirato, paꞌi, ko ꞌite ꞌā i vaꞌai ai i a Ietū ki a ia e tū nuꞌu ra-rahi era o te hūrio he mākota ꞌo te ai e haka roŋo rō ꞌā e te taŋata.
19 E noho nō ꞌā a Pirato ꞌi te kona ture, i tuꞌu ai te roŋo o tāꞌana viꞌe pē nei ē: «ꞌIna koe ko aŋa e tahi meꞌe ki te taŋata taꞌe hara ena. I moe vārua rō, paꞌi, a au o ruŋa i a ia ꞌi te pōꞌā ꞌe he huru kē rō atu ꞌai a au».
20 ꞌO haka eꞌa e Pirato i a Ietū, tū nuꞌu oromatuꞌa era ꞌe tū nuꞌu pūꞌoko haka tere era o te hūrio ko aŋa ꞌā mo peꞌe o te taŋata ki a rāua mo ani mo haka eꞌa i a Varavā ꞌe mo tiŋaꞌi mo haka mate i a Ietū.
21 He ꞌui haka ꞌou e te suerekao:
—¿Ko ai o te ŋā kope nei haŋa e kōrua mo haka eꞌa atu?
He kī e te nuꞌu:
—¡Ko Varavā!
22 He ꞌui ia e Pirato:
—¿He aha tāꞌaku meꞌe mo aŋa ki a Ietū kī he Kiritō?
He pāhono tahi:
—¡Ka veo ꞌi ruŋa i te tātaurō!
23 He kī e Pirato:
—¿He aha tāꞌana meꞌe taꞌe tano i aŋa?
He kī haka ꞌou e tū nuꞌu era i ꞌata haka pūai te reꞌo:
—¡Ka veo ꞌi ruŋa i te tātaurō!
24 I uꞌi era e Pirato ꞌina he rāveꞌa toe ꞌāꞌana mo haka huri i te rāua manaꞌu ꞌe pe te ꞌata pūai nō e pōŋeha era, he uŋa hai vai, he hopu i tōꞌona rima ꞌi muꞌa i te taꞌatoꞌa, ꞌe ꞌai ka kī:
—Taꞌe ōꞌoku te hape o te mate o te taŋata nei; he meꞌe o kōrua.
25 He pāhono e te taŋata taꞌatoꞌa:
—¡Mo mātou ia ꞌe mo te mātou ŋā poki te hape o te mate o te taŋata ena!
26 He uŋa ia e Pirato he haka eꞌa i a Varavā, ꞌe he haka tiŋaꞌi i a Ietū hai ꞌuaka. I oti era he vaꞌai ki te vaꞌehau i a Ietū mo maꞌu mo veo ꞌi ruŋa i te tātaurō.
27 He maꞌu he raꞌe e te vaꞌehau i a Ietū ki te kona e tahi o roto i te hare o te suerekao. ꞌI ira i haka taka-taka ai i te vaꞌehau ꞌe he haka vari tahi i a Ietū.
28 He patu ananake i te kahu o Ietū ꞌe he puꞌa hai kapa mea-mea.
29 He huki a te pūꞌoko hai hei i aŋa hai maŋa-maŋa o te tiare pū-pū ꞌe he vaꞌai e tahi miro ki te rima mataꞌu. I oti era he tū-turi te vaꞌehau ꞌi muꞌa o Ietū ꞌe he haka meꞌe-meꞌe he kī: «¡¿Pē hē te ꞌAriki o te hūrio?!».
30 He ꞌanu-ꞌanu takoꞌa e rā nuꞌu, ꞌe hai tū miro mau era ꞌā o te rima e haka eke era ki te pūꞌoko.
31 I oti era te haka meꞌe-meꞌe pē ira, he patu ananake i tū kapa mea-mea era, he haka uru haka ꞌou i tōꞌona kahu ꞌe he maꞌu mo veo ꞌi ruŋa i te tātaurō.
He veo iŋa i a Ietū ꞌi ruŋa i te tātaurō
(Marko 15.21-32; Ruka 23.26-43; Iovani 19.17-27)
32 I eꞌa era mai ira, he piri ki te taŋata e tahi o Tīrene te ꞌīŋoa ko Tīmona. He haka ꞌamo ki a ia i te tātaurō o Ietū.
33 I tuꞌu era ki te kona te ꞌīŋoa ko Korokota (te auraꞌa o te ꞌīŋoa nei: «kona o te pakahera taŋata mate»),
34 he haka unu hai vino ꞌānoꞌi hai meꞌe maŋeo ꞌo ŋaroꞌa rahi e ia i te mamae. I haka ꞌatu era e Ietū, ꞌina kai haŋa mo unu.
