Rōmano 10:1-21
10 E te taina, te meꞌe hopeꞌa ꞌāꞌaku o te haŋa e pure nei ki te ꞌAtua: mo eꞌa o tōꞌoku taŋata he itaraera mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa.
2 Te parautiꞌa, e kimi rō ꞌana mo tano o rāua ki te mata o te ꞌAtua; te ꞌati nō, taꞌe a roto i te ara parautiꞌa o te ꞌAtua.
3 Mo rāua, paꞌi, taꞌe he parautiꞌa te rāveꞌa vaꞌai e te ꞌAtua mo tano o te taŋata ki tōꞌona mata. ꞌO ira e aŋa ena hai rāveꞌa mau ꞌana o rāua, ꞌe ꞌina he haŋa ki te rāveꞌa vaꞌai e te ꞌAtua.
4 Te haŋa: he haka tano e te ꞌAtua i a rāua ki tōꞌona mata hai haꞌatura o rāua ki te ⸤haka tere iŋa ꞌa Mōtē⸥. ꞌE te parautiꞌa mau, hai tuꞌu iŋa mai era o Ietū Kiritō i kore ai te hauhaꞌa o te meꞌe ena he haꞌatura ki rā haka tere iŋa mo tano o te taŋata ki te mata o te ꞌAtua. Hora nei taŋata nō era mo ⸤haka moe i te manaꞌu⸥ ꞌi ruŋa i a Ietū e tano rō ꞌā ki te mata o te ꞌAtua.
5 E ai rō ꞌana te meꞌe i haka pāpaꞌi e te ꞌAtua ki a Mōtē o ruŋa i te meꞌe he tano o te taŋata ki tōꞌona mata hai haꞌatura ki te haka tere iŋa ꞌa Mōtē e kī ena pē nei ē: «Te kope haꞌatura i te meꞌe taꞌatoꞌa hāꞌaki o ruŋa i rā haka tere iŋa, ꞌātā i te meꞌe hopeꞌa o te ꞌiti-ꞌiti, he ravaꞌa i te ora ꞌāpī ꞌina he hopeꞌa raꞌa».
6 ꞌE e ai takoꞌa rō ꞌana te meꞌe i haka pāpaꞌi e te ꞌAtua o ruŋa i te meꞌe he tano o te taŋata ki tōꞌona mata hai haka moe i te manaꞌu ꞌi ruŋa i te ⸤Kiritō⸥, ꞌe o rā meꞌe te haka ꞌite mai: meꞌe taꞌe aŋarahi te ai ōꞌou e tano rō ꞌā ki te mata o te ꞌAtua hai haka moe i te manaꞌu ꞌi ruŋa i te Kiritō. Pē nei i pāpaꞌi ai: «ꞌIna koe ko kī ꞌi roto i a koe: “Mo haka moe ōꞌou i tuꞌu manaꞌu ꞌi ruŋa i te Kiritō, e iri ꞌi raꞌe e tahi kope ki te raŋi mo haka topa mai o te Kiritō mo haka ꞌite atu i tāꞌana roŋo”.
7 ꞌE ꞌina takoꞌa koe ko kī ꞌi roto i a koe: “Mo haka moe ōꞌou i tuꞌu manaꞌu ꞌi ruŋa i te Kiritō, e topa ꞌi raꞌe e tahi kope ki raro atu era ki te kona o te nuꞌu mate mo haka eꞌa mai i te Kiritō mo haka ꞌite atu i tāꞌana roŋo”».
8 Te meꞌe mau nō ꞌāꞌau mo manaꞌu: «Te roŋo o te ꞌAtua nā ꞌi muri i a koe mau ꞌā: ꞌi roto i tuꞌu māhatu ꞌe ꞌi roto i tuꞌu haha». Te roŋo nei ko te meꞌe ena: e haka moe te manaꞌu ꞌi ruŋa i a Ietū, he meꞌe nei o mātou e haka ꞌite e oho nei.
9 Mo kī ōꞌou ꞌi muꞌa i te taŋata: a Ietū he Pūꞌoko Haka Tere ōꞌou, ꞌe mo manaꞌu ōꞌou hai māhatu: te ꞌAtua i haka ora rō i a Ietū mai te mate, he eꞌa ia koe mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.
10 Pē nei te auraꞌa: hai haka moe parautiꞌa ōꞌou i te manaꞌu ꞌi ruŋa i a Ietū, te ꞌAtua he haka tano i a koe ki tōꞌona mata, ꞌe hai kī ōꞌou ꞌi muꞌa i te taŋata: a Ietū Kiritō he Pūꞌoko Haka Tere ōꞌou, he haka eꞌa e te ꞌAtua i a koe mai te ūtuꞌa o te hara ꞌe he vaꞌai atu i te ora ꞌāpī ꞌina he hopeꞌa raꞌa.
