Meꞌe Haka Takeꞌa 17:1-18
17 E tahi o tū ŋā merahi era e hitu maꞌu poko-poko era he oho mai ꞌe he kī mai ki a au:
«ꞌĪ a au he haka takeꞌa atu pē hē te ꞌAtua ka haka ūtuꞌa ena i te taiꞌo ꞌite e te nuꞌu, taiꞌo noho ꞌi te kona e rahi rō ꞌā te rio.
2 Te ꞌariki taꞌatoꞌa o te ao ko moe tahi ꞌā i te taiꞌo nei, ꞌe ko taꞌero tahi ꞌana te nuꞌu o te ao ꞌi tāꞌana ꞌava, te auraꞌa, ko haka rē ꞌana i a rāua mo haka tere e te meꞌe taꞌe tano aŋa e te viꞌe nei, he haꞌamuri ki te meꞌe taꞌe he ꞌAtua parautiꞌa».
3 I meꞌe era he maꞌu i tōꞌoku vārua e te merahi ki te kona ꞌone taꞌe noho taŋata. ꞌI ira i takeꞌa ai e au i tū viꞌe era e eke rō ꞌana ꞌi ruŋa i te manuꞌino mea-mea e tahi. Te manuꞌino nei e hitu ōꞌona pūꞌoko e hoꞌe ꞌahuru tara. Te hakari ko pāpaꞌi tahi ꞌā hai ꞌīŋoa parauꞌino mo te ꞌAtua.
4 Rā viꞌe e uru rō ꞌana i te kahu moana ꞌapa mea ꞌe mea-mea, ꞌe e haka nehe-nehe rō ꞌā hai piru, hai māꞌea hopeꞌa o te nehe-nehe ꞌe hai poe. E maꞌu rō ꞌana ꞌi te rima i te hapaina aŋa hai piru ko ꞌī ꞌā e te meꞌe hopeꞌa o te hano-hano o tāꞌana aŋa era.
5 ꞌI te tira e pāpaꞌi rō ꞌā te ꞌīŋoa: «⸤Vāvīrōnia⸥, matuꞌa vahine o te taiꞌo taꞌatoꞌa ꞌe o te meꞌe taꞌatoꞌa hano-hano o te ao». Te taŋata ꞌina kai ꞌite i te haꞌaauraꞌa mau o te ꞌīŋoa nei.
6 He uꞌi atu ia a au ko taꞌero ꞌā rā viꞌe ꞌi te unu i te toto o te nuꞌu haꞌataꞌa e te ꞌAtua māꞌana, nuꞌu mā-mate i tiŋaꞌi ꞌo te ai he mataꞌite o Ietū.
I takeꞌa era e au, he māere rō atu ꞌai au.
He haꞌaauraꞌa o te viꞌe ꞌe o te manuꞌino
7 He kī mai ia e tū merahi era:
«¿He aha koe i māere ai? ꞌĪ a au he haka ꞌite atu i te meꞌe taꞌe ꞌite e kōrua e te taŋata o ruŋa o te viꞌe era ꞌe o te manuꞌino era ꞌi ruŋa rā viꞌe, manuꞌino era e hitu pūꞌoko e hoꞌe ꞌahuru tara.
8 »Te manuꞌino nei ꞌi te ao ꞌi muꞌa ꞌā; ꞌe ꞌi te hora nei, ꞌina. ꞌE, ka ai atu pē ira, pe muꞌa ka oho ena e eꞌa rō mai mai raro i te pū ꞌina he hopeꞌa te raro nui ꞌe, ka tano era, he hoa ki roto i te pōꞌauahi mo haka ūtuꞌa. Te nuꞌu te rāua ꞌīŋoa ꞌina o ruŋa i te puka pāpaꞌi i te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa mai te haꞌamata iŋa era ꞌā o te ao he māere ka takeꞌa ena i te manuꞌino nei, manuꞌino ꞌi te ao ꞌi muꞌa ꞌā, ŋaro era, ꞌe eꞌa haka ꞌou mai ena.
9 »ꞌE mo aŋi-aŋi i te meꞌe nei, e ai i a koe te mārama-rama vaꞌai atu e te ꞌAtua: Te ŋā pūꞌoko era e hitu e haꞌaauraꞌa mai ꞌā i te maꞌuŋa e hitu ꞌi ruŋa rā viꞌe e noho ena ꞌe, takoꞌa, i te ꞌariki e hitu.
10 E rima o te ŋā ꞌariki nei ko mā-mate ꞌā, e tahi e haka tere ꞌā, ꞌe e tahi kai tuꞌu mai ꞌā. Ka tuꞌu mai ena, e ko roa hia ka ŋaro rō era.
11 ꞌE te manuꞌino era, he vaꞌu ꞌariki, ꞌe ꞌi ruŋa ꞌā he ꞌariki e tahi o roto o rā ŋā ꞌariki era e hitu, ꞌe pe muꞌa ka oho ena he hoa ki roto i te pōꞌauahi.
12 »Te ŋā tara takeꞌa era e koe he ꞌariki e hoꞌe ꞌahuru kai haꞌamata kai haka tere ꞌā. E vaꞌai rō ki a rāua koia ko te manuꞌino i te parau mo haka tere i te taŋata mo te hora e tahi.
13 Te ŋā ꞌariki nei e haꞌaꞌau rō mo vaꞌai i te rāua tōroꞌa ꞌariki ki rā manuꞌino, ꞌe mo tāvini ki a ia.
14 E moto rō ananake ki te Māmoe, ꞌe he rē te Māmoe ki a rāua, ꞌi te meꞌe era he Pūꞌoko Haka Tere o te pūꞌoko haka tere taꞌatoꞌa ꞌe he ꞌAriki o te ꞌariki taꞌatoꞌa. Te nuꞌu i moto ꞌi muri i te Māmoe he nuꞌu taꞌe haka rē i te Māmoe ki te hora hopeꞌa, haꞌataꞌa era e ia māꞌana, kī era mo ⸤haka moe i te manaꞌu⸥ ꞌi ruŋa i a ia».
15 He kī haka ꞌou mai ia e tū merahi era:
«Te ŋā rio takeꞌa era e koe ꞌi te kona ꞌi ira tū taiꞌo era he nuꞌu o te taꞌatoꞌa nō hau, ꞌarero ꞌe kona o te ao.
16 Tū manuꞌino era ia ꞌe tū ŋā tara era ōꞌona, te kī, tū ŋā ꞌariki era e hoꞌe ꞌahuru e maꞌu rō i te riri taparahi-taꞌata mo rā taiꞌo, e hiko tahi rō i tāꞌana meꞌe taꞌatoꞌa, e haka mārere-rere tahi rō, e kai rō i te kiko o tōꞌona hakari ꞌe e tutu tahi rō i a ia ꞌi roto i te ahi.
17 »Te meꞌe nei ka topa ena ꞌi te meꞌe era ko ha-haꞌo ꞌā e te ꞌAtua ꞌi roto i te rāua pūꞌoko i te manaꞌu mo aŋa i tāꞌana meꞌe haŋa. ꞌO ira rā ŋā ꞌariki ka haꞌaꞌau era mo vaꞌai i te rāua tōroꞌa ꞌariki ki rā manuꞌino, ki tano tahi ai te meꞌe kī e te ꞌAtua.
18 Te viꞌe takeꞌa era e koe he kona nui-nui noho taŋata haka tere i te ꞌariki taꞌatoꞌa o te ao».