35 I oti era te veo ꞌi ruŋa i te tātaurō, he pere e te vaꞌehau i te kahu o Ietū mo uꞌi ki a ai ki a ai ana topa.
36 I oti era he no-noho ꞌi ira he ꞌauario.
37 A ruŋa o tōꞌona pūꞌoko i huki ai e tahi miro pararaha e pāpaꞌi rō ꞌana he aha te tumu o tōꞌona ūtuꞌa. E hāꞌaki era: «Ko Ietū nei, he ꞌAriki o te hūrio».
38 ꞌI te pāꞌiŋa mataꞌu ꞌe ꞌi te pāꞌiŋa maui o Ietū te tātaurō haka ꞌou ꞌi ruŋa i veo ai e rua toke-toke.
39 Te nuꞌu vari a ira ꞌai e vā-vā era koia ko ue-ue i te rāua pūꞌoko
40 e kī era: «¿Taꞌe ꞌō ko koe tū meꞌe kī era he haka hiŋa i te ⸤Kona Haꞌamuri ꞌAtua⸥ ꞌe e toru mahana he haka tuꞌu haka ꞌou e koe? ¡Mo ai, hoꞌi, ōꞌou he Poki o te ꞌAtua, ka haka eꞌa koe i a koe mai te ꞌati ena ꞌe ka topa mai mai ruŋa i te tātaurō!».
41 Te nuꞌu oromatuꞌa ra-rahi, te ⸤maꞌori o te haka tere hūrio⸥ ꞌe te nuꞌu pūꞌoko haka tere hūrio ꞌai e haka meꞌe-meꞌe takoꞌa era:
42 «Ko haka eꞌa ꞌana i te tētahi taŋata mai roto i te rāua ꞌati, ꞌe, ¿e ko ravaꞌa mo haka ora i a ia mau era ꞌā? ¿Taꞌe ꞌō he ꞌAriki o te itaraera? ¡Mo topa mai ōꞌona mai ruŋa i te tātaurō, he haka moe mātou i te manaꞌu ꞌi ruŋa i a ia!
43 Te kope ena e haka moe rō ꞌana i tōꞌona manaꞌu ꞌi ruŋa i te ꞌAtua. ¡Ka haka ora ia e te ꞌAtua ꞌi te hora ena, ana ai e haŋa mau rō ꞌā ki a ia! ¿Taꞌe ꞌō ko kī mai ꞌana he Poki a ia o te ꞌAtua?».
44 ꞌE, takoꞌa, i vā-vā rō i a Ietū e tū ŋā toke-toke veo era ꞌi tupuꞌaki ōꞌona.
He mate iŋa o Ietū
(Marko 15.33-41; Ruka 23.44-49; Iovani 19.28-30)
45 I tano era te hora kai, he pōhāhā tahi te henua ꞌātā ki te hora toru o te ahi-ahi.
46 ꞌI rā hora, i aꞌu a Ietū i te reꞌo i ohu ai: Elí, Elí, ¿lemá sabactani? (Te haꞌaauraꞌa o te vānaŋa nei: «E tōꞌoku ꞌAtua ē, e tōꞌoku ꞌAtua ē, ¿he aha koe i haka rē ai i a au hoko tahi nō?»).
47 Tētahi o te nuꞌu o rā kona he ŋaroꞌa he kī: «Te kope nei e ohu ꞌā ki te perofeta era ko ꞌĒria».
48 He tahuti ia e tahi o rā nuꞌu, he toꞌo i te meꞌe tuꞌu pa he vavai, he haka ruku ki roto i te vino maŋeo, he huki ki ruŋa i te miro ꞌe he maꞌu he haka puā ki te ŋutu o Ietū mo ꞌomo-ꞌomo.
49 He kī e te tētahi: «Ka haka rē ki uꞌi tātou hoki e tuꞌu rō mai a ⸤ꞌĒria⸥ e toꞌo rō i a ia ꞌo mate».
50 He ohu pūai haka ꞌou a Ietū, ꞌe he mate.
51 ꞌI rā hora mau ꞌā te korotina o roto i te Kona Haꞌamuri ꞌAtua he paihi mai ruŋa ki raro ꞌe he topa e rua pāꞌiŋa.* He mākenu-kenu te henua, ꞌe he ŋāꞌaha-ꞌaha te māꞌea,
52 te kona ha-haꞌo pāpaku he ha-hata, ꞌe meꞌe rahi nuꞌu ⸤haka moe i te manaꞌu⸥ ꞌi ruŋa i te ꞌAtua, ko mā-mate era ꞌana, i ora haka ꞌou
53 ꞌe he eꞌa mai te kona ha-haꞌo i a rāua. I ora era a Ietū mai te mate, he oho rā nuꞌu ora haka ꞌou era ki Hērutarema, ꞌe nuꞌu rahi te nuꞌu i takeꞌa i a rāua ꞌi ira.