11 E kī rō ꞌana, paꞌi, ꞌi ruŋa i te ⸤Pāpaꞌi Moꞌa⸥ pē nei ē: «Te kope haka moe i te manaꞌu ꞌi ruŋa i te Kiritō, ki te hora hopeꞌa e ko manaꞌu ko hape ꞌana ꞌō ꞌo te haka moe i te manaꞌu ꞌi ruŋa i a ia».
12 Te meꞌe nei taꞌe mo te nuꞌu ⸤hūrio⸥ nō, mo te nuꞌu taꞌe he hūrio takoꞌa. A Ietū, paꞌi, he Pūꞌoko Haka Tere o te taꞌatoꞌa, ꞌe tōꞌona riva rahi ꞌi ruŋa i te taŋata taꞌatoꞌa ani ki a ia.
13 Pē nei, paꞌi, e kī ena ꞌi ruŋa i te Pāpaꞌi Moꞌa: «Taꞌatoꞌa nuꞌu ani ki te ꞌAtua mo haka ꞌaroha i a rāua, he haka eꞌa e ia mai roto i te ūtuꞌa o te hara ꞌe he vaꞌai i te ora ꞌāpī ꞌina he hopeꞌa raꞌa».
14 Te meꞌe nō, ¿pē hē ia ana ani te nuꞌu mo ai ꞌina he haka moe i te rāua manaꞌu ꞌi ruŋa i a Ietū? ꞌE ¿pē hē ana haka moe i te rāua manaꞌu ꞌi ruŋa mo ai ꞌina he ꞌite e tahi meꞌe o ruŋa i a ia? ꞌE ¿pē hē ana ꞌite o ruŋa i a ia, mo ai ꞌina he taŋata haka ꞌite o ruŋa?
15 ꞌE ¿pē hē ana haka ꞌite ana oho i te roŋo riva-riva o te ꞌAtua mo ai ꞌina he uŋa i te kope mo haka ꞌite? E hāꞌaki rō ꞌana, paꞌi, ꞌi ruŋa i te Pāpaꞌi Moꞌa pē nei ē: «¡Ko te koa ꞌō i te meꞌe he tuꞌu mai o te nuꞌu e maꞌu rō ꞌana i te roŋo riva-riva o te ꞌAtua!».
16 Ka ai atu pē ira, taꞌe taꞌatoꞌa taŋata e haŋa rō ꞌā ki te roŋo riva-riva o te ꞌAtua. Pa he meꞌe kī e te perofeta era ko ꞌItaia: «E te ꞌAtua, nuꞌu taꞌe rahi te nuꞌu haka noho i te rāua manaꞌu ꞌi ruŋa i te meꞌe haka ꞌite e mātou».
17 Te meꞌe nō, mo haka moe e tahi kope i tōꞌona manaꞌu ꞌi ruŋa i te Kiritō, e ŋaroꞌa ꞌi raꞌe i te roŋo parautiꞌa o ruŋa; ꞌe mo ŋaroꞌa i rā roŋo, e haka ꞌite e te nuꞌu.
18 Tāꞌaku ꞌui ia: ¿ꞌIna ꞌō pēaha kai ŋaroꞌa e te nuꞌu hūrio i te roŋo riva-riva o te ꞌAtua? I ŋaroꞌa rō. E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē:«Te reꞌo o te maꞌuroŋo ko tuꞌu ꞌā ki te kona taꞌatoꞌa,ꞌātā ki te kona hopeꞌa o te ao».
19 ꞌE tāꞌaku ꞌui haka ꞌou: ¿ꞌIna ꞌō pēaha te itaraera kai aŋi-aŋi riva-riva i te rāua meꞌe ŋaroꞌa era? I aŋi-aŋi rō. Te meꞌe nō, kai haŋa a rāua mo haꞌatura. O ruŋa i pāpaꞌi ai e Mōtē i haka ꞌite e te ꞌAtua pē nei ē:«E haka mākota rō e au i a kōrua mo te nuꞌu taꞌe he hūrio,ꞌe e haka riri rō e au mo te nuꞌu taꞌe ꞌite o ruŋa i a au».
20 I pāpaꞌi takoꞌa rō e te perofeta era ko ꞌItaia pē nei ē:«Te nuꞌu taꞌe kimi mai, i ravaꞌa rō i a au;ꞌe te nuꞌu taꞌe ꞌui o ruŋa ōꞌoku,ki a rāua a au i haka takeꞌa ai i a au».
21 ꞌE mo te itaraera i kī takoꞌa ai e te ꞌAtua i haka pāpaꞌi ki a ꞌItaia:«Te aŋa nō ꞌāꞌaku he haka toro i tōꞌoku rimaki te hau haka ꞌāriŋa ꞌe taꞌe haka roŋo».