54 I takeꞌa era e te kape o te vaꞌehau ananake ko te nuꞌu vaꞌehau ꞌāꞌana ꞌauario i a Ietū ꞌi ruŋa i te tātaurō i te mākenu-kenu iŋa o te henua ꞌe i te meꞌe taꞌatoꞌa topa, he toꞌo rō atu ꞌai te riꞌa-riꞌa ꞌe he kī: «¡He aŋi mau ꞌana ꞌō te taŋata nei he Poki o te ꞌAtua!».
55 ꞌI rā kona, mai kōnui ꞌā, e uꞌi era meꞌe rahi nō atu ŋā viꞌe oho ananake ko kuā Ietū mai Karirea hāꞌūꞌū ki a ia.
56 ꞌI roto o rā ŋā viꞌe a Māria Matarena, a Māria, matuꞌa o ⸤Tanatiako⸥ ararua ko ⸤Kōsē⸥, ꞌe te matuꞌa vahine o te ŋā poki ꞌa Tevereo.
He haka rē iŋa i te hakari o Ietū
(Marko 15.42-47; Ruka 23.50-56; Iovani 19.38-42)
57 Ko hāhine ꞌā mo pō, te taŋata ꞌono e tahi te ꞌīŋoa ko Kōsē o te kona ko Ārimatea, he kope hāpī takoꞌa ꞌa Ietū,
58 he oho he uꞌi i a Pirato ꞌe he ani mo vaꞌai i te hakari o Ietū. He kī e Pirato ki te vaꞌehau mo oho mo vaꞌai.
59 He toꞌo ia e Kōsē i te hakari o Ietū, he viri hai tāvana rino maꞌitaki.
60 I a ia e ai rō ꞌā e tahi kona ꞌāpī haka rē pāpaku, kona i haka ka-karo ꞌi te māꞌea pa he piha. He maꞌu ia e Kōsē i te hakari o Ietū he haka rē ꞌi roto. I puru era i rā kona hai māꞌea nui-nui taka-taka, he eꞌa he oho.
61 ꞌI muꞌa o rā kona e no-noho rō ꞌā a Māria Matarena ararua ko te rua Māria.
He ꞌauario iŋa i te kona haka rē i te hakari o Ietū
62 ꞌI te rua mahana, he ⸤mahana haka ora⸥, te nuꞌu oromatuꞌa ra-rahi ꞌe te ⸤fariseo⸥ he oho he uꞌi i a Pirato,
63 he kī:
—E te suerekao, ko manaꞌu ꞌana a mātou ki te vānaŋa kī e tū reo-reo era ꞌi te hora e ora nō ꞌā pē nei ē: ꞌi te toru mahana he ora haka ꞌou a ia.
64 ꞌO ira, ka uŋa koe ka haka ꞌauario i te kona haka rē era i te hakari o Ietū ꞌātā ka tano rō te toru mahana, ꞌo oho e tāꞌana nuꞌu hāpī ꞌo toke ꞌe ki oti he kī ki te nuꞌu ko ora ꞌā mai te mate. Mo topa pē ira, ꞌata hau rō atu te ꞌati o te reo-reo hopeꞌa nei ki te reo-reo raꞌe era.
65 He kī e Pirato:
—Nā te vaꞌehau nā. Ka oho ka aŋa hai rāveꞌa manaꞌu e kōrua ꞌo mātaki i rā kona.
66 He oho ia ananake ki tū kona era, he tāpaꞌo i te māꞌea puru o rā kona mo ꞌite ana haka makenu, ꞌe he haka ꞌauario ki te vaꞌehau.
Notas
^ Te korotina paihi topa era e rua pāꞌiŋa ꞌi te hora mate era o Ietū, kahu hio-hio, te peŋo-peŋo e haka pā e rua maŋa-maŋa tumu. Hai rā kahu e puru era i te kona hopeꞌa o te moꞌa o roto o te Kona Haꞌamuri ꞌAtua o Hērutarema. He oromatuꞌa hopeꞌa o te ra-rahi mau nō te meꞌe uru ki roto e tahi mahana ꞌi te matahiti. Te topa o rā korotina e rua pāꞌiŋa te auraꞌa: hai mate iŋa era o Ietū i ha-hata ai te ara mo tuꞌu o te taŋata hai ia ki muri i te ꞌAtua, ꞌe, takoꞌa, taꞌe hai tūtia.
